ಡಕಾಯಿತಿ ಕೇಸ್‌ನಲ್ಲಿ ಕಾನ್‌ಸ್ಟೆಬಲ್ ಬಂಧನ !; ಕಳ್ಳರಿಗೆ ಮನೆ ತೋರಿಸಿದ್ದ ಪೊಲೀಸ್ ಪ್ರದೀಪ ನಾಯಕ ವಿರುದ್ಧ ಶಿಸ್ತು ಕ್ರಮ; ಎಸ್‌ಪಿ ಯಶೋಧಾ ವಂಟಗೋಡಿ

ನಗರದ ಜಿಲ್ಲಾ ಪೊಲೀಸ್ ಅಧೀಕ್ಷಕರ ಕಚೇರಿಯಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕಳ್ಳತನ ನಡೆಸಿದ ಆರೋಪಿತರಾದ ಬ್ಯಾಡಗಿ ತಾಲೂಕು ಶಿಡೇನೂರ ಗ್ರಾಮದ ಮಲ್ಲೇಶಪ್ಪ ವೆಂಕಪ್ಪ ನಾಯ್ಕ, ಬಾಗಲಕೋಟೆ ಬದಾಮಿ ತಾಲೂಕು ಕೆರೂರ ಗ್ರಾಮದ ಕಾಂತೇಶ ಮುತ್ತಪ್ಪ ವಡ್ಡರ, ಬೆಳಗಾವಿ ಜಿಲ್ಲೆ ಬೈಲಹೊಂಗಲ ಬೆಳವಡಿಯ ಅಜೇಯ ಹನುಮಂತ ಸಾಲಹಳ್ಳಿ, ನಾಗರಾಜ ಹನುಮಂತ ವಡ್ಡರ ಹಾಗೂ ಸಹಕರಿಸಿದ ಆರೋಪಿ ಡಿಆರ್ ಪೊಲೀಸ್ ಕಾನ್‌ಸ್ಟೆಬಲ್, ಹಿರೇಕೆರೂರ ತಾಲೂಕು ಮುದ್ದಿನಕೊಪ್ಪ ನಿವಾಸಿ ಪ್ರದೀಪ ಹನುಮಂತಪ್ಪ ನಾಯ್ಕ (37)ನನ್ನು ಬಂಧಿಸಲಾಗಿದೆ ಎಂದು ವಿವರಿಸಿದರು.

ಪೊಲೀಸ್ ಇಲಾಖೆಗೆ ಮುಜುಗರ ತರುವ ಕೆಲಸದಲ್ಲಿ ಸಿಬ್ಬಂದಿ ಭಾಗಿಯಾಗಿದ್ದು, ಈತನನ್ನು ಕೆಲಸದಿಂದ ಅಮಾನತು ಮಾಡಿ, ಇಲಾಖೆ ಮಟ್ಟದಲ್ಲಿ ತನಿಖೆ ಮಾಡಲಾಗುವುದು. ನಿರ್ದಾಕ್ಷಿೃಣ್ಯ ಕ್ರಮ ಜರುಗಿಸಲಾಗುವುದು. ಈತ 2008ರ ಬ್ಯಾಚ್ ಸಿಬ್ಬಂದಿಯಾಗಿದ್ದು, ನಾಲ್ಕು ವರ್ಷ ಹಿರೇಕೆರೂರ ಸಿಪಿಐ ಚಾಲಕನಾಗಿದ್ದ. ಇತ್ತೀಚೆಗೆ ಹಾವೇರಿ ಡಿಆರ್ ವಿಭಾಗದಲ್ಲಿದ್ದ. ಯಾಕೆ ಇಂತಹ ಕೃತ್ಯ ಎಸಗಿದ ? ಆರೋಪಿತರೊಂದಿಗೆ ಹೇಗೆ ಸಂಬಂಧ ಬೆಳೆಯಿತು ? ಎಂಬಿತ್ಯಾದಿ ಕುರಿತು ತನಿಖೆ ನಡೆಸಲಾಗುತ್ತಿದೆ ಎಂದು ತಿಳಿಸಿದರು.

ಆರೋಪಿತರಿಂದ 52 ಸಾವಿರ ನಗದು, 7.71 ಗ್ರಾಂ ಚಿನ್ನ, ಕೃತ್ಯಕ್ಕೆ ಬಳಸಿದ್ದ ಬೈಕ್ ಸೇರಿ ಇತರ ವಸ್ತುಗಳನ್ನು ವಶಪಡಿಸಿಕೊಳ್ಳಲಾಗಿದೆ. ರೋಪಿತರು ಚಿನ್ನವನ್ನು ಫೈನಾನ್ಸ್ ಒಂದರಲ್ಲಿ ಒತ್ತೆ ಇಟ್ಟು ಹಣ ಸಾಲ ಪಡೆದಿದ್ದರು ಎಂದು ತಿಳಿಸಿದರು.

ಸುದ್ದಿಗೋಷ್ಠಿಯಲ್ಲಿ ಹೆಚ್ಚುವರಿ ಎಸ್‌ಪಿ ಲಕ್ಷ್ಮಣ ಶಿರಕೋಳ, ರಾಣೆಬೆನ್ನೂರ ಡಿವೈಎಸ್‌ಪಿ ಲೋಕೇಶ ಇದ್ದರು.

ಜ.19ರಂದು ರಾತ್ರಿ ಹಿರೇಕೆರೂರ ತಾಲೂಕು ನಿಡನೇಗಿಲು ಗ್ರಾಮದ ಮಲ್ಲನಗೌಡ ಪಾಟೀಲ ಎಂಬುವರ ಮನೆಯ ಹಿಂಬಾಗಿಲು ಮುರಿದು ಐವರು ಡಕಾಯಿತರು ಮಂಕಿ ಕ್ಯಾಪ್ ಹಾಕಿಕೊಂಡು ನುಗ್ಗಿದ್ದರು. ಮನೆಯಲ್ಲಿದ್ದ ಐವರಿಗೆ ಚಾಕು ತೋರಿಸಿ ಬೆದರಿಸಿ, 5 ಲಕ್ಷ ರೂ. ನಗದು, 40 ಗ್ರಾಂ ಚಿನ್ನಾಭರಣ, 244 ಗ್ರಾಂ ಬೆಳ್ಳಿ ದೋಚಿ ಪರಾರಿಯಾಗಿದ್ದರು. ಈ ಕುರಿತು ಹಿರೇಕೆರೂರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಾಗಿತ್ತು.

ರಾಣೆಬೆನ್ನೂರ ಡಿವೈಎಸ್‌ಪಿ ಲೋಕೇಶ ನೇತೃತ್ವದಲ್ಲಿ 4 ವಿಶೇಷ ತಂಡ ರಚಿಸಿ ಆರೋಪಿಗಳನ್ನು ಬಂಧಿಸಲಾಗಿತ್ತು. ಬಂಧಿತ ಆರೋಪಿಗಳ ವಿಚಾರಣೆ ವೇಳೆ ಕಾನ್‌ಸ್ಟೆಬಲ್ ಪ್ರದೀಪ ನಾಯ್ಕ ಇದೇ ಮನೆಯಲ್ಲಿ ಕಳ್ಳತನ ಮಾಡುವಂತೆ ಸಹಕರಿಸಿದ್ದರು ಎಂದು ಮಾಹಿತಿ ನೀಡಿದ್ದರು. ಈ ಕುರಿತು ಪರಿಶೀಲನೆ ನಡೆಸಿ, ಆರೋಪಿ ಕಾನ್‌ಸ್ಟೆಬಲ್ ಪ್ರದೀಪನನ್ನು ಬಂಧಿಸಲಾಗಿದೆ ಎಂದು ಎಸ್‌ಪಿ ಯಶೋಧಾ ತಿಳಿಸಿದರು.