ಮರ್ಮಾಂಗಕ್ಕೆ ಹೊಡೆದು ಕೊಲೆ: ಮೊಟ್ಟೆ ಖರೀದಿಸಿ ಹಣ ವಿಚಾರಕ್ಕೆ ನಾಲ್ವರು ಆರೋಪಿಗಳು ನನ್ನ ಜತೆಗೆ ಜಗಳ ತೆಗೆದಿದ್ದರು. ಆಗ ಸಮೀಪದಲ್ಲೇ ಇದ್ದ ನನ್ನ ತಂದೆ ಶಿವಾಜಿರಾವ್ ಜಗಳ ಬಿಡಿಸಲು ಬಂದರು. ವಜೀರಸಾಬ್ ಮುಲ್ಲಾ ಮತ್ತು ಆತನ ಸಹೋದರರು ನನ್ನ ತಂದೆಯನ್ನು ಮನಸೋ ಇಚ್ಛೆ ಥಳಿಸಿದರು. ಅಲ್ಲದೆ, ಎದೆಗೆ ಕಲ್ಲು ಹಾಕಿ, ಮರ್ಮಾಂಗಕ್ಕೆ ಹೊಡೆದು ಕೊಲೆ ಮಾಡಿದ್ದಾರೆ ಎಂದು ಪುತ್ರ ಭರತ ದೂರಿನಲ್ಲಿ ತಿಳಿಸಿದ್ದಾರೆ.
ಕಠಿಣ ಶಿಕ್ಷೆ ವಿಧಿಸಲು ಒತ್ತಾಯ: ಶಿವಾಜಿರಾವ್ ಅವರ ಶವವನ್ನು ಗುರುವಾರ ಮನೆಗೆ ತರಲಾಯಿತು. ಜಿಲ್ಲಾ ಬಿಜೆಪಿ ಘಟಕ, ವಿಶ್ವ ಹಿಂದೂ ಪರಿಷತ್, ಬಜರಂಗದಳ ಮತ್ತು ಮರಾಠಾ ಸಮಾಜದ ಪದಾಧಿಕಾರಿಗಳು ಮನೆ ಎದುರು ಜಮಾಯಿಸಿ, ಹಲ್ಲೆಕೋರರ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದರು. ಪ್ರಕರಣದ ಆರೋಪಿಗಳು ಪಟ್ಟಣದಲ್ಲಿ ಪದೇಪದೆ ಗಲಾಟೆ ಮಾಡುತ್ತಿದ್ದರು. ಅವರಿಗೆ ಕಠಿಣ ಶಿಕ್ಷೆಗೆ ವಿಧಿಸಬೇಕು. ಕೊಲೆಯಾದ ಶಿವಾಜಿರಾವ್ ಕುಟುಂಬಕ್ಕೆ ಸರ್ಕಾರ ಪರಿಹಾರ ವಿತರಣೆ ಮಾಡಬೇಕು. ಅಲ್ಲಿಯವರೆಗೆ ಅಂತಿಮ ಸಂಸ್ಕಾರ ಮಾಡುವುದಿಲ್ಲ ಎಂದು ಪಟ್ಟು ಹಿಡಿದರು.
ನಂತರ ಆರೋಪಿಗಳನ್ನು ಬಂಧಿಸಿರುವ ಬಗ್ಗೆ ಪೊಲೀಸರು ಮಾಹಿತಿ ನೀಡಿ, ಅಂತಿಮ ಸಂಸ್ಕಾರ ನೆರವೇರಿಸುವಂತೆ ಮನವಿ ಮಾಡಿದರು. ಶಿವಾಜಿರಾವ್ ಅವರ ಹತ್ಯೆ ಮಾಡಿದವರಿಗೆ ಕಠಿಣ ಶಿಕ್ಷೆ ವಿಧಿಸಬೇಕು ಎಂದು ಒತ್ತಾಯಿಸಿ ತಹಸೀಲ್ದಾರ್ ಶ್ವೇತಾ ಅಮರಾವತಿ ಅವರಿಗೆ ತಾಲೂಕು ಮರಾಠಾ ಸಮಾಜದಿಂದ ಮತ್ತು ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಯಶೋಧಾ ವಂಟಗೋಡಿ ಅವರಿಗೆ ವಿಶ್ವ ಹಿಂದೂ ಪರಿಷತ್, ಬಜರಂಗದಳ ವತಿಯಿಂದ ಮನವಿ ಸಲ್ಲಿಸಲಾಯಿತು. ಬಳಿಕ ಶಿವಾಜಿರಾವ್ ಅಂತಿಮ ಸಂಸ್ಕಾರ ನೆರವೇರಿಸಲಾಯಿತು.
ಪದೇಪದೆ ಗಲಾಟೆ ಮಾಡುತ್ತಿದ್ದರು: ಕೇವಲ 100 ರೂಪಾಯಿ ವಿಚಾರಕ್ಕೆ ಗಲಾಟೆ ತೆಗೆದು ನಮ್ಮ ತಂದೆಯನ್ನು ಕಣ್ಣೆದುರೇ ಹಲ್ಲೆ ಮಾಡಿ ಸಾಯಿಸಿಬಿಟ್ಟರು. ಆರೋಪಿಗಳು ಪದೇಪದೆ ಬಂದು ಗಲಾಟೆ ಮಾಡುತ್ತಿದ್ದರು. ಹತ್ಯೆ ಮಾಡಿದವರಿಗೆ ಶಿಕ್ಷೆ ಕೊಡಬೇಕು. ನಮಗೆ ನ್ಯಾಯ ಬೇಕು ಎಂದು ಶಿವಾಜಿರಾವ್ ಭೈರೋಜಿ ಅವರ ಪುತ್ರ ಭರತ ಕಣ್ಣೀರು ಹಾಕಿದರು.
