ಮಹಾನ್ ಶಿವಯೋಗಿಗಳು ಜನಿಸಿದ ಪುಣ್ಯ ನೆಲವಿದು; ಮುರುೇಂದ್ರ ಶಿವಯೋಗಿಗಳ ಜಯಂತ್ಯುತ್ಸವದಲ್ಲಿ ಹೊಸಮಠ ಶ್ರೀಗಳ ಹೇಳಿಕೆ

ನಗರದ ಶ್ರೀ ಹೊಸಮಠದ ಬಸವ ಕೇಂದ್ರದ ವತಿಯಿಂದ ಇತ್ತೀಚೆಗೆ ಆಯೋಜಿಸಿದ್ದ ಲಿಂಗೈಕ್ಯ ಜಗದ್ಗುರು ಶ್ರೀ ನೈಘಂಟಿನ ಸಿದ್ಧಬಸವ ಮುರುಘರಾಜೇಂದ್ರ ಸ್ವಾಮೀಜಿ ಹಾಗೂ ಮಹಾತಪಸ್ವಿ ಶ್ರೀ ಮುರುಘೇಂದ್ರ ಶಿವಯೋಗಿಗಳ ಜಯಂತ್ಯುತ್ಸವದಲ್ಲಿ ಸಾನ್ನಿಧ್ಯ ವಹಿಸಿ ಅವರು ಮಾತನಾಡಿದರು. ಉಭಯ ಶ್ರೀಗಳು, ಶ್ರೀ ಮಠಕ್ಕೆ ಎರಡು ಕಣ್ಣುಗಳಿದ್ದಂತೆ. ಇಬ್ಬರೂ ಮಹಾನ್ ಯೋಗಿಗಳು ಎಂದರು.

ಘನವೈರಾಗ್ಯ ಜಂಗಮ ಜ್ಯೋತಿ, ಯೋಗಿಗಳ ಪರಂಪರೆಯಲ್ಲಿ ಮುಂಚೂಣಿಯಲ್ಲಿರುವ ಮುರುಘೇಂದ್ರ ಶ್ರೀಗಳು ಶಿವಪಥದಲ್ಲಿ ಇದ್ದು ಲೋಕಪಥದತ್ತ ಸಾಗಿದವರು. ಉತ್ತರ ಕರ್ನಾಟಕದ ಪ್ರಸಿದ್ಧ ಸಿದ್ದಪುರುಷರು, ಜ್ಞಾನ, ಯೋಗ ಹಾಗೂ ಅದ್ಬುತ ವಾಕ್ ಸಿದ್ದಿಯಿಂದ ಲಕ್ಷಾಂತರ ಭಕ್ತರ ಇಷ್ಟಾರ್ಥಗಳನ್ನು ಈಡೇರಿಸಿದ ಮಹಾನ್ ದಾರ್ಶನಿಕರು. ಶಿವಯೋಗಿಗಳು ಮಹಾತಪಸ್ವಿಗಳಾಗಿ, ಅಂತರ ಜ್ಞಾನಿಗಳಾಗಿ, ತ್ರಿಕಾಲ ಜ್ಞಾನಿಗಳಾಗಿ ಆದರ್ಶ ಜೇವನಗೈದು ತಮ್ಮ ಶಿವಪೂಜೆ ಅನುಷ್ಠಾನದ ಪ್ರಭಾವಮಯ ಪ್ರಕಾಶದ ಜ್ಯೋತಿಯನ್ನು ದಯಪಾಲಿಸುತ್ತ ಜೀವನ್ಮುಕ್ತಗೊಂಡರು ಎಂದರು.

ಲೋಕಮಾನ್ಯ ತಿಲಕರು 1915ರಲ್ಲಿ ಅಥಣಿಗೆ ಬಂದಾಗ ಪೂಜ್ಯರ ದರ್ಶನಕ್ಕೆ ಬಂದಿದ್ದರು. ಭಾರತಕ್ಕೆ ಸ್ವಾತಂತ್ರ್ಯದ ಗುರಿ ಈಡೇರುವುದೇ ಎಂದು ಶ್ರೀ ಶಿವಯೋಗಿಗಳಿಗೆ ಕೇಳಿದ್ದರು. ಆಗ ಶಿವಯೋಗಿಗಳು, ಸ್ವಾತಂತ್ರ್ಯ ಸಿಗುತ್ತದೆ. ಆದರೆ, ಅದನ್ನು ನೋಡಲಾರಿರಿ ಎಂದಿದ್ದರಂತೆ. ಹಾಗೆಯೇ ಆಯಿತು. ಸ್ವಾತಂತ್ರ್ಯ ಪೂರ್ವದಲ್ಲಿ ತಿಲಕರು ನಿಧನರಾಗಿದ್ದರು ಎಂದರು.

ಕನ್ನಡ ಮತ್ತು ಸಂಸ್ಕೃತಿ ಇಲಾಖೆ ಸಹಾಯಕ ನಿರ್ದೇಶಕ ವೀರಯ್ಯ ಹಿರೇಮಠ ಮಾತನಾಡಿ, ನಾನು ಬೆಳಗಾವಿಯಲ್ಲಿ ಸೇವೆ ಸಲ್ಲಿಸುತ್ತಿದ್ದ ಸಂದರ್ಭದಲ್ಲಿ ಅಥಣಿ ಮುರುಘೇಂದ್ರ ಶಿವಯೋಗಿಗಳ ಪವಾಡ ತಿಳಿದುಕೊಂಡಿದ್ದೇನೆ. ಅವರ ಆದರ್ಶಗಳು ನಮಗೆ ಮಾದರಿ. ನಮ್ಮ ಇಲಾಖೆ ದಾರ್ಶನಿಕರನ್ನು ಸ್ಮರಿಸುವ ಕಾರ್ಯ ಮಾಡುತ್ತಿದೆ ಎಂದರು.

ನಿವೃತ್ತ ಶಿಕ್ಷಕಿ ರುದ್ರಮ್ಮ ನೆಲವಿಗಿ ಮಾತನಾಡಿ, ಮಹಾನ್ ಸಾಧಕರ ಜೀವನ ಸಾಧನೆಯನ್ನು ಎಲ್ಲರೂ ಅವಲೋಕಿಸಬೇಕು ಎಂದು ಎಂದು ಉಪನ್ಯಾಸ ನೀಡಿದರು.

ಮುರುಗೆಪ್ಪ ಕಡೆಕೊಪ್ಪ, ದಯಾನಂದ ಯಡ್ರಾವಿ, ರುದ್ರೇಶ ಚನ್ನಣ್ಣನವರ ಉಪಸ್ಥಿತರಿದ್ದರು. ಲಕ್ಕಣ್ಣವರ ಸಹೋದರಿಯರು ವಚನ ಗಾಯನ ಮಾಡಿದರು. ಗೂಳಪ್ಪ ಅರಳಿಕಟ್ಟಿ ನಿರೂಪಿಸಿದರು. ವಿ.ಜಿ.ಯಳಗೇರಿ ಸ್ವಾಗತಿಸಿದರು. ನಿಂಗಪ್ಪ ಆರೇರ ವಂದಿಸಿದರು.

ಉಭಯ ಶ್ರೀಗಳ ಭಾವಚಿತ್ರದ ಪಲ್ಲಕ್ಕಿ ಉತ್ಸವ ಜರುಗಿತು. ಶಿವಲೀಲಾ ಮರಗಾಲ, ವೀರಯ್ಯ ಹಿರೇಮಠ, ಎ.ಸಿ.ಹಿರೇಮಠ ಹಾಗೂ ರುದ್ರಮ್ಮ ನೆಲವಿಗಿ ಅವರನ್ನು ಸನ್ಮಾನಿಲಾಯಿತು.