ಕನವಳ್ಳಿ ಗ್ರಾಪಂ ಪಿಡಿಓ, ಅಧ್ಯಕ್ಷರಿಗೆ 6.97 ಲಕ್ಷ ದಂಡ; ವಿವಿಧ ಕಾಮಗಾರಿಗಳಲ್ಲಿ ಅನುದಾನ ದುರುಪಯೋಗ ಆರೋಪ

ನಗರದ ಜಿಲ್ಲಾ ಪತ್ರಿಕಾ ಭವನದಲ್ಲಿ ಶನಿವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ಕನವಳ್ಳಿ ಗ್ರಾಪಂನಲ್ಲಿ ನಡೆದಿರುವ 24 ಕಾಮಗಾರಿಗಳಲ್ಲಿ ಸುಮಾರು ಒಂದು ಕೋಟಿಗೂ ಅಧಿಕ ಅವ್ಯವಹಾರ ಆಗಿದೆ. ಈ ಕುರಿತು ತನಿಖೆ ನಡೆಸುವಂತೆ ಜಿಪಂ ಓಂಬುಡ್ಸಮನ್ ಕಚೇರಿಗೆ ದೂರು ನೀಡಲಾಗಿತ್ತು. ಈ ಬಗ್ಗೆ ಅಧಿಕಾರಿಗಳು ತನಿಖೆ ಕೈಗೊಂಡು ಕನವಳ್ಳಿ ಗ್ರಾಪಂನಲ್ಲಿ ನರೇಗಾ ಯೋಜನೆಯಡಿ ಕೈಗೊಂಡ ಕಚ್ಚಾ ಕಾಲುವೆ ನಿರ್ಮಾಣ, ಸಿ.ಸಿ ಚರಂಡಿ ನಿರ್ಮಾಣ, ಸಿ.ಸಿ.ರಸ್ತೆ ಮತ್ತು ಪೇವರ್ಸ್ ಸೇರಿದಂತೆ 24 ಕಾಮಗಾರಿಗಳಲ್ಲಿ ಸರ್ಕಾರದ ಅನುದಾನ ದುರುಪಯೋಗ ಪಡಿಸಿಕೊಂಡಿರುವುದು ದೃಢಪಟ್ಟಿದೆ. ಈ ಹಿನ್ನೆಲೆಯಲ್ಲಿ ಗ್ರಾಪಂ ಈ ಹಿಂದಿನ ಪಿಡಿಓ ಸೇರಿದಂತೆ ತಾಂತ್ರಿಕ ಸಹಾಯಕರು, ಅಂದಿನ ಅಧ್ಯಕ್ಷರಿಗೆ 6,97 ಲಕ್ಷ ರೂ., ದಂಡ ವಿಧಿಸಿ ಆದೇಶಿಸಿದ್ದಾರೆ ಎಂದರು.

ಕನವಳ್ಳಿ ಗ್ರಾಪಂ ಹಿಂದಿನ ಪಿಡಿಓಗಳಾದ ನಾಗರಾಜ ಮಣ್ಣವಡ್ಡರ, ಪ್ರದೀಪ ಮುಳ್ಳೂರು, ಅಲ್ಲಾಭಕ್ಷ ವಡವಿ, ಈ ಹಿಂದಿನ ತಾಂತ್ರಿಕ ಸಹಾಯಕರಾದ ಸಂತೋಷ ಸಿ.,ರೇಣುಕಾ ಕೊಪ್ಪದ ಹಾಗೂ ಗ್ರಾಪಂ ಈ ಹಿಂದಿನ ಅಧ್ಯಕ್ಷರಾದ ನೀಲವ್ವ ಮುದಕಣ್ಣನವರ, ಕವಿತಾ ಎರಿಮನಿ, ಅಬ್ದುಲ್ ಖಾದರ ಮೀರಸಾಬ್ ಗಡ್ಡದ ಅವರಿಗೆ ಒಟ್ಟು 6,97,447 ರೂ. ದಂಢ ವಿಧಿಸಿ ಆದೇಶಿಸಲಾಗಿದೆ. ಇದು ನಮ್ಮ ಹೋರಾಟಕ್ಕೆ ಸಿಕ್ಕ ಜಯ. ಈ ಕೂಡಲೇ ಸರ್ಕಾರದ ಅನುದಾನ ದುರುಪಯೋಗ ಪಡಿಸಿಕೊಂಡ ಪಿಡಿಓ ಅಧಿಕಾರಿಗಳನ್ನು ಅಮಾನತುಗೊಳಿಸಬೇಕು ಎಂದು ಒತ್ತಾಯಿಸಿದರು.

ಸುದ್ದಿಗೋಷ್ಠಿಯಲ್ಲಿ ಸಾಧಿಕ್ ಕಲ್ಲಾಪೂರ, ನಾಗರಾಜ ಬಂಕಾಪೂರ, ಮುಸ್ತಾಫ್ ಅಗಸನಹಳ್ಳಿ, ಆನಂದಯ್ಯ ಹಿರಿಯಾಳಮಠ, ದಾದಾಪೀರ್ ಸೂಡಂಬಿ ಇದ್ದರು.