ಗೊಂದಲಕ್ಕೆ ಒಳಗಾಗದೇ ಮಾಹಿತಿ ನೀಡಿ; ಮತದಾರರ ಪಟ್ಟಿ ಪರಿಷ್ಕರಣೆ ಜೂ.30ರಿಂದ ಆರಂಭ; ಡಿಸಿ ಡಾ.ವಿಜಯಮಹಾಂತೇಶ ದಾನಮ್ಮನವರ ಮಾಹಿತಿ

ನಗರದ ಹೊರವಲಯ ದೇವಗಿರಯ ಜಿಲ್ಲಾಧಿಕಾರಿಯವರ ಕಚೇರಿಯ ಕೋರ್ಟ್ ಹಾಲ್‌ನಲ್ಲಿ ಬುಧವಾರ ಎಸ್‌ಐಆರ್ ಕುರಿತು ವಿವಿಧ ರಾಜಕೀಯ ಪಕ್ಷಗಳ ಮುಖಂಡರ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ವಿಶೇಷ ಸಮಗ್ರ ಪರಿಷ್ಕರಣೆಯಲ್ಲಿ ರಾಜಕೀಯ ಪಕ್ಷದವರ ಸಹಕಾರ ಎಲ್ಲ ಹಂತದಲ್ಲಿ ಬೇಕಾಗುತ್ತದೆ. ಎಲ್ಲ ರಾಜಕೀಯ ಪಕ್ಷಗಳು ಪ್ರತಿ ಮತಗಟ್ಟೆಗೆ ಒಬ್ಬ ಬಿ.ಎಲ್.ಎ. ನೇಮಿಸಬೇಕು ಎಂದರು.

ಜೂ.30ರಿಂದ ಜು.29ರವರೆಗೆ ಬೂತ್ ಮಟ್ಟದ ಅಧಿಕಾರಿಗಳು(ಬಿಎಲ್‌ಒ) ಮನೆ ಮನೆಗೆ ಭೇಟಿ ನೀಡಲಿದ್ದಾರೆ. ಈ ವೇಳೆ ದ್ವಿಪ್ರತಿಯಲ್ಲಿ ಎನುಮರೇಷನ್ ಫಾರ್ಮ್ ನೀಡುತ್ತಾರೆ. ಮತದಾರರು ಈ ಫಾರ್ಮ್ ಭರ್ತಿ ಮಾಡಿ, ಸಹಿ ಮಾಡಬೇಕು. ಹೊಸ ಭಾವಚಿತ್ರ ನೀಡಲು ಅವಕಾಶವಿದೆ. ಫಾರ್ಮ್ ಭರ್ತಿ ಮಾಡಲು ಮತದಾರರಿಗೆ ತಿಳಿಯಲಿಲ್ಲ ಎಂದರೆ ಬಿ.ಎಲ್.ಒ.ಗಳು ಭರ್ತಿ ಮಾಡುತ್ತಾರೆ. ಒಂದು ಪ್ರತಿ ಫಾರ್ಮ್ ಮತದಾರರ ಬಳಿ, ಮತ್ತೊಂದು ಬಿ.ಎಲ್.ಒ ಬಳಿ ಇರುತ್ತದೆ ಎಂದರು.

ಪ್ರತಿ ಮನೆಗೆ ಮೂರು ಭಾರಿ ಬಿಎಲ್‌ಒ ಭೇಟಿ ನೀಡಲಿದ್ದಾರೆ. ಗೈರು ಮತದಾರ, ವಾಸಸ್ಥಳ ಬದಲಾವಣೆ, ಮೃತ ಹಾಗೂ ನಕಲು ಮತದಾರರ ಪಟ್ಟಿ ಮಾಡಲಾಗುವುದು. ಅನರ್ಹರನ್ನು ಮತದಾರರ ಪಟ್ಟಿಯಿಂದ ಕೈಬಿಡಲಾಗುವುದು. ಅರ್ಹರು ಮತದಾರರ ಪಟ್ಟಿಯಲ್ಲಿ ಮುಂದುವರೆಯಲಿದ್ದಾರೆ. ಈ ಕಾರ್ಯದಲ್ಲಿ ಬಿ.ಎಲ್.ಒ.ಗಳ ಹಾಗೂ ಬಿ.ಎಲ್.ಎ.ಗಳ ಪಾತ್ರ ಬಹಳ ಮುಖ್ಯವಾಗಿದೆ ಎಂದರು.

ವಯಸ್ಸಿನ ಅಂತರ, 2002ರ ಮತ್ತು 2025ರ ಮತದಾರ ಪಟ್ಟಿಯಲ್ಲಿ ತಂದೆ-ತಾಯಿ ಹೆಸರು ವಿಭಿನ್ನವಾಗಿದ್ದರೆ, ಸಂಬಂಧದ ಕಾಲಂನಲ್ಲಿ ಬೇರೆ ಬೇರೆ ಹೆಸರು ಇದ್ದರೆ ಹಾಗೂ 2002ರಲ್ಲಿ ಗಂಡನೊಂದಿಗೆ 2025ರಲ್ಲಿ ತಂದೆಯೊಂದಿಗೆ ಲಿಂಕೇಜ್ ಆಗಿದ್ದರೆ, ತಂದೆಯರು ವಿಭಿನ್ನವಾಗಿದ್ದರೆ, ಯಾವುದೇ ದಾಖಲೆ ಸಲ್ಲಿಸದೇ ಇರುವುದು ಹಾಗೂ ಕೇವಲ ಆಧಾರ್ ಮಾತ್ರ ಸಲ್ಲಿಕೆ ಪ್ರಕರಣಗಳನ್ನು ಲಾಜಿಕ್ ಎರರ್ಸ್‌/ ತರ್ಕಾಧಾರಿತ ದೋಷಗಳೆಂದು ಪರಿಗಣಿಸಲಾಗುವುದು. ಈ ಕುರಿತು ಪರಿಶೀಲನೆ ನಡೆಸಲಾಗುವುದು ಎಂದು ತಿಳಿಸಿದರು.

ಪ್ರಸ್ತುತ ಜಿಲ್ಲೆಯಲ್ಲಿ 13,35,342 ಮತದಾರರಿದ್ದು, ಈಗಾಗಲೇ 2002ರಲ್ಲಿ ಹಾಗೂ 2025ರ ಮತದಾರರ ಪಟ್ಟಿಯಲ್ಲಿರುವ 12,70,627 ಮತದಾರರ ಮ್ಯಾಪಿಂಗ್ ಮಾಡಲಾಗಿದೆ. 1200 ಜನರಿಗೆ ಒಂದು ಮತಗಟ್ಟೆ ಇರಬೇಕು, ಪ್ರಸ್ತುತ ಗುರುತಿಸಲಾದ ಮತಗಟ್ಟೆಗಳಲ್ಲಿ ಅಧಿಕ ಮತದಾರರು ಮತಗಟ್ಟೆಗೆ ಸೇರ್ಪಡೆಯಾಗಿದ್ದರೆ ಹಾಗೂ ಎರಡು ಕಿ.ಮೀ. ದೂರದಲ್ಲಿ ಮತಗಟ್ಟೆ ಇರುವ ಬಗ್ಗೆ ಪರಿಶೀಲನೆ ಮಾಡಲಾಗುತ್ತಿದೆ. ಒಂದು ಮತಗಟ್ಟೆಯಲ್ಲಿ 1200ಕ್ಕೂ ಹೆಚ್ಚಿನ ಮತದಾರರು ಇದ್ದರೆ ಹೊಸ ಮತಗಟ್ಟೆ ಸ್ಥಾಪನೆ ಅಥವಾ ಕಡಿಮೆ ಮತದಾರರು ಇರುವ ಮತಗಟ್ಟೆಗೆ ವರ್ಗಾಯಿಸಲಾಗುವುದು ಎಂದರು.

ಸಭೆಯಲ್ಲಿ ವಿಧಾನಸಭಾಧ್ಯಕ್ಷ, ಶಾಸಕ ರುದ್ರಪ್ಪ ಲಮಾಣಿ, ಶಾಸಕ ಬಸವರಾಜ ಶಿವಣ್ಣನವರ, ನಗರಾಭಿವೃದ್ಧಿ ಪ್ರಾಧಿಕಾರದ ಅಧ್ಯಕ್ಷ ಎಸ್.ಎಫ್.ಎನ್.ಗಾಜಿಗೌಡ್ರ, ತಾಲೂಕು ಗ್ಯಾರಂಟಿ ಸಮಿತಿ ಅಧ್ಯಕ್ಷ ಎಂ.ಎಂ.ಮೈದೂರು, ಅಪರ ಜಿಲ್ಲಾಧಿಕಾರಿ ಡಾ.ನಾಗರಾಜ ಎಲ್, ಚುನಾವಣಾ ತಹಸೀಲ್ದಾರ್ ಅಮೃತಗೌಡ ಪಾಟೀಲ, ವಿವಿಧ ಪಕ್ಷಗಳ ಮುಖಂಡರಾದ ಶಿವರಾಜ ಸಜ್ಜನರ, ಸಂಜೀವಕುಮಾರ ನೀರಲಗಿ, ಇತರರು ಉಪಸ್ಥಿತರಿದ್ದರು.

ಜಿಲ್ಲೆಯ ಎಲ್ಲ ವಿಧಾನಸಭಾ ಕ್ಷೇತ್ರದ ಮತಗಟ್ಟೆಗಳಿಗೆ 1,482 ಬಿಎಲ್‌ಒ ಹಾಗೂ 148 ಬಿಎಲ್‌ಒ ಮೇಲ್ವಿಚಾರಕರನ್ನು ನೇಮಕ ಮಾಡಲಾಗಿದೆ. ಈಗಾಗಲೇ ಮೊದಲ ಹಂತದಲ್ಲಿ ತರಬೇತಿ ನೀಡಲಾಗಿದೆ. ಜೂನ್ 25ರಂದು ಎರಡನೇ ಹಂತದಲ್ಲಿ ಜಿಲ್ಲೆಯ ಎಲ್ಲ ವಿಧಾನಸಭಾ ಕ್ಷೇತ್ರಗಳಲ್ಲಿ ತರಬೇತಿ ಆಯೋಜಿಸಲಾಗಿದೆ ಎಂದರು.

ಪ್ರತಿ ಮತಗಟ್ಟೆಯಲ್ಲಿ ವೋಟರ್ ಸ್ಪೆಷಲಿಸ್ಟ್ ಸೆಂಟರ್ ತೆರೆಯಲಾಗುವುದು. ಎನುಮರೇಷನ್ ಫಾರ್ಮ್ ಭರ್ತಿ ಸೇರಿದಂತೆ ವಿವಿಧ ಮಾಹಿತಿ ಪಡೆದುಕೊಳ್ಳಬಹುದು ಎಂದು ತಿಳಿಸಿದರು.

ಒಬ್ಬ ಮತದಾರರ ಹೆಸರು ಎರಡು ಮತಗಟ್ಟೆಗಳಲ್ಲಿ ಇರಬಾರದು. ವರ್ಗಾವಣೆ ಹಾಗೂ ಮೃತ ಮತದಾರರ ಹೆಸರು ಕುರಿತು ಪರಿಶೀಲನೆ ನಡೆಸಲಾಗುವುದು. 2002ರಲ್ಲಿ ಎಸ್‌ಐಆರ್‌ಗೆ ಒಳಪಟ್ಟವರು, 2025ರಲ್ಲಿ ಮತದಾರರ ಪಟ್ಟಿಯಲ್ಲಿ ಹೆಸರು ಇದ್ದವರು ಮುಂದುವರೆಯಲಿದ್ದಾರೆ. ತದನಂತರ ಮತದಾರರ ಪಟ್ಟಿಗೆ ಸೇರ್ಪಡೆಯಾದ ಮತದಾರರ ಕುರಿತು ಪರಿಶೀಲನೆ ಮಾಡಲಾಗುವುದು. 2002ರಲ್ಲಿ ಎಸ್‌ಐಆರ್‌ಗೆ ಒಳಪಟ್ಟ ತಂದೆ-ತಾಯಿ, ತಾತ-ಅಜ್ಜಿ ಸೇರಿದಂತೆ ರಕ್ತಸಂಬಂಧಿಗಳ ಆಧಾರದ ಮೇಲೆ ಅಗತ್ಯ ದಾಖಲೆ ಸಲ್ಲಿಸಬೇಕು. ಈ ಬಗ್ಗೆ ಎಲ್ಲ ಮತದಾರರು ಜಾಗೃತಿ ಹೊಂದಬೇಕು ಎಂದು ಡಿಸಿ ತಿಳಿಸಿದರು.

ಎಸ್.ಐ.ಆರ್. ಕುರಿತು ಯಾವುದೇ ಸಂದೇಹಗಳಲ್ಲಿದ್ದಲ್ಲಿ ಜಿಲ್ಲಾ ಮಟ್ಟದಲ್ಲಿ ಸ್ಥಾಪಿಸಲಾದ 1950 ಮತದಾರರ ಸಹಾಯವಾಣಿ ಸಂಪರ್ಕಿಸಬಹುದು ಅಥವಾ ಆಯಾ ತಹಸೀಲ್ದಾರ್ ಕಚೇರಿ ಸಂಪರ್ಕಿಸಬಹುದು ಎಂದು ಡಿಸಿ ತಿಳಿಸಿದರು.

01-07-1987ಕ್ಕಿಂತ ಮೊದಲು ಜನಿಸಿದವರು ಸ್ವಯಂ ಜನ್ಮ ದಿನಾಂಕ-ಸ್ಥಳವನ್ನು ಸ್ಥಾಪಿಸುವ 12 ದಾಖಲೆಗಳ ಪಟ್ಟಿಯಿಂದ ಯಾವುದೇ ದಾಖಲೆ ಸಲ್ಲಿಸಬೇಕು. 01-07-1987ರಿಂದ 02-12-2004ರಲ್ಲಿ ಜನಿಸಿದವರು ಸ್ವಯಂ ಜನ್ಮ ದಿನಾಂಕ/ಸ್ಥಳವನ್ನು ದೃಢಪಡಿಸುವ ದಾಖಲೆ, ತಂದೆ ಅಥವಾ ತಾಯಿ ಜನಿಸಿದ ದಿನಾಂಕ/ಸ್ಥಳವನ್ನು ದೃಢಪಡಿಸುವ ದಾಖಲೆ, ಹಾಗೂ 02-12-2004ರ ನಂತರ ಜನಿಸಿದವರು ಸ್ವಯಂ, ಜನ್ಮ ದಿನಾಂಕ/ಸ್ಥಳವನ್ನು ದೃಢಪಡಿಸುವ ದಾಖಲೆ, ತಂದೆ ಹುಟ್ಟಿದ ದಿನಾಂಕ/ಸ್ಥಳವನ್ನು ದೃಢಪಡಿಸುವ ದಾಖಲೆ, ತಾಯಿ ಹುಟ್ಟಿದ ದಿನಾಂಕ/ಸ್ಥಳವನ್ನು ದೃಢಪಡಿಸುವ ದಾಖಲೆ, ಯಾವುದೇ ಪಾಲಕರು ಭಾರತೀಯರಲ್ಲದಿದ್ದರೆ, ಜನನದ ಸಮಯದಲ್ಲಿ ಪಾಲಕರ ಪಾಸ್‌ಪೋರ್ಟ್ ಮತ್ತು ವೀಸಾ, ಭಾರತದ ಹೊರಗೆ ಜನಿಸಿದವರು ಅಥವಾ ನೈಸರ್ಗಿಕವಾಗಿ ಜನಿಸಿದವರು, ಭಾರತದ ಹೊರಗೆ ಜನನ, ವಿದೇಶದಲ್ಲಿರುವ ಭಾರತೀಯ ಮಿಷನ್‌ನಿಂದ ಜನನ ನೋಂದಣಿ ಪುರಾವೆ, ನೈಸರ್ಗಿಕೀಕರಣ, ಪೌರತ್ವ ನೋಂದಣಿ ಪ್ರಮಾಣಪತ್ರ ಸಲ್ಲಿಸಬೇಕು.