ಪ್ರೊ.ಜಿ.ಬಿ.ಕಲಕೋಟಿ ಸಾಮಾಜಿಕ ಸೇವೆ ಮಾದರಿ; ಕೊರಡೂರ ಗ್ರಾಮದ ಶ್ರದ್ದಾಂಜಲಿ ಸಮಾರಂಭದಲ್ಲಿ ಗುದ್ದಲೀ ಶಿವಯೋಗಿಶ್ವರ ಸ್ವಾಮೀಜಿ ಹೇಳಿಕೆ

ತಾಲೂಕಿನ ಕೊರಡೂರು ಗ್ರಾಮದಲ್ಲಿ ಶನಿವಾರ ಆಯೋಜಿಸಿದ್ದ ದಿ.ಪ್ರೊ.ಜಿ.ಬಿ.ಕಲಕೋಟಿ ಅವರ ನುಡಿನಮನ ಕಾರ್ಯಕ್ರಮದಲ್ಲಿ ಭಾಗವಹಿಸಿ ಮಾತನಾಡಿದ ಅವರು, ಆಶ್ರಯ ಕೇಳಿ ಬಂದವರಿಗೆ ಕಲಕೋಟಿ ಸಹಾಯ ಹಸ್ತ ಚಾಚುತ್ತಿದ್ದರು. ಹುಬ್ಬಳ್ಳಿಯಲ್ಲಿ ಉಪನ್ಯಾಸಕರಾಗಿ, ನಿವೃತ್ತರಾಗಿದ್ದ ಅವರು ಈ ಭಾಗದ ಜನರ ಕಷ್ಟಗಳಿಗೆ ಸದಾ ಸ್ಪಂದಿಸುತ್ತಿದ್ದರು. ಅವರ ನಿಧನದಿಂದ ಗ್ರಾಮಕ್ಕೆ ಹಾಗೂ ಅವರ ಶಿಷ್ಯ ಬಳಗಕ್ಕೆ ತುಂಬಲಾರದ ನಷ್ಟವಾಗಿದೆ ಎಂದರು.

ಹೂವಿನಶಿಗ್ಲಿ ವಿರಕ್ತಮಠದ ಚನ್ನವೀರ ಸ್ವಾಮೀಜಿ ಮಾತನಾಡಿ, ಜಿ.ಬಿ.ಕಲಕೋಟಿ ಕೊಡುಗೈ ದಾನಿಯಾಗಿದ್ದು, ಅವರಿಂದಾಗಿ ಗ್ರಾಮದಲ್ಲಿ ಭವ್ಯವಾದ ಆಂಜನೇಯ ದೇವಸ್ಥಾನ ತಲೆ ಎತ್ತಿ ನಿಂತಿದೆ. ಅವರ ಶಿಷ್ಯ ಬಳಗ ಇಂದು ದೊಡ್ಡ ದೊಡ್ಡ ಹುದ್ದೆಗಳನ್ನ ಅಲಂಕರಿಸಿದ್ದು, ಅದೇ ಅವರ ಆಸ್ತಿಯಾಗಿತ್ತು ಎಂದರು.

ವಿಶ್ರಾಂತ ಪ್ರಾಂಶುಪಾಲ ಧೀರೇಂದ್ರ ಏಕಬೋಟೆ ಮಾತನಾಡಿ, ಬದ್ಧತೆ ಹಾಗೂ ಕಾರ್ಯಕ್ಷಮತೆಗೆ ಇನ್ನೊಂದು ಹೆಸರೇ ಪ್ರೊ.ಜಿ.ಬಿ.ಕಲಕೋಟಿ. ಜನರಿಗೆ ಸಹಾಯ ಮಾಡುವುದನ್ನೇ ಹವ್ಯಾಸವನ್ನಾಗಿ ಮಾಡಿಕೊಂಡಿದ್ದ ಅವರು ವೈಯಕ್ತಿಕ ಜೀವನಕ್ಕಿಂತ ಸಾರ್ವಜನಿಕ ಜೀವನಕ್ಕೆ ಹೆಚ್ಚು ಪ್ರಾಮುಖ್ಯತೆ ನೀಡಿದ್ದರು ಎಂದರು.

ನಿವೃತ್ತ ಕೆಎಎಸ್ ಅಧಿಕಾರಿ ಎಂ.ಐ.ಇಚ್ಚಂಗಿ, ಬೆಳಗಾವಿ ಸಹಾಯಕ ಅರಣ್ಯ ಸಂರಕ್ಷಣಾಧಿಕಾರಿ ನಾಗರಾಜ ಬಾಲೆಹೊಸೂರು ಮಾತನಾಡಿದರು.

ಜಿಲ್ಲಾ ಪಂಚಾಯ್ತಿ ಮಾಜಿ ಸದಸ್ಯ, ಬಿಜೆಪಿ ಮುಖಂಡ ಸಿದ್ದರಾಜ ಕಲಕೋಟಿ, ಸರ್ಕಾರಿ ಪ್ರೌಢಶಾಲೆ ನಿವೃತ್ತ ಮುಖ್ಯ ಶಿಕ್ಷಕ ಅಲ್ಲಾವುದ್ದೀನ್ ಕರ್ಜಗಿ, ನಿವೃತ್ತ ಪ್ರಾಂಶುಪಾಲರಾದ ಎಚ್.ಆರ್.ಯಡಹಳ್ಳಿ, ಎಂ ಎಫ್ ಕುರಿ, ಉದ್ಯಮಿ ರಾಚಯ್ಯ ವಾರೆಕಲ್ಲಮಠ, ಗಂಗಾಧರ ಕನವಳ್ಳಿ, ಪ್ರೊ.ಕಲಕೋಟಿ ಅವರ ಪತ್ನಿ ವಿಜಯಲಕ್ಷಮೀ, ಸಂಗಣ್ಣ ಅರಳಿ, ಬಸವರಾಜ ಕನವಳ್ಳಿ, ಗ್ರಾಮಸ್ಥರು ಪಾಲ್ಗೊಂಡಿದ್ದರು.

ಶಿಕ್ಷಕ ಸಂತೋಷ ಅರಳಿ ಸ್ವಾಗತಿಸಿದರು. ಪತ್ರಕರ್ತ ಬಸವರಾಜ ಮರಳಿಹಳ್ಳಿ ನಿರೂಪಿಸಿದರು.