Paddy sowing ಭತ್ತದತ್ತ ಹೊರಳುತ್ತಿರುವ ಹಾನಗಲ್ಲ ರೈತರು

ತಾಲೂಕಿನಲ್ಲಿ ಮುಂಗಾರು ಹಂಗಾಮಿನಲ್ಲಿ 46 ಸಾವಿರ ಹೆಕ್ಟೇರ್ ಪ್ರದೇಶ ಬಿತ್ತೆನಯಾಗುತ್ತದೆ. ಮಳೆ ವ್ಯತ್ಯಾಸ, ಬೆಳೆಯುವ ಖರ್ಚು ಹೆಚ್ಚಳ, ಕೂಲಿಕಾರರ ಹಾಗೂ ಆದಾಯ ಕೊರತೆಯಿಂದಾಗಿ ಭತ್ತದ ಬೆಳೆಯಿಂದ ರೈತರು ದೂರಾಗಿದ್ದರು. ಇದಕ್ಕೆ ಪರ್ಯಾಯವಾಗಿ ಕಡಿಮೆ ಖರ್ಚಿನ ಗೋವಿನಜೋಳದತ್ತ ಮುಖ ಮಾಡಿದ್ದರು. ಹೀಗಾಗಿ, ಭತ್ತದ ಕಣಜವೆಂಬ ಹಣೆಪಟ್ಟಿ ಕಳಚಿತ್ತು.

ಒಂದೂವರೆ ದಶಕದಿಂದ ಪ್ರಮುಖ ಬೆಳೆಯಾಗಿದ್ದ ಗೋವಿನಜೋಳ ಈ ವರ್ಷ ಆಕರ್ಷಣೆ ಕಳೆದುಕೊಂಡಿದೆ. ಕೆಲವರ್ಷಗಳಿಂದ ಗೋವಿನಜೋಳ ಬೆಳೆಗೆ ಮುಳ್ಳು ಸಜ್ಜೆ ಕಳೆ ಕಂಟಕವಾಗಿ ಕಾಡುತ್ತಿದೆ. ಸಣ್ಣದಾಗಿ ಇದ್ದ ಮುಳ್ಳುಸಜ್ಜೆ ಬರಬರುತ್ತ ರೈತರ ಹೊಲಗಳನ್ನೆಲ್ಲ ವ್ಯಾಪಿಸಿಕೊಂಡಿತು. ಇದರ ಹಾವಳಿಗೆ ಗೋವಿನಜೋಳ ಬೆಳೆ ಕುಂಠಿತವಾಗತೊಡಗಿತು. ಮುಳ್ಳು ಸಜ್ಜೆಯು ಯಾವುದೇ ಕಳೆನಾಶಕಕ್ಕೂ ನಾಶವಾಗುತ್ತಿಲ್ಲ. ಫಸಲು ಕೈಗೆ ಸಿಗದಂತಹ ಸ್ಥಿತಿ ಉಂಟಾಗುತ್ತಿರುವುದರಿಂದ ರೈತರು ಗೋವಿನಜೋಳದಿಂದ ದೂರ ಸರಿಯುತ್ತಿದ್ದಾರೆ. ಇದಕ್ಕೆ ಸಾಕ್ಷಿ ಎಂಬಂತೆ ಕಳೆದ ವರ್ಷ 306 ಕ್ವಿಂಟಾಲ್ ಗೋವಿನಜೋಳ ವಿತರಣೆಯಾಗಿತ್ತು. ಈ ಬಾರಿ 350 ಕ್ವಿಂಟಾಲ್ ಬೇಡಿಕೆ ಇತ್ತು. ಆದರೆ, ಈವರೆಗೂ ಕೇವಲ 111 ಕ್ವಿಂಟಾಲ್ ಮಾತ್ರ ಮಾರಾಟವಾಗಿದೆ. ಅಲ್ಲದೆ, ಬೇಡಿಕೆಯೂ ಅಷ್ಟರಮಟ್ಟಿಗೆ ಇಲ್ಲ. ಗೋವಿನಜೋಳದ ಇಳುವರಿ ಕುಸಿತ ಹಾಗೂ ಮಾರುಕಟ್ಟೆಯಲ್ಲಿ ಸರಿಯಾದ ಬೆಲೆ ಸಿಗದಿರುವುದು ಕೂಡ ಕಾರಣವಾಗಿದೆ.