ಪಟ್ಟಣದಲ್ಲಿ ಪ್ರತಿ ವಾರ ಜರುಗುವ ವಾರದ ಶುಕ್ರವಾರ ಸಂತೆಗೆ ಜಾಗದ ಇಕ್ಕಟ್ಟಾಗಿರುವ ಕಾರಣ ಸಂತೆಗೆ ಬರುವ ವ್ಯಾಪಾರಸ್ಥರು, ಗ್ರಾಹಕರು ಹೈರಾಣಾಗುತ್ತಿದ್ದಾರೆ.

ಈ ಸಂತೆಯು ಅನೇಕ ಗ್ರಾಮಗಳ ಜನರಿಗೆ ಆಧಾರವಾಗಿದ್ದು, ದಿನೇದಿನೆ ಜನಸಂಖ್ಯೆ ಬೆಳೆದಂತೆ ವ್ಯಾಪಾರ ವಹಿವಾಟು ಹೆಚ್ಚಾಗುತ್ತಿದೆ. ಶುಕ್ರವಾರದ ಸಂತೆಗೆ ಜಾಗದ ಕೊರತೆ ಇರುವ ಕಾರಣ ವಾರದಿಂದ ವಾರಕ್ಕೆ ಸಮಸ್ಯೆಗಳು ಹೆಚ್ಚಾಗುತ್ತಿವೆ. ಈ ಬಗ್ಗೆ ಅಧಿಕಾರಿಗಳು ಗಮನ ಹರಿಸದೆ ಇರುವುದು ಜನರ ಆಕ್ರೋಶಕ್ಕೆ ಕಾರಣವಾಗಿದೆ.

ಸ್ಥಳೀಯ ಸಂತೆಗೆ ಬ್ಯಾಡಗಿ, ರಾಣೆಬೆನ್ನೂರು, ಹೊನ್ನಾಳಿ, ಶಿಕಾರಿಪುರ, ಹಿರೇಕೆರೂರು ಸೇರಿದಂತೆ ಸುತ್ತಮುತ್ತಲಿನ ತಾಲೂಕು ಸೇರಿದಂತೆ ಹಳ್ಳಿಗಳಿಂದ ವರ್ತಕರು, ವ್ಯಾಪಾರಸ್ಥರು ದೊಡ್ಡ ಪ್ರಮಾಣದಲ್ಲಿ ಇಲ್ಲಿಗೆ ವ್ಯಾಪಾರ ವಹಿವಾಟುಗಳಿಗೆ ಆಗಮಿಸುತ್ತಿದ್ದಾರೆ. ಹೀಗಾಗಿ ಜನದಟ್ಟನೆ ಹೆಚ್ಚಾಗಿ ಜನರು ಮುಂದೆ ಸಾಗಲು ಹರಸಾಹಸ ಪಡುವಂತಾಗಿದೆ.

ಪಟ್ಟಣದ ಹಳೇ ಬಸ್ ನಿಲ್ದಾಣದ ವೃತ್ತದಿಂದ ನೇರವಾಗಿ ಕಾರಂಜಿ ಸರ್ಕಲ್, ತುಮ್ಮಿನಕಟ್ಟೆ ರಸ್ತೆ, ಬೆಲ್ಲದಪೇಟೆಗಳಲ್ಲಿ ಎಂದಿನಂತೆ ಸಾಮಾನ್ಯವಾಗಿ ಸಂತೆ ಜರುಗುತ್ತದೆ. ಈ ಮೊದಲು ಹಿರಿಯರು ಎಲೆ ಪ್ಯಾಟಿ, ತರಕಾರಿ, ಹಣ್ಣು, ಬೆಲ್ಲ, ಅಕ್ಕಿ-ಧವಸ ಧಾನ್ಯ, ಬೆಣ್ಣೆ, ಬೆಲ್ಲ ಹೀಗೆ ಪ್ರತಿಯೊಂದು ಪ್ರತ್ಯೇಕವಾದ ಪ್ಯಾಟಿಗಳ ಹೆಸರಿನಿಂದ ಕರೆಯುತ್ತಿದ್ದರು ಮತ್ತು ನಿಗದಿ ಮಾಡಿದ್ದ ಸ್ಥಳಗಳಲ್ಲಿ ತಮ್ಮ ಸಾಮಾನು ಮಾರಾಟ ಮಾಡುತ್ತಿದ್ದರು. ಆದರೆ, ಇದೀಗ ವ್ಯಾಪಾರಸ್ಥರು, ಕೊಳ್ಳುವ ಗ್ರಾಹಕರು ಹೆಚ್ಚಾಗಿದ್ದಾರೆ. ಆದರೆ, ಸ್ಥಳ ಮಾತ್ರ ಅಷ್ಟೇ ಇರುವ ಕಾರಣ ಶುಕ್ರವಾರ ಸಂತೆ ಮಾಡುವುದು ಎಂದರೆ ಜನರಿಗೆ ಚಿಂತೆ ಆರಂಭವಾಗುತ್ತಿದೆ.

ಸಂತೆ ಸಮಸ್ಯೆ ಅರಿತು ಸ್ಥಳೀಯ ಪಪಂ ಮತ್ತು ಪೊಲೀಸ್ ಇಲಾಖೆಯ ಸಹಯೋಗದೊಂದಿಗೆ ಸಂತೆ ನಡೆಯುವ ರಸ್ತೆಯ ಎರಡು ಬದಿಗಳಲ್ಲಿ ಬಿಳಿ ಸುಣ್ಣದಿಂದ ಮಾರ್ಕಿಂಗ್ ವ್ಯವಸ್ಥೆ ಮಾಡಿ ಯಾರು ಇದನ್ನು ದಾಟದಂತೆ ಸೂಚನೆ ನೀಡಲಾಗುತ್ತಿತ್ತು. ವ್ಯಾಪಾರಸ್ಥರು ರಸ್ತೆಯ ಮಧ್ಯ ಭಾಗದಲ್ಲಿ ಬಾರದಂತೆ ಎಚ್ಚರಿಕೆ ನೀಡಲಾಗುತಿತ್ತು. ಈ ಎಲ್ಲ ಮುನ್ನೆಚ್ಚರಿಕೆ ಕ್ರಮಗಳು ಕಾಲಕ್ರಮೇಣ ಕಡಿಮೆಯಾಗುತ್ತಿರುವುದರಿಂದ ವ್ಯಾಪಾರಸ್ಥರು ಎಲ್ಲೆಂದರಲ್ಲಿ ವ್ಯಾಪಾರ ಮಾಡುತ್ತಿರುವುದು ಸಮಸ್ಯೆಗೆ ಕಾರಣವಾಗಿದೆ. ಇದರಿಂದ ವಾಹನ ಸವಾರು, ಸಾರ್ವಜನಿಕರು ಸಂಚರಿಸಲು ಹರಸಾಹಸ ಪಡುವಂತಾಗಿದೆ. ಇದೇ ಕಾರಣಕ್ಕೆ ಸಂತೆಗೆ ವಿಶಾಲವಾದ ಸ್ಥಳ ನಿಗದಿ ಮಾಡಬೇಕು ಎಂದು ಜನರು ಆಗ್ರಹಿಸಿದ್ದಾರೆ.

ಸಂತೆಯಲ್ಲಿ ನೂಕುನುಗ್ಗಲು ಇರುವ ಕಾರಣ ಕಳ್ಳರು ಕೈಚಳಕ ತೋರಲು ಸುಲಭವಾಗಿದೆ. ಪ್ರತಿ ವಾರ ಸಂತೆಯಲ್ಲಿ ಮೊಬೈಲ್, ಪರ್ಸ್, ಬೈಕ್ ಕಳ್ಳತನ ಪ್ರಕರಣ ಹೆಚ್ಚಾಗುತ್ತಿದೆ. ಸಂತೆಗೆ ಬರುವ ಪ್ರತಿಯೊಬ್ಬರು ಎಚ್ಚರಿಕೆಯಿಂದ ಇರುವುದು ಅವಶ್ಯಕವಾಗಿದೆ.