ಪೊಲೀಸ್ ಶ್ವಾನಗಳಿಗೆ ಕೂಲರ್ ಭಾಗ್ಯ; ನಾಲ್ಕು ನಾಯಿಗಳಿಗೆ ತಂಪಾದ ವಾತಾವರಣ ಸೃಷ್ಟಿ; ಬೇಸಿಗೆಯ ಬಿಸಿಶಾಖ ತಣಿಸಲು ಕಸರತ್ತು

ಈ ಬಾರಿ ಬೇಸಿಗೆಯ ತಾಪ ಹೆಚ್ಚುತ್ತಲೇ ಇದೆ. ಜಿಲ್ಲೆಯಲ್ಲೂ ಉಷ್ಣಾಂಶ ಶೇ.38 ದಾಟಿದೆ. ಬಿಸಿಗಾಳಿಗೆ ಪ್ರಾಣಿ, ಪಕ್ಷಿಗಳು ಕುಗ್ಗಿ ಹೋಗಿವೆ. ಜಿಲ್ಲೆಯ ಪೊಲೀಸ್ ಇಲಾಖೆಯ ಶ್ವಾನದಳದಲ್ಲಿನ ನಾಲ್ಕು ಶ್ವಾನಗಳೂ ಬಿಸಿಲಿನಿಂದ ತತ್ತರಿಸಿದ್ದವು. ಏರುತ್ತಿರುವ ತಾಪಮಾನದಿಂದ ಸಮಸ್ಯೆಗೆ ಸಿಲುಕಿದ್ದವು.

ಶ್ವಾನದಳದ ಪಾರು, ಆರ್ಯ, ಸಾನ್ಸಾ ಸೇರಿ ನಾಲ್ಕು ಶ್ವಾನಗಳಿಗೆ ಪ್ರತ್ಯೇಕ ಕೊಠಡಿಯಲ್ಲಿ ಪ್ರತ್ಯೇಕ ನಾಲ್ಕು ಕೂಲರ್‌ಗಳನ್ನು ಅಳವಡಿಸಲಾಗಿದೆ. ಬಿಸಿಲು ಹೆಚ್ಚಾದ ಪರಿಣಾಮ ಮಧ್ಯಾಹ್ನ ಸಪ್ಪೆಯಾಗಿರುವುದು, ತೇಗುವುದು ಕಂಡು ಬರುತ್ತಿತ್ತು. ಕೂಲರ್ ಅಳವಿಡಿಸದ ನಂತರ ಈಗ ಸಾಮಾನ್ಯವಾಗಿ ಆರಾಮದಾಯಕವಾಗಿವೆ ಎಂದು ಶ್ವಾನದಳದ ಸಿಬ್ಬಂದಿ ತಿಳಿಸಿದರು.

ಜಿಲ್ಲಾ ಶ್ವಾನ ದಳದಲ್ಲಿ ಸದ್ಯ ಜರ್ಮನ್ ಶಪರ್ಡ್, ಲ್ಯಾಬ್ರಡಾರ್, ಡಾಬರ್‌ಮನ್ ತಳಿಯ ನಾಲ್ಕು ಶ್ವಾನಗಳಿವೆ. ಅಪರಾಧ, ಬಾಂಬ್ ನಿಷ್ಕ್ರಿಯ ದಳ ವಿಭಾಗದಲ್ಲಿ ಪರಿಣಿತಿ ಪಡೆದಿವೆ. ಕೊಲೆ, ದರೋಡೆ, ಕಳ್ಳತನ, ಮತ್ತಿತರ ಪ್ರಕರಣಗಳಲ್ಲಿ ಆರೋಪಿಗಳ ಪತ್ತೆಗೆ ಇವು ಸಹಾಯ ಮಾಡುತ್ತವೆ. ಪಾರು ಎಂಬ ಶ್ವಾನ ಆಡೂರ ಠಾಣೆ ವ್ಯಾಪ್ತಿಯಲ್ಲಿ ಕಳ್ಳರ ಪತ್ತೆ ಮಾಡಿತ್ತು. ಹಾವೇರಿ ರಾಷ್ಟ್ರೀಯ ಹೆದ್ದಾರಿ ಬಳಿ ಲಾರಿ ಚಾಲಕನ ಹತ್ಯೆಗೈದು, 2 ಕೋಟಿ ರೂ. ಮೌಲ್ಯದ ಸಾಮಗ್ರಿ ಕದ್ದಿದ್ದ ಆರೋಪಿಗಳನ್ನು ಪತ್ತೆ ಹಚ್ಚುವಲ್ಲಿ ಅಧಿಕಾರಿಗಳಿಗೆ ಪ್ರಮುಖ ಸುಳಿವು ನೀಡಿತ್ತು. ಈವರೆಗೆ ಹತ್ತಾರು ಪ್ರಕಣಗಳಲ್ಲಿ ಪಾರು ಆರೋಪಿಗಳ ಪತ್ತೆ ಮಾಡಿದೆ ಎಂದು ಎಸ್‌ಪಿ ಯಶೋಧಾ ಹೇಳಿದರು.