ಸರ್ಕಾರದಿಂದ ‘ರಿಕವರಿ ಲ್ಯಾಬ್’ ಆರಂಭಿಸಿ; ಸಕ್ಕರೆ ಕಾರ್ಖಾನೆಯಲ್ಲಿ ಕಬ್ಬಿನ ಇಳುವರಿಯಲ್ಲಿನ ಮೋಸ ತಡೆಗಟ್ಟಿ; ಜಿಲ್ಲೆಯ ಕಬ್ಬು ಬೆಳೆಗಾರರ ಆಗ್ರಹ

ಯಾಲಕ್ಕಿ ನಾಡು ಹಾವೇರಿ ಜಿಲ್ಲೆಯಲ್ಲಿ ಮೂರು ಸಕ್ಕರೆ ಕಾರ್ಖಾನೆಗಳಿದ್ದು, ಸಕ್ಕರೆ ಇಳುವರಿ ಪ್ರಮಾಣ (ರಿಕವರಿ) ಕಡಿಮೆ ತೋರಿಸುತ್ತಿರುವ ಕಾರಣ ಇಲ್ಲಿನ ರೈತರಿಗೆ ನ್ಯಾಯಯುತ ಬೆಲೆ ಸಿಗುತ್ತಿಲ್ಲ. ಹಾಗಾಗಿ, ರಾಜ್ಯ ಸರ್ಕಾರದಿಂದಲೇ ಸಕ್ಕರೆ ಕಾರ್ಖಾನೆಯಲ್ಲಿ ಪ್ರತ್ಯೇಕ ರಿಕವರಿ ಲ್ಯಾಬ್ ಆರಂಭಿಸಬೇಕು ಎಂಬ ಕೂಗು ರೈತ ವಲಯದಿಂದ ಕೇಳಿ ಬಂದಿದೆ.

ಜಿಲ್ಲೆಯಲ್ಲಿ ಹಾವೇರಿ ತಾಲೂಕಿನ ಸಂಗೂರ ಗ್ರಾಮದ ಜಿಎಂ ಶುಗರ್ಸ್‌, ರಟ್ಟಿಹಳ್ಳಿ ತಾಲೂಕು ಬೈರನಪಾದದ ಜಿಎಂ ಶುಗರ್ಸ್‌ ಹಾಗೂ ಶಿಗ್ಗಾಂವಿ ತಾಲೂಕಿನ ಕೋಣನಕೆರೆಯ ವಿಐಎನ್‌ಪಿ ಶುಗರ್ಸ್‌ ಕಾರ್ಯ ನಿರ್ವಹಿಸುತ್ತಿವೆ. ರಿಕವರಿ ಕಡಿಮೆಯಾದ ಹಿನ್ನೆಲೆಯಲ್ಲಿ ಇಲ್ಲಿನ ರೈತರಿಗೆ ಪ್ರತಿ ಟನ್ ಕಬ್ಬಿಗೆ ಕಡಿಮೆ ದರ ಸಿಗುತ್ತಿದೆ. ರಿಕವರಿ ಕಡಿಮೆ ತೋರಿಸಿ ಕಾರ್ಖಾನೆಯವರು ವಂಚಿಸುತ್ತಿದ್ದಾರೆ ಎಂಬ ಆರೋಪಗಳು ಕೇಳಿಬಂದಿವೆ.

ನಿರ್ದಿಷ್ಟ ಪ್ರಮಾಣದ ಕಬ್ಬನ್ನು ಕಾರ್ಖಾನೆಯಲ್ಲಿ ಅರೆದಾಗ ದೊರೆಯುವ ಶೇಕಡಾವಾರು ಸಕ್ಕರೆ ಪ್ರಮಾಣವನ್ನು ರಿಕವರಿ ಎಂದು ಕರೆಯಲಾಗುತ್ತದೆ. ಆಯಾ ಸಕ್ಕರೆ ಕಾರ್ಖಾನೆಯಲ್ಲಿದೇ ರಿಕವರಿ ಲ್ಯಾಬ್ ಇರುತ್ತದೆ. ಅವರೇ ರೈತರ ಕಬ್ಬಿನ ರಿಕವರಿಯನ್ನು ಅಳೆದು ಘೋಷಿಸುತ್ತಾರೆ. ಈ ಹಿಂದೆ ಎರಡು ದಶಕಗಳ ಹಿಂದೆ ಸಂಗೂರ ಸಕ್ಕರೆ ಕಾರ್ಖಾನೆ ಸಹಕಾರಿ ಸಂಘದ ವ್ಯಾಪ್ತಿಗೆ ಒಳಪಟ್ಟಿತ್ತು. ಆಗ ರಿಕವರಿ ಪ್ರಮಾಣ ಶೇ.10ಕ್ಕಿಂತ ಹೆಚ್ಚಾಗಿತ್ತು. ಈಗ ಶೇ.9ಕ್ಕಿಂತ ಕಡಿಮೆ ತೋರಿಸಲಾಗುತ್ತಿದೆ. ಹಲವೆಡೆ ಶೇ.9.4, 9.6 ತೋರಿಸುತ್ತಿದೆ. ಈ ವ್ಯತ್ಯಾಸ ಯಾಕೆ ಆಗಿದೆ ಎಂಬ ಪ್ರಶ್ನೆ ಉದ್ಭವವಾಗಿದೆ.

ಮಣ್ಣು, ನೀರು, ಹವಾಮಾನ ಮತ್ತು ಕಬ್ಬು ಕಟಾವಿನ ಅವಧಿ ಆಧರಿಸಿ ರಿಕವರಿ ಪ್ರಮಾಣದಲ್ಲಿ ವ್ಯತ್ಯಾಸ ಉಂಟಾಗುತ್ತದೆ. ಹಿಂದಿಗಿಂತ ಯಾವುದೇ ವ್ಯತ್ಯಾಸ ಕಾಣದಿದ್ದರೂ ರಿಕವರಿಯಲ್ಲಿ ಇಳಿಮುಖ ಆಗುತ್ತಿರುವುದು ರೈತರ ನಿದ್ದೆಗೆಡಿಸಿದೆ. ಈ ಬಗ್ಗೆ ಸರ್ಕಾರ ಜವಾಬ್ದಾರಿಯಿಂದ ವರ್ತಿಸಬೇಕು. ಇಷ್ಟು ವರ್ಷಗಳ ಕಾಲ ರಿಕವರಿಯಲ್ಲಿ ಆದ ವಂಚನೆಯ ವಿರುದ್ಧ ಕ್ರಮ ಜರುಗಿಸಬೇಕು. ಕೂಡಲೇ ಸರ್ಕಾರದಿಂದ ಸಕ್ಕರೆ ಕಾರ್ಖಾನೆಗಳಲ್ಲಿ ಕಬ್ಬಿನ ಇಳುವರಿಗಾಗಿ ಪ್ರತ್ಯೇಕ ಪ್ರಯೋಗಾಲಯ ಸ್ಥಾಪಿಸಬೇಕು ಎಂಬ ಆಗ್ರಹ ರೈತರಿಂದ ಕೇಳಿ ಬಂದಿದೆ.

ಜಿಲ್ಲೆಯಲ್ಲಿ ಪ್ರಸಕ್ತ ವರ್ಷ 7 ಸಾವಿರ ಹೆಕ್ಟೇರ್ ಕಬ್ಬು ಬೆಳೆಯಲಾಗಿದೆ. ಪ್ರತಿ ವರ್ಷ ಅಂದಾಜು 15 ಲಕ್ಷ ಟನ್ ಕಬ್ಬು ಬೆಳೆಯಲಾಗುತ್ತದೆ. ರಿಕವರಿ ಆಧಾರದಲ್ಲಿ ಕಬ್ಬಿನ ದರ ನಿಗದಿಯಾಗುತ್ತದೆ. ರಿಕವರಿ ಪ್ರಮಾಣ ಶೇ.11ಕ್ಕಿಂತ ಹೆಚ್ಚಿದ್ದರೆ ಪ್ರತಿ ಟನ್ ಕಬ್ಬಿಗೆ 3,300 ರೂ. ಮತ್ತು ಶೇ.10.78 ಇದ್ದರೆ ಪ್ರತಿ ಟನ್‌ಗೆ 3,200 ರೂ. ದೊರೆಯುತ್ತದೆ. ಕಳೆದ ವಾರದ ಕಬ್ಬು ಬೆಳೆಗಾರರ ಹೋರಾಟದಿಂದಾಗಿ ಜಿಲ್ಲೆಯಲ್ಲಿ ಪ್ರಸ್ತುತ 2,850 ಹಾಗೂ 2,750 ರೂ. ರೂ. ಪ್ರತಿ ಟನ್ ಕಬ್ಬಿ ಬೆಲೆ ನಿಗದಿಪಡಿಸಲಾಗಿದೆ.

ಸಕ್ಕರೆ ಕಾರ್ಖಾನೆಗಳಲ್ಲಿ ತೂಕದಲ್ಲೂ ಮೋಸ ಆಗುತ್ತಿರುವ ಕುರಿತು ಮೇಲಿಂದ ಮೇಲೆ ಆರೋಪಗಳು ಕೇಳಿ ಬರುತ್ತಿವೆ. ಹಾಗಾಗಿ, ಕಾರ್ಖಾನೆ ಆವರಣದಲ್ಲಿ ಅಥವಾ ಸಮೀಪದಲ್ಲಿ ತೂಕದ ಯಂತ್ರ (ವೇ ಬ್ರಿಜ್) ಸ್ಥಾಪಿಸಬೇಕು ಎಂಬುದು ಕಬ್ಬು ಬೆಳೆಗಾರರ ಒತ್ತಾಯವಾಗಿದೆ.

1990-91 10.78

1991-92 10.82

1992-93 10.46

1993-94 10.27

1994-95 9.46

1995-96 9.01

1996-97 10.56

1997-98 10.18

1998-99 10.03

1999-2000 10.31

2000-2001 10.15

2001-2002 10.18

ಸಕ್ಕರೆ ಕಾರ್ಖಾನೆಗಳು ರೈತರಿಗೆ ಕಬ್ಬಿನ ಇಳುವರಿಯಲ್ಲಿ ಹಾಗೂ ತೂಕದಲ್ಲಿ ಮೋಸ ಮಾಡುತ್ತಿರುವ ಬಗ್ಗೆ ರಾಜ್ಯ ಕಬ್ಬು ಬೆಳೆಗಾರರ ಸಂಘದ ಜಿಲ್ಲಾಧ್ಯಕ್ಷ ಭುವನೇಶ್ವರ ಶಿಡ್ಲಾಪುರ ಜಿಲ್ಲಾ ಉಸ್ತುವಾರಿ ಸಚಿವರೂ ಆಗಿರುವ ಸಕ್ಕರೆ ಸಚಿವ ಶಿವಾನಂದ ಪಾಟೀಲರಿಗೆ ಪತ್ರ ಬರೆದಿದ್ದರು. ಈ ಕುರಿತು ಮತ್ತೊಂದು ಪತ್ರ ಬರೆದಿರುವ ಸಚಿವರು, ಹಾವೇರಿ ತಾಲೂಕು ಸಂಗೂರ ಸಕ್ಕರೆ ಕಾರ್ಖಾನೆ ಆವರಣದಲ್ಲಿ ಕಬ್ಬು ಬೆಳೆಗಾರರ ಅನುಕೂಲಕ್ಕಾಗಿ ಸರ್ಕಾರದ ವತಿಯಿಂದ ಒಂದು ರಿಕವರಿ ಲ್ಯಾಬ್ ತೂಕದ ಯಂತ್ರ ಅಳವಡಿಸುವ ಕುರಿತು ಪರಿಶೀಲಿಸಿ ಅಗತ್ಯ ಕ್ರಮ ತೆಗೆದುಕೊಳ್ಳುವಂತೆ ಕಬ್ಬು ಅಭಿವೃದ್ಧಿ ಮತ್ತು ಸಕ್ಕರೆ ನಿರ್ದೇಶನಾಲಯದ ಆಯುಕ್ತರಿಗೆ ಸೂಚಿಸಿದ್ದಾರೆ.