ಗ್ರಾಮಸ್ಥರ ಸಮಸ್ಯೆಗೆ ತ್ವರಿತವಾಗಿ ಸ್ಪಂದಿಸಿ; ಪಿಡಿಒಗಳಿಗೆ ಜಿಪಂ ಸಿಇಒ ದಲ್ಜೀತ್‌ಕುಮಾರ ಖಡಕ್ ಸೂಚನೆ; ಸಭೆಗೆ ಗೈರಾದ ಅಧಿಕಾರಿಗಳಿಗೆ ನೋಟೀಸ್

ಸಭೆಯ ಆರಂಭದಲ್ಲೇ ಹಲವು ಆಡಳಿತಾಧಿಕಾರಿಗಳು ಗೈರಾಗಿರುವುದನ್ನು ಗಮನಿಸಿದ ಅವರು, ಗೈರಾದವರಿಗೆ ತಕ್ಷಣವೇ ನೋಟಿಸ್ ಜಾರಿ ಮಾಡಲು ಅಧಿಕಾರಿಗಳಿಗೆ ಸೂಚಿಸಿದರು. ಸರ್ಕಾರಿ ಕರ್ತವ್ಯಗಳ ನಿರ್ವಹಣೆಯಲ್ಲಿ ಶಿಸ್ತು ಮತ್ತು ಹೊಣೆಗಾರಿಕೆ ಅತ್ಯಂತ ಮುಖ್ಯವಾಗಿದ್ದು, ಸಭೆಗಳಿಗೆ ಗೈರಾಗುವುದನ್ನು ಗಂಭೀರವಾಗಿ ಪರಿಗಣಿಸಲಾಗುವುದು ಎಂದು ಎಚ್ಚರಿಕೆ ನೀಡಿದರು.

ಪಂಚಾಯಿತಿ ಕಚೇರಿಯ ಆಡಳಿತ ನಿರ್ವಹಣೆ, ಕಡತ, ದಾಖಲೆ ಮತ್ತು ನೋಂದಣಿ ಪುಸ್ತಕಗಳ ಸಂರಕ್ಷಣೆ, ಸಭಾ ಕಾರ್ಯಸೂಚಿ ಸಿದ್ಧತೆ ಮತ್ತು ನಿರ್ಣಯ ಜಾರಿ, ಸರ್ಕಾರದ ಆದೇಶ ಮತ್ತು ಸುತ್ತೋಲೆಗಳ ಅನುಷ್ಠಾನ, ಪಂಚಾಯಿತಿ ಅಸ್ತಿ ದಾಖಲೆಗಳ ನಿರ್ವಹಣೆ, ಗ್ರಾಮಸಭೆ ಸಭೆಗಳ ಆಯೋಜನೆ, ಸಾರ್ವಜನಿಕ ಅಹವಾಲು ಮತ್ತು ಸಲಹೆಗಳ ಸ್ವೀಕಾರ, ಗ್ರಾಮಸಭೆ ನಿರ್ಣಯಗಳ ಜಾರಿ, ಸಮಿತಿಗಳ ಕಾರ್ಯಗಳಿಗೆ ಸಹಕಾರ ನೀಡಬೇಕು ಎಂದರು.

ಬ್ಯಾಂಕ್ ಖಾತೆ ನಿರ್ವಹಣೆ, ತೆರಿಗೆ ಮತ್ತು ಶುಲ್ಕ ವಸೂಲಿ, ಆದಾಯ-ವೆಚ್ಚ ಲೆಕ್ಕಪತ್ರ ಮತ್ತು ಬಜೆಟ್ ತಯಾರಿ, ಅನುದಾನ ಬಳಕೆ ಮತ್ತು ಆಡಿಟ್ ಅನುಸರಣೆ, ರಸ್ತೆ, ನೀರು, ಚರಂಡಿ, ಬೀದಿದೀಪ ಕಾಮಗಾರಿಗಳ ಮೇಲ್ವಿಚಾರಣೆ, ಕಾಮಗಾರಿಗಳ ಗುಣಮಟ್ಟ ಪರಿಶೀಲನೆ, ಪ್ರಗತಿ ವರದಿ ಸಲ್ಲಿಕೆ, ನರೇಗಾ ಯೋಜನೆಯ ಜಾಬ್ ಕಾರ್ಡ್ ವಿತರಣೆ, ಕೆಲಸ ಒದಗಿಸುವುದು, ಮತ್ತು ಮಸ್ಟರ್ ರೋಲ್ ನಿರ್ವಹಣೆ, ಕೂಲಿ ಪಾವತಿ ಮೇಲ್ವಿಚಾರಣೆ, ಸಾಮಾಜಿಕ ಲೆಕ್ಕಪರಿಶೋಧನೆಗೆ ದಾಖಲೆ ಒದಗಿಸುವುದು, ಗ್ರಾಮ ಸ್ವಚ್ಛತಾ ಕಾರ್ಯಕ್ರಮ ಜಾರಿ, ಕಸದ ವಿಲೇವಾರಿ ಮತ್ತು ಕುಡಿಯುವ ನೀರಿನ ಸ್ವಚ್ಛತೆ, ಆರೋಗ್ಯ ಕುರಿತು ವಿವಿಧ ಇಲಾಖೆಯೊಂದಿಗೆ ಸಮನ್ವಯ ಸಾಧಿಸಿ, ಸಾರ್ವಜನಿಕರಿಗೆ ಅನುಕೂಲ ಮಾಡಿಕೊಡಬೇಕು ಎಂದರು.

ವಸತಿ, ಪಿಂಚಣಿ, ಸ್ವಚ್ಛ ಭಾರತ್, ಜಲ ಜೀವನ್ ಮಿಷನ್ ಯೋಜನೆಗಳ ಜಾರಿ, ಮಹಿಳಾ, ಮಕ್ಕಳ ಮತ್ತು ರೈತರ ಕಲ್ಯಾಣ ಯೋಜನೆ ಅನುಷ್ಠಾನ, ಚುನಾವಣೆ ಮತ್ತು ಸಮೀಕ್ಷೆಯಡಿ ಮತದಾರರ ಪಟ್ಟಿ ಪರಿಷ್ಕರಣೆ ಸಹಕಾರ, ಚುನಾವಣಾ ಕರ್ತವ್ಯ ನಿರ್ವಹಣೆ, ಜನಗಣತಿ ಮತ್ತು ಸಮೀಕ್ಷಾ ಕಾರ್ಯಗಳಲ್ಲಿ ಸಹಾಯ ಹಾಗೂ ಪಂಚಾಯತ್ ರಾಜ್ ಅಧಿನಿಯಮ ಪಾಲನೆ, ಆರ್‌ಟಿಐ ಮಾಹಿತಿ, ಅಕ್ರಮ ನಿರ್ಮಾಣಗಳ ವಿರುದ್ಧ ಕ್ರಮ, ತನಿಖೆ ಮತ್ತು ಪರಿಶೀಲನೆಗೆ ದಾಖಲೆ ಸಲ್ಲಿಕೆ, ವಿಪತ್ತು ನಿರ್ವಹಣೆಯಡಿ ನೆರೆ, ಬರ, ಸಾಂಕ್ರಾಮಿಕ ಸಂದರ್ಭಗಳಲ್ಲಿ ತುರ್ತು ಕಾರ್ಯಾಚರಣೆ, ಪರಿಹಾರ ಕಾರ್ಯಗಳ ಸಮನ್ವಯ ಹಾಗೂ ಹಾನಿ ವರದಿ ಸಲ್ಲಿಕೆ ಅತ್ಯಂತ ಜವಾಬ್ದಾರಿಯಿಂದ ಮಾಡಬೇಕು ಎಂದು ನಿರ್ದೇಶಿಸಿದರು.

ಜಿಲ್ಲಾ ಕೇಂದ್ರದಿಂದ ಗ್ರಾಮ ಪಂಚಾಯಿತಿಗಳ ಕಾರ್ಯವೈಖರಿ ಕುರಿತು ನಿಯಮಿತವಾಗಿ ಪ್ರಗತಿ ಪರಿಶೀಲನಾ ಸಭೆಗಳನ್ನು ನಡೆಸಲಾಗುವುದು. ಸರ್ಕಾರದ ಯೋಜನೆಗಳನ್ನು ಪರಿಣಾಮಕಾರಿಯಾಗಿ ಜಾರಿಗೆ ತಂದು ಗ್ರಾಮೀಣ ಜನರಿಗೆ ಉತ್ತಮ ಸೇವೆ ಒದಗಿಸುವುದು ಪ್ರತಿಯೊಬ್ಬ ಅಧಿಕಾರಿಯ ಜವಾಬ್ದಾರಿಯಾಗಿದೆ ಎಂದು ತಿಳಿಸಿದರು.

ಸಭೆಯಲ್ಲಿ ಜಿ.ಪಂ. ಉಪಕಾರ್ಯದರ್ಶಿ ಡಾ.ಪುನಿತ್ ಬಿ.ಆರ್., ಇತರರು ಉಪಸ್ಥಿತರಿದ್ದರು.

ಇ-ಸ್ವತ್ತು, ಪಂಚತಂತ್ರ, ಸೇವಾಸಿಂಧು ಬಳಕೆ, ಆನ್‌ಲೈನ್ ದಾಖಲೆ ನಿರ್ವಹಣೆ, ಡಿಬಿಟಿ ಮತ್ತು ಎಫ್‌ಎಫ್‌ಎಂಎಸ್ ಅನುಸರಣೆ ಜತೆಗೆ ಗ್ರಾಮ ಪಂಚಾಯಿತಿಯನ್ನು ಪಾರದರ್ಶಕ, ಜನಪರ ಆಡಳಿತ ಮತ್ತು ಅಭಿವೃದ್ಧಿಪಡಿಸಿವುದು ಮುಖ್ಯ ಉದ್ದೇಶವಾಗಬೇಕು ಎಂದು ಸಿಇಒ ಸೂಚಿಸಿದರು.

ಪ್ರತಿ ಆಡಳಿತಾಧಿಕಾರಿ ತಮಗೆ ವಹಿಸಿರುವ ಗ್ರಾಮ ಪಂಚಾಯಿತಿಗಳಿಗೆ ನಿಯಮಿತವಾಗಿ ಭೇಟಿ ನೀಡಬೇಕು. ವಿಶೇಷವಾಗಿ ಪ್ರತಿ ಮಂಗಳವಾರ ಹಾಗೂ ಗುರುವಾರ ಕಡ್ಡಾಯವಾಗಿ ಗ್ರಾಮ ಪಂಚಾಯಿತಿಗಳಿಗೆ ಭೇಟಿ ನೀಡಿ, ಕುಂದುಕೊರತೆ ಸಭೆ ನಡೆಸಬೇಕು. ಸಭೆಯ ಕುರಿತು ಗ್ರಾಮಸ್ಥರಿಗೆ ಮುಂಚಿತವಾಗಿ ಡಂಗೂರ ಮತ್ತು ಇತರೆ ಜಾಗೃತಿ ವಿಧಾನಗಳ ಮೂಲಕ ಮಾಹಿತಿ ನೀಡಬೇಕು ಎಂದು ಸಿಇಒ ತಿಳಿಸಿದರು.