ಜಿಲ್ಲಾ ಕಾರಾಗೃಹಕ್ಕೆ ಬೇಕು ಅಂಬುಲೆನ್ಸ್; ಅಗತ್ಯ ಸಿಬ್ಬಂದಿ, ಮೂಲ ಸೌಕರ್ಯ ವಂಚಿತ ಜೈಲು; ಜೈಲರ್ ಕ್ವಾರ್ಟರ್ಸ್‌ಗೆ ಬೇಕಿದೆ ಅನುದಾನ

ಜಿಲ್ಲಾ ಕೇಂದ್ರ ಹಾವೇರಿ ಶಹರದಿಂದ 8 ಕಿಮೀ ದೂರದಲ್ಲಿರುವ ಜಿಲ್ಲಾ ಕಾರಾಗೃಹ ಎರಡು ದಶಕಗಳ ಹಿಂದೆ ಪ್ರಾರಂಭವಾಗಿದ್ದು, ಈರೆಗೆ ಅಗತ್ಯ ಸೌಲಭ್ಯಗಳು ದೊರೆತಿಲ್ಲ. ಈ ಜೈಲಿನಲ್ಲಿ ಜಿಲ್ಲೆಯಲ್ಲಿ ಕೊಲೆ, ಸುಲಿಗೆ, ಅತ್ಯಾಚಾರ, ದರೋಡೆ, ಕಳ್ಳತನ, ಮತ್ತಿತರ ಅಪರಾಧಿ ಕೃತ್ಯಗಳಲ್ಲಿ ಭಾಗಿಯಾಗಿರುವ ವಿಚಾರಣಾಧೀನ ಖೈದಿಗಳನ್ನು ಇರಿಸಲಾಗಿದೆ.

ಸದ್ಯ 200ಕ್ಕೂ ಅಧಿಕ ವಿಚಾರಣಾಧೀನ ಖೈದಿಗಳನ್ನು ಜಿಲ್ಲಾ ಕಾರಾಗೃಹದಲ್ಲಿ ಬಂಧಿಸಲಾಗಿದೆ. ಜೈಲಿಗೆ ಆಗಮಿಸುವ ಹಲವು ಬಂಧಿಗಳು ಮದ್ಯಪಾನ, ಗಾಂಜಾ, ಮತ್ತಿತರ ಮಾದಕ ವಸ್ತುಗಳ ದಾಸರಾಗಿರುತ್ತಾರೆ. ಜೈಲಿಗೆ ಬಂದ ಕೂಡಲೇ ಅವರ ವರ್ತನೆ, ಆರೋಗ್ಯ ಗಂಭೀರ ಸಮಸ್ಯೆಗಳನ್ನು ಎದುರಿಸುತ್ತಾರೆ. ಇಂತಹ ಖೈದಿಗಳೊಂದಿಗೆ ಜೈಲಿನ ಅಧಿಕಾರಿಗಳು, ವಾರ್ಡರ್‌ಗಳು ನಿತ್ಯವೂ ಆತಂಕದಲ್ಲೇ ಕಾಲ ಕಳೆಯಬೇಕಾಗುತ್ತದೆ.

200 ಖೈದಿಗಳಲ್ಲಿ ನಿತ್ಯವೂ 1ರಿಂದ ನಾಲ್ಕೈದು ಖೈದಿಗಳ ಆರೋಗ್ಯ ತಪಾಸಣೆ, ಅನಾರೋಗ್ಯದ ಚಿಕಿತ್ಸೆ ಅಗತ್ಯ ಇರುತ್ತದೆ. ಜೈಲಿನಲ್ಲಿ ವೈದ್ಯರು, ನರ್ಸ್ ಹಾಗೂ ಅಂಬುಲೆನ್ಸ್ ಇಲ್ಲ. ಇದ್ದ ಒಂದು ಅಂಬುಲೆನ್ಸ್ ದುರಸ್ತಿಗೆ ಒಳಗಾಗಿದ್ದು, ಅವಧಿ ಕೂಡ ಮೀರಿದೆ. ಜೈಲಿನ ಅಧೀಕ್ಷಕರ ಹಳೆಯ ಟಾಟಾ ಸುಮೋ ಜೀಪನ್ನೇ ಖೈದಿಗಳನ್ನು ಜಿಲ್ಲಾಸ್ಪತ್ರೆಗೆ ಕರೆದುಕೊಂಡು ಹೋಗಲು ಬಳಸಲಾಗುತ್ತಿದೆ. ಇದರಿಂದ ಜೈಲಿನ ಅಧಿಕಾರಿ, ಸಿಬ್ಬಂದಿ ಹೈರಾಣಾಗಿದ್ದಾರೆ.

ಜಿಲ್ಲಾ ಕಾರಾಗೃಹ 15 ಎಕರೆ ವ್ಯಾಪ್ತಿ ಹೊಂದಿದ್ದು, ಕ್ವಾರ್ಟರ್ಸ್ ನಿರ್ಮಾಣಕ್ಕೆ ಅಗತ್ಯ ಸ್ಥಳ ಲಭ್ಯವಿದೆ. ಆದರೆ, ಈವರೆಗೆ ಅಧೀಕ್ಷಕರು, ಸಿಬ್ಬಂದಿಗೆ ಕ್ವಾರ್ಟರ್ಸ್ ನಿರ್ಮಿಸಿಲ್ಲ. ಹಾಗಾಗಿ, ಎಲ್ಲ ಅಧಿಕಾರಿಗಳು, ಸಿಬ್ಬಂದಿ ಹಾವೇರಿ ನಗರದಲ್ಲಿ ಬಾಡಿಗೆ ಮನೆಯಲ್ಲಿ ವಾಸವಾಗಿದ್ದಾರೆ. ನಿತ್ಯ ಸುಮಾರು 8 ಕಿಮೀ ದೂರದಿಂದ ಜೈಲಿಗೆ ಬರುತ್ತಾರೆ. ಜೈಲಿನ ಆವರಣದಲ್ಲೇ ಕ್ವಾರ್ಟರ್ಸ್ ನಿರ್ಮಿಸಿದರೆ, ಹೆಚ್ಚಿನ ಭದ್ರತೆ ಸಿಕ್ಕಂತಾಗುತ್ತದೆ. ಸಿಬ್ಬಂದಿಯ ಬಾಡಿಗೆ ಹಣವೂ ಉಳಿತಾಯವಾಗುತ್ತದೆ.

ಈ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ, ಜಿಲ್ಲಾಡಳಿತ, ಕಾರಾಗೃಹ ಇಲಾಖೆ, ಹಾವೇರಿ ಜಿಲ್ಲಾ ಕಾರಾಗೃಹದ ಸಮಸ್ಯೆಗಳತ್ತ ಗಮನ ಹರಿಸಬೇಕು. ಈ ಕೂಡಲೇ ಜೈಲಿಗೆ ವೈದ್ಯರು, ನರ್ಸ್, ಅಂಬುಲೆನ್ಸ್, ಚಾಲಕರನ್ನು ನೇಮಿಸಬೇಕು. ಕ್ವಾರ್ಟರ್ಸ್ ನಿರ್ಮಾಣಕ್ಕೆ ಅಗತ್ಯ ಕ್ರಮ ಕೈಗೊಳ್ಳಬೇಕು. ಅನುದಾನ ಬಿಡುಗಡೆಗೊಳಿಸಿ, ಕಟ್ಟಡ ಕಾಮಗಾರಿ ಆರಂಭಿಸಬೇಕು ಎಂಬ ಒತ್ತಾಯ ಕೇಳಿ ಬಂದಿದೆ.

11 ವಾರ್ಡರ್ ಹುದ್ದೆ ಖಾಲಿ

ಜೈಲಿನಲ್ಲಿ ಒಬ್ಬ ಕಾರಾಗೃಹ ಅಧೀಕ್ಷಕರು, 24 ವಾರ್ಡರ್, 7 ಹೆಡ್ ವಾರ್ಡರ್, 2 ಜೈಲರ್ ಹುದ್ದೆಗಳು ಮಂಜೂರಾಗಿವೆ. ಸದ್ಯ ಕಾರಾಗೃಹ ಅಧೀಕ್ಷಕರು, 6 ಹೆಡ್ ವಾರ್ಡರ್, 2 ಜೈಲರ್ ಹಾಗೂ 13 ವಾರ್ಡರ್‌ಗಳು ಮಾತ್ರ ಕಾರ್ಯ ನಿರ್ವಹಿಸುತ್ತಿದ್ದಾರೆ. 11 ವಾರ್ಡರ್ ಹುದ್ದೆ ಖಾಲಿ ಇದ್ದು, ಒಬ್ಬರು ಇಬ್ಬರ ಕೆಲಸ ಮಾಡುವ ಸ್ಥಿತಿ ಇದೆ ಎನ್ನುತ್ತವೆ ಮೂಲಗಳು.

4 ತಿಂಗಳ ಖೈದಿಗಳ ವೇತನ ಬಾಕಿ

ಕಾರಾಗೃಹದಲ್ಲಿ ಡುಗೆ ಕಾರ್ಯ, ತೋಟದ ಕೆಲಸ, ಸ್ವಚ್ಛತೆ ಸೇರಿದಂತೆ ವಿವಿಧ ಕೆಲಸಗಳಿಗೆ ಕೆಲ ವಿಚಾರಣಾಧೀನ ಖೈದಿಗಳನ್ನು ಬಳಸಿಕೊಳ್ಳಲಾಗುತ್ತದೆ. ಅಂಥವರಿಗೆ ಇಲಾಖೆಯಿಂದ ದಿನದ ಕೂಲಿ ಲೆಕ್ಕದಲ್ಲಿ ಪ್ರತಿ ತಿಂಗಳು ವೇತನ ಬಿಡುಗಡೆ ಮಾಡಲಾಗುತ್ತದೆ. 2025ರ ಡಿಸೆಂಬರ್‌ನಿಂದ ಈವರೆಗೆ ಈ ಹಣ ಬಿಡುಗಡೆಯಾಗಿಲ್ಲ ಎಂಬ ಮಾಹಿತಿ ಲಭ್ಯವಾಗಿದೆ.

ಕಸದ ವಾಹನ ಬರಲ್ಲ

200ಕ್ಕೂ ಅಧಿಕ ಖೈದಿಗಳು ಇರುವ ದೊಡ್ಡ ಜೈಲಿನ ಕಸ ತೆಗೆದುಕೊಂಡು ಹೋಗಲು ಜೈಲಿಗೆ ಪೌರ ಕಾರ್ಮಿಕರು ಹಾಗೂ ಕಸದ ವಾಹನ ಬರುವುದಿಲ್ಲ. ಕಸ ಸಂಗ್ರಹಿಸಲು ಹಾವೇರಿ ನಗರಸಭೆ ಹಾಗೂ ಆಲದಕಟ್ಟಿ ಗ್ರಾಮ ಪಂಚಾಯಿತಿಗೆ ಹಲವು ಬಾರಿ ಮನವಿ ಮಾಡಲಾಗಿದೆ. ನಮ್ಮ ವ್ಯಾಪ್ತಿಗೆ ಬರುವುದಿಲ್ಲ ಎಂದು ನಗರಸಭೆಯವರು ಹೇಳುತ್ತಾರೆ. ಗ್ರಾಪಂನವರು ಈವರೆಗೆ ಕಸ ಸಂಗ್ರಹಿಸಿಲ್ಲ. ಹಾಗಾಗಿ, ಹಸಿ ತರಕಾರಿಯನ್ನು ಹೊಲ ಮತ್ತು ದನಗಳಿಗೆ ಹಾಕುವ ಸಿಬ್ಬಂದಿ, ಒಣ ಕಸವನ್ನು ಬೆಂಕಿ ಹಚ್ಚಿ ಸುಡುತ್ತಿದ್ದಾರೆ ಎಂದು ಗೊತ್ತಾಗಿದೆ. ಇದು ಪರಿಸರಕ್ಕೆ ಮಾರಕವಾಗಿದ್ದು, ಈ ಕೂಡಲೇ ಸಂಬಂಧಪಟ್ಟ ಅಧಿಕಾರಿಗಳು ಕಸ ಸಂಗ್ರಹಣೆಗೆ ವ್ಯವಸ್ಥೆ ಮಾಡಬೇಕಿದೆ.

"