ಬದಲಾವಣೆ: ಕೆಲವು ಕಡೆಗೆ ಎರಡೆರಡು ನಳ ಅಳವಡಿಸಿಕೊಂಡಿರುವ ಹಾಗೂ ಅರ್ಧ ಇಂಚಿನ ಬದಲಾಗಿ ಮುಕ್ಕಾಲು ಇಂಚಿನ ಪೈಪ್ ಅಳವಡಿಸಿಕೊಂಡಿರುವುದನ್ನು ತೆರವುಗೊಳಿಸುವ ಸಂದರ್ಭದಲ್ಲಿ ಸಿಬ್ಬಂದಿಗಳು ಸಾರ್ವಜನಿಕರ ತಕರಾರನ್ನೂ ಎದುರಿಸಿದ್ದಾರೆ. ಆದಾಗ್ಯೂ ಮುಕ್ಕಾಲು ಇಂಚಿನ ಪೈಪ್ ತೆಗೆದು ಹಾಕಿ ಅರ್ಧ ಇಂಚಿನ ಪೈಪ್ ಹಾಕುವ ಯತ್ನವೂ ನಡೆದಿದೆ. ಹೀಗೆ ಇಡೀ ಗ್ರಾಮದ ಎಲ್ಲ ಮನೆಗಳ ಪೈಪ್ಲೈನ್ ಪರಿಶೀಲಿಸಿ ದುರಸ್ತಿಗೊಳಿಸುವವರೆಗೆ ಈ ಸಮಸ್ಯೆ ಪರಿಹಾರ ಕಾಣಲಾರದು ಎನ್ನಲಾಗುತ್ತಿದೆ. ಊರ ಹೊರಗಿನ ಮುಖ್ಯ ಪೈಪ್ಲೈನ್ಗೆ ಅಳವಡಿಸಿದ ಅನಧಿಕೃತ ಒಂದೂವರೆ ಇಂಚಿನ ಪೈಪ್ಲೈನ್ ಕೂಡ ತೆರವುಗೊಳಿಸಲಾಗುತ್ತದೆ ಎಂದು ಕುಡಿಯುವ ನೀರು ಸರಬರಾಜು ಸಿಬ್ಬಂದಿ ತಿಳಿಸಿದ್ದಾರೆ. ಈಗಲಾದರೂ ಗ್ರಾಪಂ ಅಧಿಕಾರಿಗಳು ಎಚ್ಚೆತ್ತುಕೊಂಡು, ಕಟ್ಟುನಿಟ್ಟಿನ ಕ್ರಮ ಕೈಗೊಂಡು, ನೀರು ನಿರ್ವಹಣೆಯ ಸಮಸ್ಯೆ ಪರಿಹರಿಸಬೇಕಿದೆ ಎಂದು ಗ್ರಾಮಸ್ಥರು ಆಗ್ರಹಿಸಿದ್ದಾರೆ.
