dirty lake ಮೋತಿ ತಾಲಾಬ್​ ಈಗ "ಕೊಚ್ಚೆ ಕೆರೆ'

ಸವಣೂರು ಸಂಸ್ಥಾನದ ನವಾಬರು ನಗರದ ಅಂತರ್ಜಲ ವೃದ್ಧಿ ಹಾಗೂ ಜನರಿಗೆ ಕುಡಿಯುವ ನೀರು ಪೂರೈಕೆಗಾಗಿ ದೂರದೃಷ್ಟಿಯಿಂದ 198 ಎಕರೆ ವಿಸ್ತಾರದ ಭವ್ಯ ಕೆರೆ ನಿಮಿರ್ಸಿದ್ದರು. ಈ ಕೆರೆಯ ನೀರು ಎಷ್ಟು ಸ್ವಚ್ಛವಾಗಿತ್ತೆಂದರೆ, ಸೂರ್ಯನ ಬೆಳಕಿಗೆ ಮುತ್ತಿನಂತೆ ಹೊಳೆಯುತ್ತಿತ್ತು. ಇದನ್ನು ಕಂಡು ಮನಸೋತ ನವಾಬರು ಅದಕ್ಕೆ ಮೋತಿ ತಾಲಾಬ್​ (ಮುತ್ತಿನ ಕೆರೆ) ಎಂದು ನಾಮಕರಣ ಮಾಡಿದ್ದರು. ಆದರೆ, ಇಂದಿನ ಪುರಸಭೆ ಆಡಳಿತ ನವಾಬರ ದೂರದೃಷ್ಟಿಗೆ ಎಳ್ಳುನಿರು ಬಿಟ್ಟಿದೆ. ಪರಿಣಾಮ ಮೋತಿ ತಾಲಾಬ್​ ಇಂದು ಕೊಚ್ಚೆ ಕೆರೆ ಆಗಿ ಮಾರ್ಪಟ್ಟಿದೆ.

ಈ ಅನಧಿಕೃತ ಬಡಾವಣೆಗಳ ಯೋಜನೆಯಲ್ಲಿ ಕನಿಷ್ಠ ನಾಗರಿಕ ಸೌಲಭ್ಯವು ಇರಲಿಲ್ಲ. ನೂರಾರು ಮನೆಗಳ ಶೌಚಗೃಹಗಳ ಮಲ&ಮೂತ್ರ ಹಾಗೂ ಕಲುಷಿತ ನೀರನ್ನು ನೇರವಾಗಿ ಚರಂಡಿಗಳಿಗೆ ಬಿಡಲಾಯಿತು. ಈ ಚರಂಡಿ ನೀರು ಗದಗ ರಸ್ತೆಯ ಮುಖ್ಯ ಚರಂಡಿ ಸೇರಿ, ಅಲ್ಲಿಂದ ನೇರವಾಗಿ ಮೋತಿ ತಾಲಾಬ್​ ಒಡಲು ಸೇರುತ್ತಿದೆ. ಮುತ್ತಿನಂತಿದ್ದ ನೀರು ಇಂದು ಕಡುಕಪ್ಪು ಬಣ್ಣಕ್ಕೆ ತಿರುಗಿ ನಾರುತ್ತಿದೆ. 

ಕೆರೆಗೆ ಬಟ್ಟೆ ತೊಳೆಯಲು ಹೋಗುವ ಮಹಿಳೆಯರ ಕಾಲುಗಳಿಗೆ ತೀವ್ರ ಸ್ವರೂಪದ ಸೋಂಕು ತಗುಲುತ್ತಿದೆ. ಕೆರೆಯಲ್ಲಿ ಈಜುವ ಯುವಕರಿಗೆ ಚರ್ಮರೋಗ ಬಾಧಿಸುತ್ತಿದೆ. ರೈತರು ಜಾನುವಾರುಗಳಿಗೆ ಕೆರೆ ಆಶ್ರಯಿಸಿದ್ದರು. ಆದರೆ, ನೀರು ಕೆಡುತ್ತಿರುವುದರಿಂದ ಜಾನುವಾರುಗಳಿಗೂ ತೊಂದರೆಯಾಗುತ್ತಿದೆ.

ಸ್ಥಳಿಯ ಪ್ರಜ್ಞಾವಂತ ನಾಗರಿಕರು ಹಾಗೂ ವಿವಿಧ ಸಂಸ್ಥೆಗಳು ಕೆರೆಯ ಪರಿಸ್ಥಿತಿ ಕುರಿತು ತಹಸೀಲ್ದಾರ್​, ಉಪವಿಭಾಗಾಧಿಕಾರಿ ಹಾಗೂ ಪುರಸಭೆಗೆ ಹತ್ತಾರು ಬಾರಿ ಮನವಿ ಸಲ್ಲಿಸಿವೆ. ಆದರೆ, ಹವಾನಿಯಂತ್ರಿತ ಕೊಠಡಿಗಳಲ್ಲಿ ಕೂರುವ ಅಧಿಕಾರಿಗಳಿಗೆ ಸಾರ್ವಜನಿಕರ ಅಳಲು ಕೇಳಿಸುತ್ತಿಲ್ಲ ಎಂದು ನಾಗರಿಕರು ಆಕ್ರೋಶ ವ್ಯಕ್ತಪಡಿಸುತ್ತಾರೆ.

"

ಕೆರೆಗೆ ಬರುತ್ತಿರುವ ಕೊಳಚೆ ನೀರು ತಡೆಯಲು ಕ್ರಿಯಾ ಯೋಜನೆ ಮಾಡಲಾಗಿದೆ. ವಿಶೇಷ ಅನುದಾನದಲ್ಲಿ ಕಾಮಗಾರಿ ಕೈಗೊಳ್ಳಲು ಜನಪ್ರತಿನಿಧಿಗಳು ಸಂಬಂಧಪಟ್ಟ ಇಲಾಖೆಗೆ ಸೂಚಿಸಿದ್ದಾರೆ. ಕೂಡಲೇ ಕಾಮಗಾರಿ ಆರಂಭಿಸಲಾಗುವುದು.

ಮಹೇಶ ನಿಡಶೇಶಿ, ಪುರಸಭೆ ಮುಖ್ಯಾಧಿಕಾರಿ ಸವಣೂರು.