ಚಾಲುಕ್ಯ ಶಿಲ್ಪಕಲೆ ಶೈಲಿಯ ಹತ್ತಾರು ಗುಡಿ, ಗೋಪುರಗಳಿವೆ. ಶ್ರೀಮಂತ ಪರಂಪರೆಯನ್ನು ಹೊಂದಿರುವ ಜಿಲ್ಲೆಯಿಂದ ಅನೇಕ ಸಾಧು ಸಂತರು ಜಗತ್ ಪ್ರಸಿದ್ಧಿ ಪಡೆದಿದ್ದಾರೆ. ಶ್ರೀಮಂತ ನೈಸರ್ಗಿಕ ಸಂಪತ್ತೂ ಇಲ್ಲಿದೆ. ಕನಕದಾಸರ ಕಾಗಿನೆಲೆ, ಬಾಡ ಕನಕದಾಸರ ಅರಮನೆ, ಷರೀಫಜ್ಜನ ಶಿಶುನಾಳ, ಗಳಗನಾಥ, ಚೌಡಯ್ಯದಾನಪುರ, ಮದಗದ ಕೆರೆ, ಸರ್ವಜ್ಞನ ಜನ್ಮಸ್ಥಳ ಅಬಲೂರ, ಕದರಮಂಡಲಗಿ ಕಾಂತೇಶ, ಸಾತೇನಹಳ್ಳಿ ಕಾಂತೇಶ ದೇಗುಲ, ದೇವರಗುಡ್ಡ ಮಾಲತೇಶ ಸ್ವಾಮಿ ದೇವಸ್ಥಾನ, ಐರಣಿ ಹೊಳೆಮಠ, ರಾಣೆಬೆನ್ನೂರ ಕೃಷ್ಣಮೃಗ ಅಭಯಾರಣ್ಯ, ಬಂಕಾಪುರ ನವಿಲುಧಾಮ, ಸವಣೂರ ದೊಡ್ಡಹುಣಸೆಮರ ಮಠ, ನವಾಬರ ಬಂಗಲೆ, ವಿಷ್ಣುತೀರ್ಥ, ಸೇರಿದಂತೆ ಮತ್ತಿತರ ಅನೇಕ ಪ್ರವಾಸಿ ತಾಣಗಳಿವೆ. ಆದರೆ, ಸೂಕ್ತ ಪ್ರಚಾರ, ಮೂಲ ಸೌಲಭ್ಯ, ಭದ್ರತೆ ಕಲ್ಪಿಸಿಲ್ಲ. ಹಾಗಾಗಿ, ಈ ಸ್ಥಳಗಳು ನಿರೀಕ್ಷಿತ ಮಟ್ಟದಲ್ಲಿ ಅಭಿವೃದ್ಧಿ ಹೊಂದಿಲ್ಲ. ಹೊಸದಾಗಿ ಘೋಷಿಸಿರುವ 15 ಪ್ರವಾಸಿ ತಾಣಗಳು ಸೇರಿ ಜಿಲ್ಲೆಯ 36 ಪ್ರವಾಸಿ ತಾಣಗಳಿಗೆ ಅಗತ್ಯವಾದ ಅನುದಾನ ಬಿಡುಗಡೆ ಮಾಡಬೇಕು. ಅಭಿವೃದ್ಧಿಗೆ ಸಮಗ್ರವಾದ ರೂಪುರೇಷೆ ಸಿದ್ಧಪಡಿಸಬೇಕು. ಹೊರ ಜಿಲ್ಲೆ, ರಾಜ್ಯಗಳ ಜನರಿಗೆ ತಿಳಿಯುವಂತೆ ಅಗತ್ಯ ಪ್ರಚಾರ ಕಾರ್ಯ ಕೈಗೊಳ್ಳಬೇಕು. ರಸ್ತೆ, ಕುಡಿಯುವ ನೀರು, ಸಾರಿಗೆ ಸೌಕರ್ಯ, ಸಿಸಿಟಿವಿ ಕ್ಯಾಮರಾ, ಮೆಟಲ್ ಡಿಟೆಕ್ಟರ್ ಅಳವಡಿಕೆ, ಭದ್ರತಾ ಸಿಬ್ಬಂದಿ ನೇಮಕ, ಪ್ರಚಾರ, ಮಾಹಿತಿ ಒದಗಿಸುವ ಕೆಲಸ ಸರ್ಕಾರ ಮತ್ತು ಜಿಲ್ಲಾಡಳಿತದಿಂದ ಆಗಬೇಕು ಎಂಬುದು ಜಿಲ್ಲೆಯ ಜನತೆಯ ಆಗ್ರಹವಾಗಿದೆ.
