ಹಾವೇರಿ ತಾಲೂಕಿನ ಕರ್ಜಗಿ ಗ್ರಾಮದಲ್ಲಿ ಆಸ್ತಿ ಕಲಹ, ಯುವತಿಗೆ ಚಾಕು ಇರಿತ

ನಿರ್ಮಲಾ ನಾಗಪ್ಪ ಅಣ್ಣಿ ಚಾಕು ಇರಿತಕ್ಕೊಳಗಾದ ಯುವತಿ. ಗಂಗಾಧರ ನೀಲಪ್ಪ ಇಂಗಳಗುಂದಿ ಯುವತಿಗೆ ಚಾಕು ಇರಿದ ಆರೋಪಿ.

ಇಬ್ಬರೂ ಸಂಬಂಧಿಕರು ಇದ್ದು, ಮನೆ ಗೋಡೆ ನಿರ್ಮಾಣದ ವಿಚಾರವಾಗಿ ಎರಡೂ ಕುಟುಂಬಗಳ ನಡುವೆ ಗಲಾಟೆ ಶುರುವಾಗಿತ್ತು. ಇದೇ ವಿಷಯಕ್ಕೆ ಮಂಗಳವಾರ ಸಂಜೆ ವಾದ, ಪ್ರತಿವಾದ ಬೆಳೆದು ಗಲಾಟೆ ನಡೆದಿದೆ. ಗಂಗಾಧರ ಹಾಗೂ ನಾಗಪ್ಪನ ನಡುವೆ ಗಲಾಟೆ ಏರ್ಪಟ್ಟಿತ್ತು. ಗಂಗಾಧರ ಚಾಕು ತಂದು ನಾಗಪ್ಪನಿಗೆ ಇರಿದು ಕೊಲ್ಲಲು ಯತ್ನಿಸಿದ್ದಾನೆ. ಈ ವೇಳೆ ಜಗಳ ಬಿಡಿಸಲು ಹೋಗಿದ್ದ ನಿರ್ಮಲಾ ಬೆನ್ನಿಗೆ ಗಂಗಾಧರ ಚಾಕುವಿನಿಂದ ಇರಿದಿದ್ದಾನೆ. ಜೀವ ಬೆದರಿಕೆ ಹಾಕಿ ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾನೆ ಎಂದು ದೂರಿನಲ್ಲಿ ದಾಖಲಾಗಿದೆ.

ರಕ್ತದ ಮಡುವಿನಲ್ಲಿ ಬಿದ್ದಿದ್ದ ಯುವತಿಯನ್ನು ಸ್ಥಳೀಯರು ಜಿಲ್ಲಾಸ್ಪತ್ರೆಗೆ ರವಾನಿಸಿ, ಚಿಕಿತ್ಸೆ ಕೊಡಿಸಿದ್ದಾರೆ. ಸ್ಥಳಕ್ಕೆ ಆಗಮಿಸಿದ ಹಾವೇರಿ ಗ್ರಾಮೀಣ ಠಾಣೆ ಪೊಲೀಸರು ಪರಿಶೀಲಿಸಿ ಪ್ರಕರಣ ದಾಖಲಿಸಿದ್ದಾರೆ. ಆರೋಪಿ ತಲೆಗೆ ಗಾಯವಾಗಿದ್ದು, ಜಿಲ್ಲಾಸ್ಪತ್ರೆಗೆ ದಾಖಲಾಗಿದ್ದಾನೆ. ಆಸ್ಪತ್ರೆಯಿಂದ ಬಿಡುಗಡೆಯಾದ ಕೂಡಲೇ ಬಂಧಿಸಲಾಗುವುದು ಎಂದು ಪಿಎಸ್‌ಐ ರವಿಕುಮಾರ ಡಿ. ತಿಳಿಸಿದ್ದಾರೆ.

"