ಜಿಲ್ಲೆಯಲ್ಲಿ ನಕಲಿ ವೈದ್ಯರ ಹಾವಳಿ; 5 ವರ್ಷದಲ್ಲಿ 25 ಫೇಕ್ ಡಾಕ್ಟರ್ಸ್‌ ಪತ್ತೆ; ಅರ್ಹತೆ, ತರಬೇತಿ ಇಲ್ಲದೇ ಮುಗ್ದ ಜನರ ಪ್ರಾಣದ ಜತೆಗೆ ಚೆಲ್ಲಾಟ

ಎಂಬಿಬಿಎಸ್, ಬಿಎಂಎಸ್ ಪದವಿ ಅಥವಾ ಯಾವು ಸ್ನಾತಕೋತ್ತರ ಪದವಿಯನ್ನೂ ಪಡೆಯದೇ ಸಣ್ಣಪುಟ್ಟ ಕಾಯಿಲೆಗೆ ಚಿಕಿತ್ಸೆ ಕೊಡುವುದನ್ನು ಕಲಿತು ‘ನಾನು ಡಾಕ್ಟರ್’ ಎಂದು ಓಡಾಡುವ ನಕಲಿ ವೈದ್ಯರ ಹಾವಳಿ ಜಿಲ್ಲೆಯಲ್ಲಿ ಇತ್ತೀಚೆಗೆ ಹೆಚ್ಚುತ್ತಲೇ ಇದೆ. ಇದು ಜನರ ಜೀವಕ್ಕೆ ಕುತ್ತು ತರುತ್ತಿದೆ. 

 ಜಿಲ್ಲೆಯಲ್ಲಿ ನಕಲಿ ವೈದ್ಯರ ಕ್ಲಿನಿಕ್‌ಗಳ ಮೇಲೆ ದಾಳಿ, ನಕಲಿ ವೈದ್ಯರಿಂದ ಆದ ಅನಾಹುತಗಳ ಬಗ್ಗೆ ಆಗಾಗ ಪತ್ರಿಕೆಗ ಮಾಧ್ಯಮಗಳಲ್ಲಿ ಪ್ರಕಟವಾಗುತ್ತಲೇ ಇರುತ್ತದೆ. ಅದರಲ್ಲೂ ಗ್ರಾಮೀಣ ಪ್ರದೇಶಗಳಲ್ಲೇ ನಕಲಿಗಳ ಪ್ರಮಾಣ ಹೆಚ್ಚಾಗಿರುವುದು ಕಂಡು ಬಂದಿದೆ. ಬಡವರ ಅನೇಕ ಕೇಸ್‌ಗಳು ಸದ್ದಿಲ್ಲದೇ ಮುಚ್ಚಿ ಹೋಗಿವೆ. ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ ಅಧಿಕಾರಿಗಳು, ಸಿಬ್ಬಂದಿ ಕಳೆದ ಐದು ವರ್ಷಗಳಲ್ಲಿ 25 ನಕಲಿ ವೈದ್ಯರನ್ನು ಪತ್ತೆ ಹಚ್ಚಿದ್ದಾರೆ. ಇದು ಅಧಿಕೃತವಾಗಿ ಪತ್ತೆಯಾಗಿರುವ ಸಂಖ್ಯೆಯಾಗಿದ್ದು, ದಾಖಲೆಗೆ, ಲೆಕ್ಕಕ್ಕೆ ಸಿಗದ ಇನ್ನೂ ಹಲವು ನಕಲಿಗಳು ರಾಜಾರೋಷವಾಗಿ, ಕೆಲವರು ಕದ್ದುಮುಚ್ಚಿ ಕ್ಲಿನಿಕ್‌ಗಳನ್ನು ನಡೆಸುತ್ತಿರುವ ದೂರುಗಳು ಇವೆ.

 ರೈತರು, ಕೂಲಿ ಕಾರ್ಮಿಕರು, ಮಧ್ಯಮ ವರ್ಗದ ಜನರು ಹೆಚ್ಚಾಗಿರುವ ಜಿಲ್ಲೆಯಲ್ಲಿ 705 ಹಳ್ಳಿಗಳಿವೆ. 16 ಲಕ್ಷಕ್ಕೂ ಅಧಿಕ ಜನಸಂಖ್ಯೆ ಇದೆ. ನೆಗಡಿ, ಕೆಮ್ಮು, ಜ್ವರ, ಹೊಟ್ಟೆ ನೋವು, ವಾಂತಿ, ಭೇದಿ, ಮತ್ತಿತರ ಸಾಮಾನ್ಯ ಕಾಯಿಲೆಗಳಿಗಾಗಿ ಬಹುತೇಕ ಅಂದಾಜು ಶೇ.80ರಷ್ಟು ಜನ ಸ್ಥಳೀಯವಾಗಿ ಲಭ್ಯವಿರುವ ವೈದ್ಯರ ಬಳಿ ತಪಾಸಣೆಗೆ ತೆರಳುತ್ತಾರೆ. ವೈದ್ಯರಂತೆ ನಟಿಸುವ ನಕಲಿ ವೈದ್ಯರ ಪ್ರಮಾಣಪತ್ರದ ಬಗ್ಗೆ ಜನ ಪ್ರಶ್ನಿಸುವುದಿಲ್ಲ ಕೆಲ ನಕಲಿಗಳು ನಕಲಿ ಪ್ರಮಾಣ ಪತ್ರ ಅಂಟಿಸಿ, ವಂಚಿಸುತ್ತಾರೆ. 

 ನಕಲಿ ವೈದ್ಯರು ನಿಜವಾದ ವೈದ್ಯರು ಎಂದು ನಂಬುವ ಮುಗ್ದ ಜನ ಅವರು ಕೊಡುವ ಚಿಕಿತ್ಸೆಯನ್ನು ನಂಬಿಕೆಯಿಂದ ಪಡೆಯುತ್ತಾರೆ. ಅವರು ಸೂಚಿಸಿದ ಔಷಧಗಳನ್ನು ಸೇವಿಸುತ್ತಾರೆ. ಒಂದು ವೇಳೆ ಏನಾದರೂ ಅಡ್ಡ ಪರಿಣಾಮ ಬೀರಿದರೆ, ಚಿಕಿತ್ಸೆ ಫಲಿಸದಿದ್ದರೆ, ಪ್ರಾಣಕ್ಕೆ ಕುತ್ತು ಬಂದರೆ ಯಾರು ಹೊಣೆ ಎಂಬುದು ಯಕ್ಷಪ್ರಶ್ನೆಯಾಗಿದೆ. ಕೇವಲ ಎಸ್‌ಎಸ್‌ಎಲ್‌ಸಿ, ಪಿಯುಸಿ ವ್ಯಾಸಂಗ ಮಾಡಿರುವವರು ಸಣ್ಣ ಪುಟ್ಟ ಚಿಕಿತ್ಸೆ ಕೊಡುವುದನ್ನು ಕಲಿತು ನಕಲಿ ಕ್ಲಿನಿಕ್ ಆರಂಭಿಸಿ, ಪ್ರಾಕ್ಟೀಸ್ ಮಾಡುತ್ತಿರುವ ಉದಾಹರಣಗಳು ಇವೆ. ಹೆಚ್ಚಿನ ಚಿಕಿತ್ಸೆಯ ಅಗತ್ಯವಿದ್ದಲ್ಲಿ ನಗರ ಪ್ರದೇಶದ ಕೆಲ ವೈದ್ಯರೊಂದಿಗೆ ಹೊಂದಾಣಿಕೆ ಮಾಡಿಕೊಂಡು ಅಲ್ಲಿಗೆ ರೋಗಿಗಳನ್ನು ಕಳುಹಿಸುತ್ತಾರೆ. ಅವರೊಂದಿಗೂ ಕಮಿಷನ್ ಪಡೆಯುವ ಆರೋಪಗಳೂ ಇವೆ. 

ಎಂಬಿಬಿಎಸ್, ಬಿಎಂಎಸ್ ಅಥವಾ ಯಾವುದೇ ವೈದ್ಯಕೀಯ ಸ್ನಾತಕೋತ್ತರ ಪದವಿ ಪಡೆದಿರುವ ವೈದ್ಯರು, ತಜ್ಞ ವೈದ್ಯರು ಆಸ್ಪತ್ರೆ, ಕ್ಲಿನಿಕ್, ಪ್ರಯೋಗಾಲಯಗಳನ್ನು ನಡೆಸಲು ಕಡ್ಡಾಯವಾಗಿ ಕರ್ನಾಟಕ ಖಾಸಗಿ ವೈದ್ಯಕೀಯ ಸಂಸ್ಥೆಗಳ (ಕೆಪಿಎಂಇ) ಕಾಯ್ದೆಯ ಅಡಿಯಲ್ಲಿ ನೋಂದಾಯಿಸಿಕೊಂಡಿರಬೇಕು. ಮಾನದಂಡಗಳ ಪ್ರಕಾರ ಕ್ಲಿನಿಕ್ ನಡೆಸಬೇಕು. ನಕಲಿ ವೈದ್ಯರಿಗೆ ಮೂರು ವರ್ಷ ಕೈಲು ಶಿಕ್ಷೆ ಮತ್ತು 50 ಸಾವಿರ ರೂ. ದಂಡ ವಿಧಿಸಲು ಅವಕಾಶವಿದೆ. ಕ್ಲಿನಿಕ್‌ಗಳಲ್ಲಿ ಕೆಪಿಎಂಇ ಇಂದ ಪಡೆದ ಪ್ರಮಾಪತ್ರವನ್ನು ಜನರಿಗೆ ಕಾಣಿಸುವಂತೆ ಪ್ರದರ್ಶಿಸಬೇಕು ಎಂಬ ನಿಯಮವಿದೆ. ಸಾರ್ವಜನಿಕರು ಈ ಬಗ್ಗೆ ಜಾಗೃತಿ ವಹಿಸಬೇಕು ನಕಲಿ ವೈದ್ಯರು ಎಂದು ಖಚಿತವಾದರೆ ಸ್ಥಳೀಯ ಟಿಎಚ್‌ಒ ಅಥವಾ ಪೊಲೀಸ್ ಠಾಣೆಗೆ ಮಾಹಿತಿ ನೀಡಬೇಕು ಎಂಬುದು ‘ವಿಜಯವಾಣಿ’ ಕಳಕಳಿ. 

ಐದು ವರ್ಷಗಳಲ್ಲಿ ಜಿಲ್ಲಾ ಆರೋಗ್ಯ ಮತ್ತು ಕುಟುಂಬ ಕಲ್ಯಾಣ ಇಲಾಖೆ 25 ಕ್ಲಿನಿಕ್‌ಗಳ ಮೇಲೆ ದಾಳಿ ನಡೆಸಿ, ನಕಲಿ ವೈದ್ಯರನ್ನು ಪತ್ತೆ ಹಚ್ಚಿದೆ. ಆದರೆ, ಕೇವಲ ಒಂದು ಎಫ್‌ಐಆರ್ ಮಾತ್ರ ಮಾಡಿದೆ. ಉಳಿದವರಿಗೆ ದಂಡವನ್ನೂ ವಿಧಿಸದೇ, ಕ್ಲಿನಿಕ್ ಬಂದ್ ಮಾಡಿ ಕೈತೊಳೆದುಕೊಂಡಿದೆ. ಪರಿಣಾಮ ಇದೇ ನಕಲಿಗಳು ಬೇರೆ ಊರುಗಳಲ್ಲಿ, ಅಥವಾ ಬೇರೆ ಹೆಸರಲ್ಲಿ ಕ್ಲಿನಿಕ್ ಆರಂಭಿಸಿ ಮತ್ತದೇ ಚಾಳಿ ಮುಂದುವರಿಸುತ್ತಾರೆ. ಹಾಗಾಗಿ, ನಕಲಿ ವೈದ್ಯರು ಎಂದು ಪತ್ತೆಯಾದ ಕೂಡಲೇ ಎಫ್‌ಐಆರ್ ದಾಖಲಿಸಬೇಕು, ದೊಡ್ಡ ಮೊತ್ತದ ದಂಡ ವಿಧಿಸಬೇಕು ಎಂಬ ಆಗ್ರಹ ಸಾರ್ವಜನಿಕರಿಂದ ಕೇಳಿ ಬಂದಿದೆ. 

 ಸವಣೂರ ತಾಲೂಕಾಸ್ಪತ್ರೆ ಉದ್ಘಾಟನೆಗೆಂದು ಏ.27ರಂದು ಜಿಲ್ಲೆಗೆ ಆಗಮಿಸಲಿರುವ ಆರೋಗ್ಯ ಸಚಿವ ದಿನೇಶ ಗುಂಡೂರಾವ್ ಅವರು ನಕಲಿ ಡಾಕ್ಟರ್‌ಗಳ ಹಾವಳಿಗೆ ಬ್ರೇಕ್ ಹಾಕಬೇಕು. ರಾಜ್ಯದಲ್ಲೇ ಅತಿ ಹೆಚ್ಚು ಬಾಲ ಗರ್ಭಿಣಿಯರ ಕೇಸ್ ವರದಿಯಾದ ಟಾಪ್ ಜಿಲ್ಲೆಗಳ ಸಾಲಿನಲ್ಲಿ ಹಾವೇರಿ ಜಿಲ್ಲೆಯೂ ಇದೆ. ಹೆಣ್ಣು ಭ್ರೂಣ ಹಾಗೂ ಭ್ರೂಣ ಹತ್ಯೆಯಂಥ ಕೃತ್ಯಗಳಿಗೂ ಮೆಡಿಕಲ್, ಸ್ಕಾೃನಿಂಗ್ ಮಾಫಿಯಾ ಸಾಥ್ ನೀಡುತ್ತಿರುವುದು, ಅಧಿಕಾರಿಗಳು ಕಣ್ಣು ಮುಚ್ಚಿ ಕುಳಿತಿರುವ ಆರೋಪಗಳಿವೆ. ಈ ಬಗ್ಗೆ ಸೂಕ್ತ ಕ್ರಮ ಜರುಗಿಸಬೇಕು ಎಂಬುದು ಜಿಲ್ಲೆಯ ಜನರ ಆಗ್ರಹವಾಗಿದೆ. 

"