lay-siege ತೋಟಗಂಟಿ ಗ್ರಾಮಸ್ಥರಿಂದ ಪಪಂ ಮುತ್ತಿಗೆ

ತೋಟಗಂಟಿ ಪಪಂ ಸದಸ್ಯ ಲಕ್ಷ್ಮೀ ಚಿಕ್ಕಮೊರಬ ಮತ್ತು ಗ್ರಾಮಸ್ಥರು ಲಕ್ಷ್ಮಣ ಬೋವೇರ ಮಾತನಾಡಿ, ತೋಟಗಂಟಿ ಗ್ರಾಮದಲ್ಲಿರುವ ಒಟ್ಟು 12 ಎಕರೆ 15 ಗುಂಟೆ ಗೋಮಾಳ ಜಾಗದಲ್ಲಿ 2 ಎಕರೆಯಲ್ಲಿ ಒಳಚರಂಡಿ ನೀರು ಶುದ್ಧೀಕರಣ ಘಟಕವನ್ನು ಮಾಡಲು ತಾಲೂಕಾಡಳಿತ ಪಟ್ಟಣ ಪಂಚಾಯಿತಿ ಮೂಲಕ ಕರ್ನಾಟಕ ನಗರ ಮೂಲ ಸೌಕರ್ಯ ಅಭಿವೃದ್ಧಿ ಮತ್ತು ಹಣಕಾಸು ನಿಗಮಕ್ಕೆ ಹಸ್ತಾಂತರ ಮಾಡಿದೆ. ಈ ಇಲಾಖೆಯ ಮೂಲಕ ಘಟಕ ನಿರ್ಮಾಣ ಕಾಮಗಾರಿ ಆರಂಭಿಸುತ್ತಿದೆ. ಈಗಾಗಲೇ ಗ್ರಾಮದ ಅಕ್ಕ-ಪಕ್ಕ ಕುಮದ್ವತಿ ಬಳಿ ತ್ಯಾಜ್ಯ ಕೊಳಚೆ ಮತ್ತು ದುರ್ವಾಸನೆಯಿಂದ ಗ್ರಾಮಸ್ಥರು ಆರೋಗ್ಯದ ಸಮಸ್ಯೆ ಅನುಭವಿಸುತ್ತಿದ್ದಾರೆ. ರಟ್ಟಿಹಳ್ಳಿ ಪಟ್ಟಣದ ಸಂಪೂರ್ಣ ಚರಂಡಿ ತ್ಯಾಜ್ಯ ಸಂಸ್ಕರಣೆ ಮಾಡಲು ಇಲ್ಲಿ ಘಟಕ ನಿರ್ಮಿಸಿದರೆ ನಮ್ಮ ಮಕ್ಕಳು ರೋಗದಿಂದ ಬಳಲಿ ಸಾಯುವ ಪರಿಸ್ಥಿತಿ ನಿರ್ಮಾರ್ಣವಾಗುತ್ತದೆ. ಈಗಾಗಲೇ ಕಾಮಗಾರಿ ಮಾಡಲು ಬಂದ ಜೆಸಿಬಿ ಕೆಲಸವನ್ನು ಸ್ಥಗಿತಗೊಳಿಸಲಾಗಿದೆ. ಈ ಗೋಮಾಳ ಜಾಗದಲ್ಲಿ ಜಾನುವಾರುಗಳನ್ನು ಮೇಯಿಸಲಾಗುತ್ತಿದೆ. ನಮ್ಮ ಗ್ರಾಮದಲ್ಲಿ ಅನೇಕ ಜನರಿಗೆ ವಾಸಿಸಲು ನಿವೇಶನಗಳು ಇಲ್ಲ ಕೂಡಲೇ ಪಟ್ಟಣ ಪಂಚಾಯಿತಿ ಈ ಕಾಮಗಾರಿ ನಿಲ್ಲಿಸಿ ಈ ಜಾಗವನ್ನು ಅವರಿಗೆ ನೀಡದಂತೆ ರದ್ದು ಮಾಡಬೇಕು, ಇಲ್ಲವಾದರೆ ಪಪಂ ಆವರಣದಲ್ಲಿ ಎಲ್ಲಾ ಗ್ರಾಮಸ್ಥರು ಆಗಮಿಸಿ ಉಗ್ರ ಪ್ರತಿಭಟನೆ ನಡೆಸಲಾಗುವುದು ಎಂದು ಆಕ್ರೋಶ ವ್ಯಕ್ತಪಡಿಸಿ ಮನವಿ ಸಲ್ಲಿಸಿದರು.

ಪಟ್ಟಣ ಪಂಚಾಯಿತಿ ಅಧ್ಯಕ್ಷ ರವೀಂದ್ರ ಮುದಿಯಪ್ಪನವರ ಮತ್ತು ಪಪಂ ಮುಖ್ಯಾಧಿಕಾರಿ ಸಂತೋಷ ಚಂದ್ರಿಕೇರ ಗ್ರಾಮಸ್ಥರು ಸಮಸ್ಯೆಯನ್ನು ಆಲಿಸಿ ಮಾತನಾಡಿ, ತೋಟಗಂಟಿ ಗ್ರಾಮಸ್ಥರ ಮನವಿಯನ್ನು ಜಿಲ್ಲಾಧಿಕಾರಿ ಮತ್ತು ಸಂಬಂಧಿಸಿದ ಇಲಾಖೆಗೆ ಕಳುಹಿಸಲಾಗುವುದು ಎಂದರು.

ಪಟ್ಟಣ ಮತ್ತು ತೋಟಗಂಟಿ ಗ್ರಾಮದ ಸಂಪರ್ಕ ಬಾಂದಾರ ಸಹಿತ ಸೇತುವೆ ಮೂಲ ಪಟ್ಟಣದ ಕೆಲವು ಕೋಳಿ ಅಂಗಡಿಗಳು, ಹೋಟೆಲ್‌ಗಳು ಸೇರಿದಂತೆ ಅನೇಕರು ತ್ಯಾಜ್ಯವನ್ನು ತಂದು ತಂದು ಹಾಕುತ್ತಿದ್ದಾರೆ, ಸೇತುವೆ ಮೇಲೆ ಗ್ರಾಮಸ್ಥರು ಓಡಾಡಲು ಆಗುತ್ತಿಲ್ಲ ವಿಪರೀತ ದುರ್ವಾಸನೆ ಬೀರುತ್ತಿದೆ, ಇರುವ ಸ್ವೆಲ್ಪ ನೀರು ತ್ಯಾಜ್ಯದಿಂದ ಸಂಪೂರ್ಣ ಮಲಿನವಾಗಿದೆ. ಕೂಡಲೇ ಇಲ್ಲಿ ಯಾರು ತ್ಯಾಜ್ಯವನ್ನು ಹಾಕದಂತೆ ಪಪಂ ಕ್ರಮ ಕೈಗೊಳ್ಳಬೇಕು ಎಂದರು. ಪಪಂ ಅಧ್ಯಕ್ಷ ಅಲ್ಲಿ ಯಾರು ತ್ಯಾಜ್ಯವನ್ನು ಹಾಕುತ್ತಾರೋ ಅವರಿಗೆ ದಂಡ ವಿಧಿಸಲಾಗುವುದು ಎಂದರು.

ಪಪಂ ಉಪಾಧ್ಯಕ್ಷ ಶಿವಕುಮಾರ ಉಪ್ಪಾರ, ಸ್ಥಾಯಿ ಸಮಿತಿ ಸದಸ್ಯ ಬಸವರಾಜ ಆಡಿನವರ, ಮಂಜುನಾಥ ದೊಡ್ಡಗೌಡ್ರು, ಉಮೇಶಗೌಡ ಪಾಟೀಲ, ಅಶೋಕ ಚಿಕ್ಕಮೊರಬ, ಸಂದೀಪ ಪಾಟೀಲ, ಚಂದ್ರಯ್ಯ ಹಿರೇಮಠ, ಸುರೇಶ ನಾಯ್ಕ, ನಾಗನಗೌಡ ಪಾಟೀಲ, ಆನಂದಪ್ಪ ನಾಯ್ಕ, ವಿಜಯ ಬೋವೇರ, ಸೋಮನಗೌಡ ಪಾಟೀಲ, ರವಿ ಓಲೇಕಾರ, ಮಾಲತೇಶ ಗುಬ್ಬಿ ಇತರರಿದ್ದರು.