ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಮಾತನಾಡಿದ ಅವರು, 1980ರಲ್ಲಿ ಕುಮಾರೇಶ್ವರ ಕಾಲೇಜು ಆರಂಭಗೊಂಡಿದ್ದು, 4 ದಶಕಗಳವರೆಗೂ ನಮಗೆ ಇಂಥ ಅವಕಾಶ ದೊರಕಿರಲಿಲ್ಲ. ಹಾವೇರಿಯ ಕವಿವಿ ವ್ಯಾಪ್ತಿಯಲ್ಲಿ ಬರುವ ಜಿಲ್ಲೆಯ 40 ಪದವಿ ಕಾಲೇಜುಗಳ ಅಂತಿಮ ವರ್ಷದ 1600 ವಿದ್ಯಾರ್ಥಿಗಳು ವಿವಿಧ ಸ್ಪರ್ಧೆಗಳಲ್ಲಿ ಪಾಲ್ಗೊಳ್ಳಲಿದ್ದಾರೆ. ಯುವಜನೋತ್ಸವದಲ್ಲಿ ಪ್ರತಿ ಕಾಲೇಜಿನಿಂದ 40 ವಿದ್ಯಾರ್ಥಿಗಳು ಸ್ಪರ್ಧೆಯಲ್ಲಿ ಭಾಗವಹಿಸಲಿದ್ದಾರೆ. ಶಾಸ್ತ್ರೀಯ ಸಂಗೀತ, ಪಾಶ್ಚಾತ್ಯ ಸಂಗೀತ, ಶಾಸ್ತ್ರೀಯ ವಾದ್ಯ ಸಂಗೀತ, ಸಮೂಹ ಗಾಯನ, ಜಾನಪದ ಆರ್ಕೆಸ್ಟ್ರಾ, ಜಾನಪದ ಹಾಗೂ ಬುಡಕಟ್ಟು ನೃತ್ಯ, ಶಾಸ್ತ್ರೀಯ ನೃತ್ಯ, ರಸಪ್ರಶ್ನೆ, ಆಶುಭಾಷಣ, ಚರ್ಚಾಸ್ಪರ್ಧೆ ಇತರ ಸಾಹಿತ್ಯಾತ್ಮಕ ಚಟುವಟಿಕೆಗಳು, ಏಕಾಂಕ ನಾಟಕ, ಕಿರುನಾಟಕ, ಅಣಕು ನಾಟಕ, ಮಿಮಿಕ್ರಿ ಹಾಗೂ ಪೇಂಟಿಂಗ್, ಕೋಲಾಜ್, ಪೋಸ್ಟರ್ ಮೇಕಿಂಗ್, ಕ್ಲೇ ಮಾಡೆಲಿಂಗ್, ಕಾರ್ಟೂನಿಂಗ್, ರಂಗೋಲಿ, ಸ್ಪಾಟ್ ಫೊಟೋಗ್ರಫಿ, ಇನ್ಸ್ಟಾಲೇಶನ್, ಮೆಹಂದಿ ಸೇರಿದಂತೆ ವಿವಿಧ ಲಲಿತಕಲೆಗಳ ಒಟ್ಟು 5 ವಿಭಾಗಗಳಲ್ಲಿ 27 ಸ್ಪರ್ಧೆಗಳನ್ನು ಏರ್ಪಡಿಸಲಾಗಿದೆ. ಓರ್ವ ವಿದ್ಯಾರ್ಥಿ ಗರಿಷ್ಠ 4 ಸ್ಪರ್ಧೆಗಳಲ್ಲಿ ಮಾತ್ರ ಪಾಲ್ಗೊಳ್ಳಬಹುದಾಗಿದೆ. ಈ ಹಿಂದೆ ನಡೆದಿರುವ ಕವಿವಿ ಮಟ್ಟದ ಯುವಜನೋತ್ಸವದಲ್ಲಿ ನಮ್ಮ ಕಾಲೇಜು ಇಲ್ಲಿಯವರೆಗೆ ಸುಮಾರು 4 ಸಾವಿರ ಬಹುಮಾನಗಳನ್ನು ಪಡೆದುಕೊಂಡಿದೆ ಎಂದು ವಿವರಿಸಿದರು.
