ಹಾವೇರಿ: ಈ ಬಾರಿ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ ನಾನು ರ್ಯಾಂಕ್ ಪಡೆದುಕೊಳ್ಳುತ್ತೇನೆ ಎಂದು ಸಂಕಲ್ಪ ಮಾಡಿ ಮೂರು ತಿಂಗಳು ಶ್ರದ್ಧೆಯಿಂದ ವಿದ್ಯಾಭ್ಯಾಸ ಮಾಡಿ. ಖಂಡಿತ ಯಶಸ್ಸು ನಿಮ್ಮದಾಗುತ್ತದೆ ಎಂದು ಹಾವೇರಿ ಹಾಗೂ ರಾಣೆಬೆನ್ನೂರಿನ ಎಂಆರ್ಎಂ ಪಿಯು ಕಾಲೇಜ್ನ ಚೇರ್ಮನ್ ರಾಮ ಮೋಹನ ರಾವ್ ವಿದ್ಯಾರ್ಥಿಗಳಿಗೆ ಕಿವಿಮಾತು ಹೇಳಿದರು. ಇಲ್ಲಿನ ಜಿಲ್ಲಾ ಗುರುಭವನದಲ್ಲಿ ಶಾಲಾ ಶಿಕ್ಷಣ ಇಲಾಖೆ, ಜಿಲ್ಲಾ ಪಂಚಾಯಿತಿ, ಹಾವೇರಿ ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ ಹಾಗೂ ಎಂಆರ್ಎಂ ಪಿಯು ಕಾಲೇಜ್ ಸಹಯೋಗದಲ್ಲಿ ಬುಧವಾರ ಹಮ್ಮಿಕೊಂಡಿದ್ದ ‘ಎಸ್ಎಸ್ಎಲ್ಸಿ ವಿದ್ಯಾರ್ಥಿಗಳಿಗೆ ಪ್ರೇರಣಾ ಕಾರ್ಯಕ್ರಮ’ದಲ್ಲಿ ಮುಖ್ಯ ಉಪನ್ಯಾಸಕರಾಗಿ ಪಾಲ್ಗೊಂಡು ಮಾತನಾಡಿದರು. ಓದುವ ಮಧ್ಯದಲ್ಲಿ ಸಣ್ಣ ಸಣ್ಣ ವ್ಯಾಯಾಮ, ಸಣ್ಣ ವಾಕಿಂಗ್ ಮಾಡಿ. ಹೊಟ್ಟೆ ಬಿರಿಯುವಂತೆ ತಿಂದರೆ ತರಗತಿಯಲ್ಲೂ ಹಾಯಾದ ನಿದ್ದೆ ಬರುತ್ತದೆ. ಓದುವಾಗ ನಿದ್ದೆ ಬರಬಾರದು ಎಂದರೆ ಊಟ ಮಾಡುವಾಗ ಹೊಟ್ಟೆ ತುಂಬ ತಿನ್ನದೇ ಅರ್ಧ ಭಾಗ ಮಾತ್ರ ಸೇವಿಸಿ, ಕಾಲು ಭಾಗ ನೀರು, ಕಾಲು ಭಾಗ ಖಾಲಿ ಬಿಡಿ ಎಂದರು. ಪ್ರಶ್ನೆಪತ್ರಿಕೆ ನೋಡಿ ಬಹುತೇಕ ವಿದ್ಯಾರ್ಥಿಗಳು ಬಹಳ ಸುಲಭ ಇತ್ತು ಎನ್ನುತ್ತಾರೆ. ಆದರೆ, ಕೆಲವರು ಮಾತ್ರ ರ್ಯಾಂಕ್ ಬರುತ್ತಾರೆ. ಪ್ರಶ್ನೆಗಳನ್ನು ಓದಿ ಸರಿಯಾಗಿ ಅರ್ಥ ಮಾಡಿಕೊಳ್ಳುವುದು ಒಂದು ಕಲೆ. ಅದನ್ನು ಸರಿಯಾಗಿ ಅರ್ಥೈಸಿಕೊಳ್ಳಬೇಕು. ಬೆಳಗ್ಗೆ 4.30ರಿಂದ 6.30ರವರೆಗಿನ ಬ್ರಾಹ್ಮಿ ಮುಹೂರ್ತ ಓದಿಗೆ ಅತ್ಯಂತ ಸೂಕ್ತವಾದ ಸಮಯ. ರಾತ್ರಿ 9 ಗಂಟೆ ನಂತರ ಏನೇ ಓದಿದರೂ ಮೆದುಳಿನ ನೋಂದಣಿ ಶಕ್ತಿ ಶೇ.50ರಷ್ಟು ಮಾತ್ರ ಇರುತ್ತದೆ. ಬೆಳಗ್ಗೆ ಓದಿದರೆ ಶೇ.100ರಷ್ಟು ಇರುತ್ತದೆ. ರಾತ್ರಿ ನಾಲ್ಕು ತಾಸು ಓದುವುದು ಬೆಳಗ್ಗೆ ಎರಡು ತಾಸು ಓದುವುದು ಒಂದೇ ಎಂದರು.
