ಸಂಘದ ಜಿಲ್ಲಾ ಪ್ರಧಾನ ಕಾರ್ಯದರ್ಶಿ ಮಲ್ಲಿಕಾರ್ಜುನ ಬಳ್ಳಾರಿ ಮಾತನಾಡಿ, ಮೆಕ್ಕೆಜೋಳದಿಂದ ಎಥೆನಾಲ್ ಸಿದ್ಧಪಡಿಸಲಾಗುತ್ತಿದೆ. ದೇಶದಲ್ಲಿ 782 ಎಥೆನಾಲ್ ಫ್ಯಾಕ್ಟರಿಗಳಿವೆ. ಮಾಜಿ, ಹಾಲಿ ಶಾಸಕರ ಕಪಿಮುಷ್ಟಿಯಲ್ಲಿ ಎಥೆನಾಲ್ ಫ್ಯಾಕ್ಟರಿಗಳು ಸಿಲುಕಿವೆ. ಫ್ಯಾಕ್ಟರಿಗಳು ದರ ಕಡಿಮೆ ಮಾಡಿದ್ದರಿಂದ ಈ ಪರಿಸ್ಥಿತಿ ಬಂದಿದೆ. ನಮ್ಮ ಜಿಲ್ಲೆಯ ಫ್ಯಾಕ್ಟರಿಗಳು 1,7,00 ಹಾಗೂ 1,800 ರೂ.ಗೆ ಖರೀದಿಸುತ್ತಿವೆ. ಹಾಗಾಗಿ, ದಲ್ಲಾಳಿಗಳು ರೈತರಿಂದ 1,400ರಿಂದ 1,500 ರೂ.ಗೆ ಖರೀದಿಸುತ್ತಿದ್ದಾರೆ. ಇತ್ತೀಚೆಗೆ ಕುಲಾಂತರಿ ತಳಿಗಳು ಹೆಚ್ಚು ಇಳುವರಿ ಕೊಡುತ್ತಿವೆ. ಎಕರೆಗೆ 10 ಚೀಲ ಬೆಳೆಯುವಲ್ಲಿ 20, 30 ಚೀಲ ಬೆಳೆಯಲಾಗುತ್ತಿದೆ. ಇದರಿಂದ ದರ ಕಡಮೆ ಆಗುತ್ತದೆ. ಇದಕ್ಕೆ ವಿದೇಶದಿಂದ ಕುಲಾಂತರಿ ತಳಿ ಆಮದು ಮಾಡಲು ಕೇಂದ್ರ ಸರ್ಕಾರ ಸಹಿ ಹಾಕುತ್ತಿದ್ದು, ಇದಕ್ಕೆ ನಮ್ಮ ವಿರೋಧವಿದೆ. ಕೇಂದ್ರ ಹಾಗೂ ರಾಜ್ಯ ಸರ್ಕಾರಗಳು ಪರಸ್ಪರ ಆರೋಪ ಪ್ರತ್ಯಾರೋಪ ಮಾಡುತ್ತ ಕಾಲಹರಣ ಮಾಡುವುದನ್ನು ಬಿಟ್ಟು ರೈತರ ನೆರವಿಗೆ ಧಾವಿಸಬೇಕು ಎಂದರು.
