Run city buses ಬ್ಯಾಡಗಿಯಲ್ಲಿ ಸಿಟಿ ಬಸ್​ ಓಡಿಸಲು ಬೇಡಿಕೆ

ಕಟ್ಟಡ ತೆರವು ಕಾರ್ಯಾಚರಣೆ ಹಿನ್ನೆಲೆಯಲ್ಲಿ ಪಟ್ಟಣದ ಬಸ್​ ನಿಲ್ದಾಣ ಬಂದ್​ ಮಾಡಲಾಗಿದೆ. ಹೀಗಾಗಿ, ರಾಣೆಬೆನ್ನೂರು, ಹಾವೇರಿ, ಹಿರೇಕೆರೂರು, ತಿಳವಳ್ಳಿ ಮಾರ್ಗದಲ್ಲಿ ಸಂಚರಿಸುವ ಬಸ್​ಗಳಿಗೆ ಸಾರ್ವಜನಿಕರು ತಡಕಾಡುವಂತಾಗಿದೆ. ಅದರಲ್ಲೂ ಬಿರುಬಿಸಿಲಿನಲ್ಲಿ ನಿಂತುಕೊಳ್ಳಲು ತಂಗುದಾಣವಿಲ್ಲದೆ ಸುಸ್ತಾಗಿದ್ದಾರೆ.

ಹಾವೇರಿ ಕಡೆ ತೆರಳಲು ಹಳೇಪೊಲೀಸ್​ ಠಾಣೆ ಬಳಿ, ರಾಣೆಬೆನ್ನೂರು, ದಾವಣಗೆರೆಗೆ ತೆರಳಲು ಕದರಮಂಡಲಗಿ ಕ್ರಾಸ್​, ತಿಳವಳ್ಳಿ ಹಾಗೂ ಹಿರೇಕೆರೂರು ಕಡೆಗೆ ತೆರಳಲು ಮಾಸಣಗಿ ಕ್ರಾಸ್​ ಬಳಿ ಬಸ್​ ನಿಲುಗಡೆಗೆ ಸ್ಥಳ ಗುರುತಿಸಲಾಗಿದೆ. ಆದರೆ, ಪರಸ್ಥಳದಿಂದ ಬಂದು- ಹೋಗುವ ನೂರಾರು ಪ್ರಯಾಣಿಕರು ಮಾಹಿತಿ ಕೊರತೆಯಿಂದ ತೊಂದರೆ ಅನುಭವಿಸುತ್ತಿದ್ದಾರೆ. ವೃದ್ಧರು, ಅಂಗವಿಕಲರು, ಮಹಿಳೆಯರ ಗೋಳಾಟ ಹೆಚ್ಚಾಗಿದ್ದು, ಖಾಸಗಿ ವಾಹನಗಳ ಪ್ರಯಾಣ ತುಸು ದುಬಾರಿಯಾಗುತ್ತಿದೆ. ಕಟ್ಟಡ ತೆರವು ನಂತರ ಹೊಸ ರಸ್ತೆ ಕಾಮಗಾರಿಗೆ ಸುಮಾರು ನಾಲ್ಕಾರು ತಿಂಗಳು ಅವಧಿ ಹಿಡಿಯಬಹುದು. ಅಲ್ಲಿಯವರೆಗೂ ಜನರಿಗೆ ಮಳೆ ಹಾಗೂ ಬಿಸಿಲು ರಣೆ ಪಡೆಯಲು ತಾತ್ಕಾಲಿಕ ತಂಗುದಾಣದ ಅಗತ್ಯವಿದೆ. 

ಸಿಟಿ ಬಸ್​ ಓಡಿಸಿ: ರಸ್ತೆ ಕಾಮಗಾರಿ ಹಿನ್ನೆಲೆಯಲ್ಲಿ ಪ್ರತಿದಿನ ಶಾಲಾ&ಕಾಲೇಜ್​ ವಿದ್ಯಾಥಿರ್ಗಳು, ಹಿರಿಜೀವಿಗಳು, ಅಂಗವಿಕಲರು ಓಡಾಡಲು ಸಾಕಷ್ಟು ತೊಂದರೆ ಅನುಭವಿಸಬೇಕಿದೆ. ಹಾವೇರಿಗೆ ಹೋಗುವ ನೂರಾರು ಪ್ರಯಾಣಿಕರು ಹಿರೇಕೆರೂರು, ತಿಳವಳ್ಳಿ ಮಾರ್ಗದ ಬಸ್​ ನಿಲ್ದಾಣದಿಂದ ಸುಮಾರು 2 ಕಿ.ಮೀ. ತೆರಳಬೇಕಿದೆ. ಹಳೇಪೊಲೀಸ್​ ಠಾಣೆಗೂ ಈಗಿನ ತಾತ್ಕಾಲಿಕ ನಿಲ್ದಾಣಗಳಿಗೆ 2 ಕಿ.ಮೀ. ಅಂತರವಿದೆ. ಈ ಹಿನ್ನೆಲೆಯಲ್ಲಿ ಸಿಟಿ ಬಸ್​ ಓಡಿಸಬೇಕಿದೆ. ಪಟ್ಟಣ ವ್ಯಾಪ್ತಿಯಲ್ಲಿ ಸಂಚರಿಸಲು 10 ರೂಪಾಯಿ ಟಿಕೆಟ್​ ದರ ನಿಗದಿಪಡಿಸಿ ಬಸ್​ ಓಡಿಸುವ ಮೂಲಕ ಅನುಕೂಲ ಕಲ್ಪಿಸಬೇಕಿದೆ ಎನ್ನುವುದು ಸಾರ್ವಜನಿಕರ ಕೂಗು.

ಮೋಟೆಬೆನ್ನೂರಿನಿಂದ ರೈಲು ನಿಲ್ದಾಣ, ಹಳೇಪೊಲೀಸ್​ ಠಾಣೆ, ಸುಭಾಸ ಸರ್ಕಲ್​, ಕದರಮಂಡಲಗಿ ಕ್ರಾಸ್​, ಕಲಾಭವನ, ಸರ್ಕಾರಿ ಆಸ್ಪತ್ರೆ, ಅಗಸನಹಳ್ಳಿ, ಪದವಿ ಕಾಲೇಜ್​, ಡಿಪ್ಲೋಮಾ ಕಾಲೇಜ್​ ಮಾರ್ಗದಿಂದ ಶಿಡೇನೂರಿಗೆ ಮಿನಿ ಬಸ್​ ಓಡಿಸಿದರೆ ಎಲ್ಲರಿಗೂ ಅನುಕೂಲವಾಗಲಿದೆ. ಈ ಕುರಿತು ಸ್ಥಳಿಯ ಶಾಸಕರು, ಸಾರಿಗೆ ಸಂಸ್ಥೆ ಅಧಿಕಾರಿಗಳು ಕ್ರಮ ವಹಿಸಬೇಕು ಎಂಬುದು ಸ್ಥಳಿಯರ ಒತ್ತಾಯವಾಗಿದೆ.