ಮತದಾರರ ಪಟ್ಟಿ ವಿಶೇಷ ಪರಿಷ್ಕರಣೆಗೆ ಸಹಕರಿಸಿ; 30ರಿಂದ ಬಿಎಲ್‌ಒಗಳಿಂದ ಮನೆ ಮನೆ ಭೇಟಿ ಆರಂಭ; ಡಿಸಿ ಡಾ.ವಿಜಯಮಹಾಂತೇಶ ದಾನಮ್ಮನವರ ಮಾಹಿತಿ

ನಗರದ ಹೊರವಲಯ ದೇವಗಿರಿಯ ಜಿಲ್ಲಾಧಿಕಾರಿಯವರ ಕಚೇರಿಯಲ್ಲಿ ಗುರುವಾರ ಆಯೋಜಿಸಿದ್ದ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, ದೋಷರಹಿತ ಶುದ್ಧ ಹಾಗೂ ಆರೋಗ್ಯಕರ ಮತದಾರರ ಪಟ್ಟಿ ತಯಾರಿಕೆಯ ಉದ್ದೇಶವಾಗಿದೆ. ಜೂನ್ 30ರಿಂದ ಜುಲೈ 29ರವರೆಗೆ ಬೂತ್ ಮಟ್ಟದ ಅಧಿಕಾರಿಗಳು(ಬಿಎಲ್‌ಒ) ಮನೆ ಮನೆಗೆ ಭೇಟಿ ನೀಡಲಿದ್ದಾರೆ. ಎಸ್.ಐ.ಆರ್ ಕುರಿತು ಮತದಾರರು ಯಾವುದೇ ಗೊಂದಲಗಳಿಗೆ ಒಳಗಾಗದೇ ಅಗತ್ಯ ಮಾಹಿತಿ ನೀಡಬೇಕು ಎಂದು ಡಿಸಿ ಕೋರಿದರು.

ಮತದಾರರಾಗಲು ಭಾರತದ ನಾಗರಿಕನಾಗಿರಬೇಕು, ಕನಿಷ್ಠ 18 ವರ್ಷ ಪೂರೈಸಿರಬೇಕು, ವಿಧಾನಸಭಾ ಕ್ಷೇತ್ರದ ಸಾಮಾನ್ಯ ನಿವಾಸಿಯಾಗಿರಬೇಕು ಹಾಗೂ ಯಾವುದೇ ಕಾನೂನಿನ ಅಡಿಯಲ್ಲಿ ಅನರ್ಹತೆಗೊಂಡಿರಬಾರದು. ಈ ಕಾರ್ಯದಲ್ಲಿ ಬಿ.ಎಲ್.ಒ.ಗಳ ಪಾತ್ರ ಬಹಳ ಮುಖ್ಯವಾಗಿದ್ದು, ಈಗಾಗಲೇ ಬಿಎಲ್‌ಒಗಳನ್ನು ಮತ್ತು ನೋಡಲ್ ಅಧಿಕಾರಿಗಳನ್ನು ನೇಮಕ ಮಾಡಲಾಗಿದೆ. ಸೂಕ್ತ ತರಬೇತಿ ನೀಡಲಾಗುತ್ತಿದೆ. ಬಿಎಲ್‌ಒಗಳ ಭೇಟಿ ವೇಳೆ ಕುಟುಂಬದ ಸದಸ್ಯರು ಇಲ್ಲದಿದ್ದರೆ ಅಕ್ಕಪಕ್ಕದ ಮನೆಯವರು ಸಂಪರ್ಕ ಸಾಧಿಸಬೇಕು. ಎಲ್ಲರನ್ನು ಸಂಪರ್ಕಿಸಲು ಬಿಎಲ್‌ಒಗಳು ಒಂದು ಮನೆಗೆ ಕನಿಷ್ಠ ಮೂರು ಬಾರಿ ಭೇಟಿ ನೀಡುವರು. ಆನ್‌ಲೈನ್ ಮೂಲಕವೂ ಜನರಿಗೆ ಪರಿಷ್ಕರಣೆಗೆ ಅವಕಾಶವಿದೆ ಎಂದರು.

ವರ್ಗಾವಣೆಗೊಂಡವರು ಹಾಗೂ ಮೃತ ಮತದಾರರ ಹೆಸರುಗಳ ಪರಿಶೀಲನೆ ನಡೆಸಲಾಗುವುದು. 2002ರಲ್ಲಿ ನಡೆದ ಎಸ್‌ಐಆರ್‌ಗೆ ಒಳಪಟ್ಟವರು ಹಾಗೂ 2025ರಲ್ಲಿ ಮತದಾರರ ಪಟ್ಟಿಯಲ್ಲಿ ಹೆಸರು ಇದ್ದವರು ಮುಂದುವರೆಯಲಿದ್ದಾರೆ. ತದನಂತರ ಮತದಾರರ ಪಟ್ಟಿಗೆ ಸೇರ್ಪಡೆಯಾದ ಮತದಾರರ ಕುರಿತು ಪರಿಶೀಲನೆ ಮಾಡಲಾಗುವುದು. 2002ರಲ್ಲಿ ಎಸ್‌ಐಆರ್‌ಗೆ ಒಳಪಟ್ಟ ತಂದೆ-ತಾಯಿ, ತಾತ-ಅಜ್ಜಿ ಸೇರಿದಂತೆ ರಕ್ತ ಸಂಬಧಿಗಳ ಆಧಾರದ ಮೇಲೆ ಅಗತ್ಯ ದಾಖಲೆ ಸಲ್ಲಿಸಬೇಕು. ಈ ಬಗ್ಗೆ ಎಲ್ಲ ಮತದಾರರು ಜಾಗೃತಿ ಹೊಂದಬೇಕು ಎಂದು ತಿಳಿಸಿದರು.

ಬಿಎಲ್‌ಒಗಳು ಮತದಾರರ ಮನೆ ಮನೆಗೆ ಭೇಟಿ ಸಮಯದಲ್ಲಿ ಎನುಮರೇಷನ್ ಫಾರ್ಮ್ ನಮೂನೆ-3 ಅನ್ನು ನೀಡುತ್ತಾರೆ. ಈ ಫಾರ್ಮ್ ಅನ್ನು ಮತದಾರರು ಭರ್ತಿ ಮಾಡಿ ಸಹಿ ಮಾಡಬೇಕು. ಹೊಸ ಭಾವಚಿತ್ರ ನೀಡಲು ಅವಕಾಶವಿದೆ. ಫಾರ್ಮ್ ಭರ್ತಿ ಮಾಡಲು ಮತದಾರರಿಗೆ ತಿಳಿಯಲಿಲ್ಲ ಎಂದರೆ ಬಿ.ಎಲ್.ಒ.ಗಳು ಭರ್ತಿಮಾಡುತ್ತಾರೆ. ಭರ್ತಿಮಾಡಿದ ಫಾರ್ಮ್‌ನ ಒಂದು ಪ್ರತಿ ಮತದಾರರ ಹತ್ತಿರ ಹಾಗೂ ಒಂದು ಪ್ರತಿ ಬಿ.ಎಲ್.ಒಗಳ ಹತ್ತಿರವಿರುತ್ತದೆ ಎಂದರು.

ಸುದ್ದಿಗೋಷ್ಠಿಯಲ್ಲಿ ಅಪರ ಜಿಲ್ಲಾಧಿಕಾರಿ ಡಾ.ನಾಗರಾಜ ಎಲ್., ತಹಸೀಲ್ದಾರ್ ಅಮೃತಗೌಡ ಪಾಟೀಲ, ಇತರರಿದ್ದರು.

ಒಬ್ಬ ಮತದಾರ ಎರಡು ಕಡೆಗಳಲ್ಲಿ ಅರ್ಜಿ ಸಲ್ಲಿಸಿ ಎರಡೂ ಕಡೆಗಳಲ್ಲಿ ಪಟ್ಟಿಯಲ್ಲಿ ಸ್ಥಾನ ಪಡೆಯಲು ಯತ್ನಿಸಿದ್ದು ಕಂಡುಬಂದರೆ ಅಥವಾ ಯಾರದರೂ ದೂರು ಕೊಟ್ಟರೆ ಅಂಥವರ ವಿರುದ್ಧ ಎಫ್‌ಐಆರ್ ದಾಖಲಿಸಲಾಗುವುದು. ಒಬ್ಬ ವ್ಯಕ್ತಿಯ ಹೆಸರು ಎರಡು ಕಡೆ ಬರುವಂತಿಲ್ಲ. ಸ್ಥಳ ಬದಲಾವಣೆ, ವರ್ಗಾವಣೆ, ವಿವಾಹ, ಇತರ ಕಾರಣಗಳಿದ್ದರೂ ಒಬ್ಬರು ಒಂದೇ ಕಡೆ ಮಾತ್ರ ಅರ್ಜಿ ಸಲ್ಲಿಸಿ, ಅಗತ್ಯ ದಾಖಲೆಗಳನ್ನು ಸಲ್ಲಿಸಬೇಕು ಎಂದರು ಡಿಸಿ.

ಗ್ರಾಮೀಣ ಪ್ರದೇಶದಲ್ಲಿ ಗ್ರಾಮ ಪಂಚಾಯಿತಿವಾರು ಹಾಗೂ ನಗರ ಪ್ರದೇಶದಲ್ಲಿ ವಾರ್ಡ್‌ವಾರು ಸಹಾಯವಾಣಿ ಕೇಂದ್ರಗಳನ್ನು ಸ್ಥಾಪಿಸಲಾಗಿದೆ. ಜಿಲ್ಲಾ ಮಟ್ಟದಲ್ಲಿ 1950 ಮತದಾರ ಸಹಾಯವಾಣಿ ಆರಂಭಿಸಲಾಗಿದೆ. ಸಂದೇಹ ಇದ್ದವರು ಸಹಾಯವಾಣಿ ಸಂಪರ್ಕಿಸಬಹುದು ಎಂದು ಡಿಸಿ ದಾನಮ್ಮನವರ ತಿಳಿಸಿದರು.

2002ರಲ್ಲಿ ಜಿಲ್ಲೆಯಲ್ಲಿ 1,159 ಮತಗಟ್ಟೆಗಳಿದ್ದವು. 4,79,433 ಪುರುಷ ಹಾಗೂ 4,45,777 ಮಹಿಳೆಯರು ಸೇರಿ ಒಟ್ಟು 9,25,210 ಮತದಾರರಿದ್ದರು. ಪ್ರಸ್ತುತ 13,36,130 ಮತದಾರರಿದ್ದು, ಈಗಾಗಲೇ 2002ರಲ್ಲಿ ಹಾಗೂ 2025ರ ಮತದಾರರ ಪಟ್ಟಿಯಲ್ಲಿರುವ 7.38 ಲಕ್ಷ ಮತದಾರರನ್ನು ಪರಿಶೀಲನೆ ಮಾಡಲಾಗಿದೆ ಎಂದು ಡಿಸಿ ಮಾಹಿತಿ ನೀಡಿದರು.

ಎಸ್‌ಐಆರ್ ಅರ್ಹತಾ ದಿನಾಂಕ 01-10-2026, ತಯಾರಿ, ತರಬೇತಿ ಮತ್ತು ಮುದ್ರಣ ದಿನಾಂಕ 20-06-2026ರಿಂದ 29-06-2026ರವರೆಗೆ, ಬಿಎಲ್‌ಒ ಮನೆ ಮನೆ ಭೇಟಿ ದಿನಾಂಕ 30-06-2026ರಿಂದ 29-07-2026ರವರೆಗೆ, ಮತದಾನ ಕೇಂದ್ರಗಳ ತರ್ಕಬದ್ಧಗೊಳಿಸುವಿಕೆ ದಿನಾಂಕ 29-07-2026, ಕರಡು ಮತದಾರರ ಪಟ್ಟಿಯ ಪ್ರಕಟಣೆ ದಿನಾಂಕ 05-08-2026, ಹಕ್ಕುಗಳು ಮತ್ತು ಆಕ್ಷೇಪಣೆಗಳನ್ನು ಸಲ್ಲಿಸುವ ಅವಧಿ ದಿನಾಂಕ 05-08-2026 ರಿಂದ 04-09-2026ರವರೆಗೆ, ಹಕ್ಕುಗಳು ಮತ್ತು ಆಕ್ಷೇಪಣೆಗಳ ಹಂತ/ವಿಲೇವಾರಿ ದಿನಾಂಕ ದಿನಾಂಕ 05-08-2026ರಿಂದ 03-10-2026ರವರೆಗೆ ನಡೆಯಲಿದೆ. ಅಂತಿಮ ಮತದಾರರ ಪಟ್ಟಿಯನ್ನು ದಿನಾಂಕ 07-10-2026ರಂದು ಪ್ರಕಟಿಸಲಾಗುವುದು.

ಜಿಲ್ಲೆಯಲ್ಲಿ ಹಾನಗಲ್ಲ ವಿಧಾನಸಭಾ ಕ್ಷೇತ್ರದಲ್ಲಿ 243, ಶಿಗ್ಗಾಂವ ವಿಧಾನಸಭಾ ಕ್ಷೇತ್ರದಲ್ಲಿ 241, ಹಾವೇರಿ ವಿಧಾನಸಭಾ ಕ್ಷೇತ್ರದಲ್ಲಿ 261, ಬ್ಯಾಡಗಿ ವಿಧಾನಸಭಾ ಕ್ಷೇತ್ರದಲ್ಲಿ 242, ಹಿರೇಕೆರೂರ ವಿಧಾನಸಭಾ ಕ್ಷೇತ್ರದಲ್ಲಿ 229 ಹಾಗೂ ರಾಣೆಬೆನ್ನೂರ ವಿಧಾನಸಭಾ ಕ್ಷೇತ್ರದಲ್ಲಿ 266 ಮತಗಟ್ಟೆಗಳು ಸೇರಿ 1,482 ಮತಗಟ್ಟೆಗಳಿವೆ. ಈ ಮತಗಟ್ಟೆಗಳಿಗೆ 1,482 ಬಿಎಲ್‌ಒಗಳು ಹಾಗೂ 148 ಮೇಲ್ವಿಚಾರಕರನ್ನು ನೇಮಿಸಲಾಗಿದೆ. ಜಿಲ್ಲೆಯ ಎಲ್ಲ ವಿಧಾನಸಭಾ ಕ್ಷೇತ್ರದ ಮತಗಟ್ಟೆಗಳಿಗೆ ಕಾಂಗ್ರೆಸ್ ಹಾಗೂ ಬಿಜೆಪಿ ಪಕ್ಷದಿಂದ ಬಿಎಲ್‌ಎಗಳನ್ನು ಮತ್ತು ಜೆಡಿಎಸ್‌ನಿಂದ ರಾಣೆಬೆನ್ನೂರ ಕ್ಷೇತ್ರದ 266 ಮತಗಟ್ಟೆಗಳಿಗೆ 266 ಬಿಎಲ್‌ಎಗಳನ್ನು ರಾಜಕೀಯ ಪಕ್ಷಗಳು ನೇಮಕ ಮಾಡಿವೆ ಎಂದು ಡಿಸಿ ದಾನಮ್ಮನವರ ತಿಳಿಸಿದರು.

01-07-1987ಕ್ಕಿಂತ ಮೊದಲು ಜನಿಸಿದವರು ಸ್ವಯಂ ಜನ್ಮ ದಿನಾಂಕ-ಸ್ಥಳವನ್ನು ಸ್ಥಾಪಿಸುವ 12 ದಾಖಲೆಗಳ ಪಟ್ಟಿಯಿಂದ ಅಗತ್ಯವಾದ ದಾಖಲೆ ಸಲ್ಲಿಸಬೇಕು. ದಿನಾಂಕ 01-07-1987ರಿಂದ 02-12-2004ರಲ್ಲಿ ಜನಿಸಿದವರು ಸ್ವಯಂ ಜನ್ಮ ದಿನಾಂಕ/ ಸ್ಥಳವನ್ನು ದೃಢಪಡಿಸುವ ದಾಖಲೆ, ತಂದೆ ಅಥವಾ ತಾಯಿಯ ಜನ್ಮದಿನಾಂಕ/ ಸ್ಥಳವನ್ನು ದೃಢಪಡಿಸುವ ದಾಖಲೆ, ಹಾಗೂ ದಿನಾಂಕ 02-12-2004ರ ನಂತರ ಜನಿಸಿದವರು ಸ್ವಯಂ, ಜನ್ಮ ದಿನಾಂಕ/ ಸ್ಥಳವನ್ನು ದೃಢಪಡಿಸುವ ದಾಖಲೆ, ತಂದೆಯ ಜನ್ಮದಿನ/ ಸ್ಥಳವನ್ನು ದೃಢಪಡಿಸುವ ದಾಖಲೆ, ತಾಯಿ ಜನ್ಮದಿನ/ ಸ್ಥಳ ದೃಢಪಡಿಸುವ ದಾಖಲೆ, ಯಾವುದೇ ಪಾಲಕರು ಭಾರತೀಯರಲ್ಲದಿದ್ದರೆ, ಜನನದ ಸಮಯದಲ್ಲಿ ಪೋಷಕರ ಮಾನ್ಯ ಪಾಸ್‌ಪೋರ್ಟ್ ಮತ್ತು ವೀಸಾ, ಭಾರತದ ಹೊರಗೆ ಜನಿಸಿದವರು ಅಥವಾ ನೈಸರ್ಗಿಕವಾಗಿ ಜನಿಸಿದವರು, ಭಾರತದ ಹೊರಗೆ ಜನನ, ವಿದೇಶದಲ್ಲಿರುವ ಭಾರತೀಯ ಮಿಷನ್‌ನಿಂದ ಜನನ ನೋಂದಣಿ ಪುರಾವೆ, ನೈಸರ್ಗಿಕೀಕರಣ, ಪೌರತ್ವ ನೋಂದಣಿ ಪ್ರಮಾಣಪತ್ರ ಸಲ್ಲಿಸಬೇಕು.