Kumadvati river ಕುಮದ್ವತಿ ಬಾಂದಾರಗೆ ಗೇಟ್ ಅಳವಡಿಸಲು ಮೀನಮೇಷ

ರಟ್ಟಿಹಳ್ಳಿ-ತೋಟಗಂಟಿ ಗ್ರಾಮದ ನಡುವೆ ಕುಮದ್ವತಿ ನದಿಗೆ kumadvati river bridge ನಿರ್ವಣವಾಗಿರುವ ಸೇತುವೆ ಸಹಿತ ಬಾಂದಾರಗೆ ಗೇಟ್ ಅಳವಡಿಸದಿರುವುದು.

Published on:

09 Nov 2025, 4:54 pm

ರಟ್ಟಿಹಳ್ಳಿ: ತಾಲೂಕಿನ ರೈತರ ಜೀವನಾಡಿಯಾಗಿರುವ ಕುಮದ್ವತಿ ನದಿಯ (Kumadvati river) ಬಾಂದಾರ್ಗಳಿಗೆ ಗೇಟ್ ಅಳವಡಿಸಿ ನೀರು ಸಂಗ್ರಹಿಸಬೇಕಾದ ನೀರಾವರಿ ಇಲಾಖೆ ಅಧಿಕಾರಿಗಳು ಕಣ್ಮುಚ್ಚಿ ಕುಳಿತಿದ್ದಾರೆ.

ಮದಗದ ಕೆರೆಯಿಂದ ಕೋಡಿ ಬಿದ್ದು ನದಿಯಾಗಿ ಉಗಮಿಸುವ ಕುಮದ್ವತಿಯು ಮಾಸೂರು, ರಾಮತೀರ್ಥ, ಹಿರೇಮೊರಬ, ಎಲಿವಾಳ, ರಟ್ಟಿಹಳ್ಳಿ, ಸಣ್ಣಗುಬ್ಬಿ, ಮಾದಾಪುರ, ಕುಡುಪಲಿ, ಬಡಾಸಂಗಾಪುರ ಗ್ರಾಮಗಳ ಮೂಲಕ ರಾಣೆಬೆನ್ನೂರ ತಾಲೂಕಿನ ಮುದೇನೂರು ಗ್ರಾಮದ ಬಳಿ ತುಂಗಾಭದ್ರಾ ನದಿಗೆ ಸೇರುತ್ತದೆ.

ಈ ಮಾರ್ಗದಲ್ಲಿ ಸಾವಿರಾರು ಹೆಕ್ಟೇರ್ ಪ್ರದೇಶಕ್ಕೆ ನದಿ ವರದಾನವಾಗಿದೆ. ನದಿ ನೀರು ಆಶ್ರಯಿಸಿ ಸಾವಿರಾರು ರೈತರು ಬೆಳೆ ಬೆಳೆಯುತ್ತಿದ್ದಾರೆ.

ಕುಮದ್ವತಿ ನದಿಗೆ ನಾಲ್ಕೈದು ವರ್ಷಗಳ ಹಿಂದೆ ಸಣ್ಣ ನೀರಾವರಿ ಮತ್ತು ಅಂತರ್ಜಲ ಅಭಿವೃದ್ಧಿ ಇಲಾಖೆ 17 ಕೋಟಿ ರೂಪಾಯಿ ವೆಚ್ಚದಲ್ಲಿ ಮಾಸೂರು-ಮೇದೂರು, ಹಿರೇಮೊರಬ-ಚಿಕ್ಕಮೊರಬ, ರಟ್ಟಿಹಳ್ಳಿ-ತೋಟಗಂಟಿ ಮತ್ತು ಸಣ್ಣಗುಬ್ಬಿ-ಮಾದಾಪುರ ಬಳಿ 4 ಸೇತುವೆ ಸಹಿತ ಬಾಂದಾರಗಳನ್ನು ನಿರ್ಮಾಣ ಮಾಡಿದೆ. ಬಾಂದಾರಗಳಿಗೆ ಗೇಟ್ ಅಳವಡಿಸಿ ನದಿಯಲ್ಲಿ ನೀರು ಸಂಗ್ರಹಿಸಿದರೆ, ಬೇಸಿಗೆಯಲ್ಲಿ ಕೃಷಿಗೆ ಹಾಗೂ ಜನ-ಜಾನುವಾರುಗಳಿಗೆ ಕುಡಿಯುವ ನೀರಿನ ಅನುಕೂಲವಾಗುತ್ತದೆ.

ಮುಂಗಾರಿನ ಅವಧಿಯಲ್ಲಿ ಮದಗದ ಕೆರೆ ಭರ್ತಿಯಾದ ನಂತರ ಮೈದುಂಬಿ ಹರಿಯುವ ಕುಮದ್ವತಿ, ಮಳೆಗಾಲ ಮುಗಿಯುತ್ತಿದ್ದಂತೆ ಹರಿವು ಇಳಿಕೆಯಾಗುತ್ತ ಬೇಸಿಗೆ ಹೊತ್ತಿಗೆ ಬರಿದಾಗುತ್ತದೆ. ಆದ್ದರಿಂದ ನವೆಂಬರ್ನಲ್ಲಿ ಮಳೆಗಾಲ ಬಹುತೇಕ ಮುಗಿಯುವುದರಿಂದ ನೀರು ಸಂಗ್ರಹಿಸಲು ಬಾಂದಾರಗಳಿಗೆ ಗೇಟ್ ಅಳವಡಿಸುವುದು ಮುಖ್ಯವಾಗಿರುತ್ತದೆ.

ಪ್ರತಿ ಬಾಂದಾರಗಳಲ್ಲಿ ಅದರ ಅಗಲಕ್ಕನುಗುಣವಾಗಿ ಕಿಂಡಿ(ವೆಂಟರ್)ಗಳಿವೆ. ಈ ಕಿಂಡಿಗಳಿಗೆ ನಾಲ್ಕು ಮೀಟರ್ ಎತ್ತರದ ಗೇಟ್ಗಳನ್ನು ಅಳವಡಿಸಲಾಗುತ್ತದೆ. ಇದರಿಂದ ನೀರು ಹರಿವು ಸ್ಥಗಿತವಾಗಿ ಸಂಗ್ರಹಗೊಳ್ಳುತ್ತದೆ. ಸದ್ಯ ನದಿಯಲ್ಲಿ ಹರಿವು ಇಳಿಮುಖವಾಗಿದ್ದರೂ ಅಧಿಕಾರಿಗಳು ಇನ್ನೂ ಎಚ್ಚೆತ್ತುಕೊಂಡಿಲ್ಲ.

ಕಳೆದ ವರ್ಷ ಗೇಟ್ ಅಳವಡಿಕೆ ವಿಳಂಬವಾದ ಕಾರಣ ಹೆಚ್ಚು ನೀರು ಸಂಗ್ರಹವಾಗಿರಲಿಲ್ಲ. ಹಲವು ಬಾರಿ ಗ್ರಾಮಸ್ಥರು ಪ್ರತಿಭಟನೆ ನಡೆಸಿ, ಗೇಟ್ ಅಳವಡಿಸುವಂತೆ ಅಧಿಕಾರಿಗಳಿಗೆ ಆಗ್ರಹಸಿದ್ದರು. ಈ ವರ್ಷವಾದರೂ ಸಕಾಲದಲ್ಲಿ ಗೇಟ್ ಅಳವಡಿಸಿ, ನೀರನ್ನು ಸಂಗ್ರಹಿಸಬೇಕು ಎಂದು ರೈತ ಸಂಘಟನೆ ತಾಲೂಕು ಅಧ್ಯಕ್ಷ ಶಂಕರಗೌಡ ಶಿರಗಂಬಿ ಮತ್ತು ಮಾಸೂರು ಗ್ರಾಮಸ್ಥ ಮಲ್ಲೇಶಪ್ಪ ಗುತ್ತ್ಯ್ಣವರ ಆಗ್ರಹಿಸಿದ್ದಾರೆ.

ಕಳೆದ ವರ್ಷ ಹಲವು ಬಾರಿ ಪ್ರತಿಭಟನೆ ನಡೆಸಿ, ಮನವಿ ಸಲ್ಲಿಸಿದ ಬಳಿಕ ಸಣ್ಣ ನೀರಾವರಿ ಇಲಾಖೆ ಬಾಂದಾರಗಳಿಗೆ ಗೇಟ್ಗಳನ್ನು ಅಳವಡಿಸಲಾಗಿತ್ತು. ಗೇಟ್ ಅಳವಡಿಕೆ ವಿಳಂಬವಾದ ಕಾರಣ ನದಿಯಲ್ಲಿ ದೊಡ್ಡ ಗುಂಡಿಗಳು ತುಂಬದೇ ಹಾಗೆಯೇ ಉಳಿದುಕೊಂಡವು. ಇದರಿಂದ ಅಂತರ್ಜಲ ಮಟ್ಟ ಕುಸಿದು ಬೇಸಿಗೆಯಲ್ಲಿ ಸಮಸ್ಯೆಯಾಗಿತ್ತು. ಈ ಕೂಡಲೇ ಗೇಟ್ ಅಳವಡಿಸುವ ಕೆಲಸಕ್ಕೆ ಅಧಿಕಾರಿಗಳು ಮುಂದಾಗಬೇಕು. ನದಿ ನೀರು ಸಂಗ್ರಹಿಸಿ ಅಂತರ್ಜಲ ವೃದ್ಧಿಗೆ ಅನುಕೂಲ ಮಾಡಬೇಕು.

| ಕರಬಸಪ್ಪ ಬಸಾಪುರ, ಸಣ್ಣಗುಬ್ಬಿ ಗ್ರಾಮಸ್ಥ.

ಕುಮದ್ವತಿ ನದಿಯ ನಾಲ್ಕು ಬಾಂದಾರಗಳಿಗೆ ವಿಳಂಬ ಮಾಡದೆ ಈ ವಾರದೊಳಗೆ ಗೇಟ್ಗಳನ್ನು ಅಳವಡಿಸಲಾಗುವುದು.

| ಮನೋಹರ ಹಾದಿಮನಿ, ಎಇಇ- ಸಣ್ಣ ನೀರಾವರಿ ಇಲಾಖೆ ಉಪವಿಭಾಗ ಹಾನಗಲ್ಲ.

River