ಜಾಗದ ವಿವಾದದಿಂದಾಗಿ ಶಾಲೆ ಗೇಟ್​ಗೆ ಬೀಗ School gate locked

ಬ್ಯಾಡಗಿ: ಶಾಲೆಗೆ ದಾನ ನೀಡಿದ್ದಕ್ಕಿಂತಲೂ ಹೆಚ್ಚು ಜಾಗ ಬಳಸಿಕೊಳ್ಳಲಾಗಿದೆ ಎಂದು ಆರೋಪಿಸಿ ಮೂಲ ಮಾಲೀಕರು ಶಾಲೆಯ ಗೇಟ್​ಗೆ ಬೀಗ (School gate locked)ಹಾಕಿದ ಘಟನೆ ತಾಲೂಕಿನ ಮಲ್ಲೂರು ಗ್ರಾಮದ ಉರ್ದು ಹಿರಿಯ ಪ್ರಾಥಮಿಕ ಶಾಲೆಯಲ್ಲಿ ಸೋಮವಾರ ಘಟನೆ ಜರುಗಿತು.

ತಾಲೂಕಿನ ಮಲ್ಲೂರು ಗ್ರಾಮದ ಸರ್ವೆ ನಂ. 111/1ರಲ್ಲಿ 1.02 ಗುಂಟೆ ಜಾಗ ನಮಗೆ ಸೇರಿದ್ದು, ಈ ಪೈಕಿ ಅ ಖರಾಬನ 15 ಗುಂಟೆ ಜಾಗದಲ್ಲಿ 8 ಗುಂಟೆ ಜಾಗವನ್ನು ನಮ್ಮ ತಂದೆ ಶಂಕ್ರಪ್ಪ ಕುಲಕರ್ಣಿ ಅವರು ಶಾಲೆಗೆ ನೀಡಿದ್ದರು. ಕೊಠಡಿ ನಿರ್ವಿುಸುವ ವೇಳೆ ಹೆಚ್ಚು ಬಳಸಿಕೊಳ್ಳುವ ಜತೆಗೆ ಖರಾಬ ಜಾಗ ಬಿಟ್ಟು ಬೇರೆ ಜಾಗದಲ್ಲಿ ಕಟ್ಟಡ ನಿರ್ವಿುಸಲಾಗಿದೆ. ಯಾವುದೇ ಕಾರಣಕ್ಕೂ 8 ಗುಂಟೆ ಜಾಗ ಹೊರತುಪಡಿಸಿ, ಉಳಿದ ಜಾಗ ನೀಡುವುದಿಲ್ಲ. ಖರಾಬು ಜಾಗವನ್ನು ಅವರು ಶಾಲೆಗೆ ಬಳಕೆ ಮಾಡಿಕೊಳ್ಳಲಿ ಎಂದು ಮಾಲೀಕ ಈರಪ್ಪ ಕುಲಕರ್ಣಿ ಅವರು ಗೇಟ್​ಗೆ ಬೀಗ ಹಾಕಿದ್ದರು.

ಶಾಲಾ ಗೇಟ್​ಗೆ ಬೀಗ ಹಾಕಿದ ಬಳಿಕ ಮಕ್ಕಳು ಬಿಸಿಲಿನಲ್ಲಿ ಕುಳಿತಿರುವ ಸುದ್ದಿ ತಿಳಿದು ಪೊಲೀಸರು ಹಾಗೂ ಕ್ಷೇತ್ರ ಶಿಕ್ಷಣಾಧಿಕಾರಿ ಎಸ್.ಜಿ. ಕೋಟಿ ಸ್ಥಳಕ್ಕೆ ಧಾವಿಸಿದರು. 2 ತಾಸುಗಳ ಬಳಿಕ ಮಾಲೀಕರನ್ನು ಮನವೊಲಿಸಿ ಗೇಟ್ ತೆರೆಸುವ ಮೂಲಕ ಪಾಠ-ಪ್ರವಚನಕ್ಕೆ ಅನುಕೂಲ ಮಾಡಿಕೊಡಲಾಯಿತು. ಅನಿವಾರ್ಯವಾಗಿ ಶಿಕ್ಷಕರು, ಪಾಲಕರು ಸಂಕಷ್ಟಕ್ಕೆ ಸಿಲುಕಿದ್ದರು.

ಘಟನೆಗೆ ಸಂಬಂಧಿಸಿದಂತೆ ಹಿಂದಿನ ಕ್ಷೇತ್ರ ಶಿಕ್ಷಣಾಧಿಕಾರಿಗಳ ನಿರ್ಲಕ್ಷ್ಯ ಮೇಲ್ನೋಟಕ್ಕೆ ಕಾಣುತ್ತಿದೆ. ಜಾಗ ಶಿಕ್ಷಣ ಇಲಾಖೆ ಹೆಸರಲ್ಲಿ ನೋಂದಣಿ ಆಗದಿದ್ದರೂ ಅನಧಿಕೃತ ಕಟ್ಟಡ ನಿರ್ವಿುಸಲಾಗಿದೆ ಎನ್ನುವ ಪ್ರಶ್ನೆ ಈಗ ದೊಡ್ಡದಾಗಿ ಉದ್ಭವಿಸಿದೆ.

"