ಕ್ರೀಡೆಯಿಂದ ದೇಹ ಮತ್ತು ಮನಸ್ಸು ಸದೃಢತೆ ಹೊಂದಲು ಸಾಧ್ಯ ಎಂದು  ಧಾರವಾಡದ ಕೆ.ಜಿ. ನಾಡಿಗೇರ ದೈಹಿಕ ಶಿಕ್ಷಣ ಮಹಾವಿದ್ಯಾಲಯದ ನಿವೃತ್ತ ಪ್ರಾಂಶುಪಾಲ ಎಂ.ಜಿ. ತಿಮ್ಮಾಪುರ ನುಡಿದರು. 

ಪಟ್ಟಣದ ಕುಮಾರೇಶ್ವರ ಕಲಾ-ವಾಣಿಜ್ಯ ಮಹಾವಿದ್ಯಾಲಯದಲ್ಲಿ ಆಯೋಜಿಸಿದ್ದ ಹಾವೇರಿ ವಿಶ್ವವಿದ್ಯಾಲಯ ಮಟ್ಟದ ಎರಡು ದಿನಗಳ ಅಂತರ್ ಕಾಲೇಜು ವಾಲಿಬಾಲ್ ಕ್ರೀಡಾಕೂಟದ ಸಮಾರೋಪ ಸಮಾರಂಭದ ಮುಖ್ಯ ಅತಿಥಿಗಳಾಗಿ ಆಗಮಿಸಿ ಅವರು ಮಾತನಾಡಿದರು. 

ಹಾವೇರಿ ವಿಶ್ವವಿದ್ಯಾಲಯ ಕ್ರೀಡಾ ಮಂಡಳಿ ಸಮಿತಿ ಸದಸ್ಯ ಶಿವಾನಂದ ಮಲ್ಲನಗೌಡ್ರ ಮಾತನಾಡಿ, ಕ್ರೀಡೆ ದೇಹವನ್ನು ಸಕ್ರಿಯವಾಗಿಡುತ್ತವೆ. ಒತ್ತಡ ನಿವಾರಿಸಿ ಖಿನ್ನತೆ ವಿರುದ್ಧ ಹೋರಾಡಲು ಸಹಾಯ ಮಾಡುತ್ತದೆ. ಯುವಕರು ಹೆಚ್ಚಾಗಿ ಕ್ರೀಡಯಲ್ಲಿ ತೊಡಗಬೇಕು ಎಂದು ತಿಳಿಸಿದರು. 

ಪ್ರಾಂಶುಪಾಲ್ ಡಾ.ಎಂ.ಎಚ್. ಹೊಳಿಯಣ್ಣನವರ ಅಧ್ಯಕ್ಷತೆ ವಹಿಸಿದ್ದರು. ವಿದ್ಯಾರ್ಥಿ ಒಕ್ಕೂಟದ ಕಾರ್ಯಾಧ್ಯಕ್ಷ ಡಾ.ಪ್ರಕಾಶ ಹೊಳೇರ ಪ್ರಾಸ್ತಾವಿಕವಾಗಿ ಮಾತನಾಡಿದರು. ಆಡಳಿತ ಮಂಡಳಿಯ ವಿಶೇಷಾಽಕಾರಿ ವೆಂಕಟೇಶ ರಾಠೋಡ, ಹಾವೇರಿ ವಿಶ್ವವಿದ್ಯಾಲಯದ ಪ್ರಭಾರಿ ದೈಹಿಕ ಶಿಕ್ಷಣ ಮತ್ತು ಕ್ರೀಡಾ ವಿಭಾಗದ ನಿರ್ದೇಶಕ ಸಿ.ಎನ್. ಸೊರಟೂರ, ಕಾಲೇಜಿನ ಕ್ರೀಡಾ ಸಮಿತಿ ಕಾರ್ಯಾಧ್ಯಕ್ಷೆ ಪ್ರೊ. ಭೀಮಾವತಿ ಸೋಮನಕಟ್ಟಿ ಉಪಸ್ಥಿತರಿದ್ದರು. 

ನಿರ್ಣಾಯಕರಾಗಿ ಕಾರ್ಯ ನಿರ್ವಹಿಸಿದ ರಾಣೆಬೆನ್ನೂರಿನ ಸಂದೀಪ ತಾವರಗಿ, ಕುಮಟಾದ ಪ್ರವೀಣ ಭಂಡಾರಿ, ಧಾರವಾಡದ ಗಿರೀಶ್ ಹಾವನೂರು, ಕುಮಟಾದ ಕೇಶವ ಗಾವಡಿ, ಖತೀಬ ಇವರನ್ನು ಸನ್ಮಾನಿಸಲಾಯಿತು. ವೈಯಕ್ತಿಕ ಬೆಸ್ಟ್ ಆಲ್‌ರೌಂಡರ್-ರೇಹಾನ್ ಹಂಚಿನಮನಿ, ಬೆಸ್ಟ್ ಅಟ್ಯಾಕರ್-ಮುಸ್ತಫಾ, ಬೆಸ್ಟ್ ಸೆಟ್ಟರ್-ಮಾಲತೇಶ, ಬೆಸ್ಟ್ ಲಿಬೋ-ಆದರ್ಶ ಶಿವಣ್ಣನವರ ಪ್ರಶಸ್ತಿಗೆ ಭಾಜನರರಾದರು.

ಅಂತರ್  ಕಾಲೇಜು ವಾಲಿಬಾಲ್ ಕ್ರೀಡಾಕೂಟದಲ್ಲಿ ಹಾನಗಲ್ಲಿನ ಕುಮಾರೇಶ್ವರ ಕಲಾ ಮತ್ತು ವಾಣಿಜ್ಯ ಮಹಾವಿದ್ಯಾಲಯ ಪ್ರಥಮ ಸ್ಥಾನ ಪಡೆದು ಚಾಂಪಿಯನ್ ಆಗಿ ಹೊರಹೊಮ್ಮಿತು. ಸವಣೂರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ಎರಡನೇ ಸ್ಥಾನ, ಬಂಕಾಪುರ ಸರ್ಕಾರಿ ಪ್ರಥಮ ದರ್ಜೆ ಕಾಲೇಜು ತಂಡ ಮೂರನೇ ಸ್ಥಾನ ಪಡೆದುಕೊಂಡಿತು. ಜಿಲ್ಲೆಯ ವಿವಿಧ ಕಾಲೇಜುಗಳಿಂದ ೧೬ ತಂಡಗಳು ಭಾಗವಹಿಸಿದ್ದವು.