2 ಲಕ್ಷಕ್ಕೂ ಅಧಿಕ ಚೀಲ ಆವಕ ‘ಕೋಟಿ ರೂ. ಶುಲ್ಕ’

ಮಾ. 16ರಂದು ಆವಕ 2 ಲಕ್ಷ ಚೀಲ ದಾಟಿದ ಪರಿಣಾಮ ಮಾರುಕಟ್ಟೆ ಆವರಣ ಸಂಪೂರ್ಣ ತುಂಬಿಹೋಗಿತ್ತು. ನಗರದ ಮುಖ್ಯರಸ್ತೆ ಸೇರಿ ಎಲ್ಲಿ ನೋಡಿದರೂ ವಾಹನಗಳ ದಟ್ಟಣೆ, ಧೂಳು ಮತ್ತು ಘಾಟಿನ ವಾತಾವರಣ ಕಂಡುಬಂತು. ಪ್ರಸ್ತುತ ವಾರದ ಎರಡು ದಿನಗಳಲ್ಲಿ ಮಾರುಕಟ್ಟೆ ಶುಲ್ಕ 1 ಕೋಟಿ ರೂ. ದಾಟುತ್ತಿದ್ದು, ಒಟ್ಟಾರೆ 18 ಕೋಟಿ ರೂ. ಗುರಿ ಮುಟ್ಟುವತ್ತ ಮಾರುಕಟ್ಟೆ ದಾಪುಗಾಲು ಹಾಕಿದೆ. ವಾಹನ ನಿಲುಗಡೆ ಕಟ್ಟಡ 300ಕ್ಕೂ ಹೆಚ್ಚು ವಾಹನ ಭರ್ತಿಯಾಗಿತ್ತು.

ಮಳೆ ಆತಂಕದಲ್ಲೂ ದರದಲ್ಲಿ ಸ್ಥಿರತೆ: ಭಾನುವಾರ ಸಂಜೆ ಸುರಿದ ಮಳೆಯಿಂದಾಗಿ ಬೆಲೆ ಕುಸಿತವಾಗಬಹುದೆಂಬ ಆತಂಕ ರೈತರಲ್ಲಿ ಮನೆಮಾಡಿತ್ತು. ಆದರೆ, ಸೋಮವಾರ ಮಾರುಕಟ್ಟೆಯಲ್ಲಿ ಡಬ್ಬಿ ಮತ್ತು ಕಡ್ಡಿ ತಳಿಗಳಿಗೆ ಉತ್ತಮ ಬೇಡಿಕೆ ಕಂಡುಬಂದಿತು. ಹಿಂದಿನಂತೆಯೇ 1,000- 1,500 ರೂಪಾಯಿ ವ್ಯತ್ಯಾಸದಲ್ಲಿ ಖರೀದಿ ನಡೆದಿದ್ದು, ಬೆಳೆಗಾರರು ನಿಟ್ಟುಸಿರುಬಿಡುವಂತಾಗಿದೆ. ಮಾರುಕಟ್ಟೆಯಲ್ಲಿ ಬೆಲೆ ಸ್ಥಿರತೆ ಕಾಯ್ದುಕೊಂಡಿದೆ.