rain: ಬಾರದ ಮಳೆ, ಬಸವಳಿದ ಬೆಳೆ

ಮುಂಗಾರು ಉತ್ತಮವಾಗಿ ಸಂತಸಗೊಂಡು ಬಿತ್ತನೆ ಕಾರ್ಯಕೈಗೊಂಡಿದ್ದ ರೈತರು ಇದೀಗ ಮಳೆ ಇಲ್ಲದೆ ಆತಂಕಗೊಂಡಿದ್ದಾರೆ. ಮೊಳಕೆಯೊಡೆದು ಬೆಳೆಯುತ್ತಿರುವ ಬೆಳೆಗಳು ಬಾಡುವ ಭೀತಿ ಅನ್ನದಾತರರನ್ನು ಆವರಿಸಿದೆ.

ಮೇ ತಿಂಗಳ ಕೊನೆ, ಜೂನ್ ಮೊದಲ ವಾರದಲ್ಲಿ ಅಲ್ಪ ಸ್ವಲ್ಪ ಮಳೆ ಬಂದು ಬಹುಪಾಲು ರೈತರು ತಮ್ಮ ಕೃಷಿ ಭೂಮಿಯಲ್ಲಿ ಭತ್ತ, ಗೋವಿನಜೋಳ, ಶೇಂಗಾ, ಸೋಯಾಬೀನ್, ಹತ್ತಿ ಸೇರಿದಂತೆ ಇನ್ನಿತರ ಬೀಜ ಬಿತ್ತಿ ಖುಷಿ ಪಟ್ಟಿದರು. ಆದರೆ, ಆ ಖುಷಿ ಬಹಳಷ್ಟು ದಿನ ಉಳಿಯುವಂತೆ ಕಾಣುತ್ತಿಲ್ಲ. ಅಷ್ಟಿಷ್ಟು ಮಳೆಗೆ ಬಿತ್ತಿದ ಬೀಜವೂ ಮೊಳಕೆಯಾಗಿ ಮೇಲೆ ಬಂದು ಮುಗಿಲು ನೋಡುತ್ತಿದೆ. ಆದರೆ, ಮಳೆ ಬರುವ ಆಶಾದಾಯಕ ವಾತಾವರಣವಿಲ್ಲದೆ ರೈತ ಚಿಂತಿತನಾಗಿದ್ದಾನೆ. ಭೂಮಿಯಲ್ಲಿ ಬೆಳೆದು ನಿಂತಿರುವ ಪೈರು ಬಿಸಿಲಿನ ತಾಪಕ್ಕೆ ಒಣಗುತ್ತಿರುವುದನ್ನು ನೋಡಲಾಗದೇ ರೈತ ತನ್ನ ಕೃಷಿ ಭೂಮಿಯತ್ತ ಮುಖವನ್ನೂ ಮಾಡಲಾಗದ ಸ್ಥಿತಿಗೆ ತಲುಪಿದ್ದಾನೆ.

ರೈತ ಬೀಜ ಗೊಬ್ಬರಕ್ಕಾಗಿ ಸಾಕಷ್ಟು ಪ್ರಮಾಣದಲ್ಲಿ ಹಣ ಹಾಕಿದ್ದಾನೆ. ಕೂಲಿ ಕಾರ್ಮಿಕರ ಕೊರತೆಯಿಂದ, ಯಂತ್ರಗಳ ಸಹಾಯದಿಂದ ಉತ್ತಮ ಬಿತ್ತನೆ ನಡೆದಿದ್ದರೂ ಈ ವರ್ಷದ ರೈತನ ಕೃಷಿ ಭವಿಷ್ಯ ಮಾತ್ರ ಉತ್ತಮವಿಲ್ಲ ಎಂದು ಭಾಸವಾಗುತ್ತಿದೆ. ಮುಂಗಾರಿನ ಮಳೆಯ ವಿಫಲತೆಯಿಂದ ಕೃಷಿಯ ಭರವಸೆಯನ್ನೇ ಕಳೆದುಕೊಂಡಿದ್ದಾನೆ.

"

ಮುಂಗಾರಿನ ಆಸೆ ಹೊತ್ತು ಲಕ್ಷಾಂತರ ರೂಪಾಯಿ ಖರ್ಚು ಮಾಡಿ ಬೀಜ-ಗೊಬ್ಬರ ಉಳಿಮೆ, ಆಳುಗಳಿಗೆ ಖರ್ಚು ಮಾಡಲಾಗಿದೆ. ಆದರೆ, ಇದೀಗ ಮಳೆ ಕೈಕೊಟ್ಟಿದ್ದರಿಂದ ಆತಂಕ ಎದುರಾಗಿದೆ. ಇನ್ನಾದರೂ ಉತ್ತಮ ಮಳೆಯಾಗಿ ನಮ್ಮ ಬಾಳು ಹಸನಾಗಲಿ.

— ಕಟ್ಟೆಪ್ಪ ಮುದ್ದಪ್ಪನವರ. ಹಿರೇಮಲ್ಲೂರ ಗ್ರಾಮದ ರೈತ