ವಚನಗಳನ್ನು ಬದುಕಿನಲ್ಲಿ ಅಳವಡಿಸಿಕೊಳ್ಳಿ; ಶರಣ ಸಾಹಿತ್ಯ ಪರಿಷತ್ತಿನ ಸಂಸ್ಥಾಪನಾ ದಿನಾಚರಣೆಯಲ್ಲಿ ಕೊಟ್ರೇಶ ಬಿಜಾಪೂರ ಹೇಳಿಕೆ

ಹಾವೇರಿ: ಸ್ವಸ್ಥ ಬದುಕಿನ ಸಪ್ತ ಸೂತ್ರ ಹಾಗೂ ಸನ್ಮಾರ್ಗದ ಚಿಂತನೆಗಳು ವಚನಗಳಲ್ಲಿ ಅತ್ಯಂತ ಸರಳವಾಗಿ ಅಭಿವ್ಯಕ್ತಿಯಾಗಿದ್ದು, ಇವುಗಳನ್ನು ಬದುಕಿಗೆ ಅಳವಡಿಸಿಕೊಳ್ಳುವುದು ಈಗಿನ ಅತ್ಯಂತ ಅಗತ್ಯವಾದ ಸಂಗತಿ ಎಂದು ನಿವೃತ್ತ ಪ್ರಾಧ್ಯಾಪಕ ಕೊಟ್ರೇಶ ಬಿಜಾಪೂರ ತಿಳಿಸಿದರು.

ನಗರದ ಭಗತ್ ಸಮೂಹ ಸಂಸ್ಥೆ ಭಗತ್‌ಸಿಂಗ್ ಪಿಯು ಕಾಲೇಜ್‌ನಲ್ಲಿ ಗುರುವಾರ ಆಯೋಜಿಸಿದ್ದ ಅಖಿಲ ಭಾರತ ಶರಣ ಸಾಹಿತ್ಯ ಪರಿಷತ್ತಿನ ಸಂಸ್ಥಾಪನಾ ದಿನಾಚರಣೆ ಸಮಾರಂಭ ಉದ್ಘಾಟಿಸಿ ಅವರು ಮಾತನಾಡಿದರು.

ದ್ವೇಷ, ಅಸೂಹೆಗಳಿಂದ ದೂರವಾಗಿ ಮಾನವೀಯ ಮೌಲ್ಯಗಳನ್ನು ಅಳವಡಿಸಿಕೊಂಡು, ವೈಷಮ್ಯರಹಿತ ಬದುಕನ್ನು ನಮ್ಮದಾಗಿಸಿಕೊಳ್ಳಬೇಕಾಗಿದೆ. ಶುಚಿಯಾದ ಸಮಾಧಾನಕಕರ ಬದುಕಿಗೆ ಬೇಕಾಗುವ ಎಲ್ಲ ಮಾರ್ಗದರ್ಶನ ವಚನಗಳಲ್ಲಿದೆ. ಇಂತಹ ವಚನಗಳ ಪ್ರಚಾರ, ಪ್ರಸಾರಕ್ಕಾಗಿಯೇ ಶರಣ ಸಾಹಿತ್ಯ ಪರಿಷತ್ತು ಸೇವೆ ಸಲ್ಲಿಸುತ್ತಿದೆ. ಮಕ್ಕಳು ಯುವಕರಿಗೆ ವಚನಗಳನ್ನು ತಲುಪಿಸುವ ಕಾರ್ಯ ಆಗಬೇಕಿದೆ ಎಂದರು.

ಶರಣ ಸಾಹಿತ್ಯ ಪರಿಷತ್ ಯುವ ಘಟಕದ ಜಿಲ್ಲಾಧ್ಯಕ್ಷ ಜಗದೀಶ ಹತ್ತಿಕೋಟಿ, ಜ್ಞಾನವೇ ನಿಜವಾದ ಗುರು. ಅರಿವು, ಸದಾಚಾರ ಮೂಡಿಸುವವನೆ ನಿಜವಾದ ಗುರು ಸ್ಥಾನಕ್ಕೆ ಯೋಗ್ಯ. ಗುರು ಅಂದರೆ ಬೆಳಕು. ಅರಿವಿನ ಕಣ್ಣಿನಿಂದ ನೋಡಿದರೆ ಎಲ್ಲವೂ ಸರಿಯಾಗಿ ಕಾಣಬಲ್ಲದು. ಮೌಢ್ಯದಿಂದ ದೂರವಾಗಿ ಮೌಲ್ಯಗಳನ್ನು ಅಳವಡಿಸಿಕೊಂಡು ಆತ್ಮಾವಲೋಕನದಿಂದ ಬದುಕುವುದೇ ನಿಜವಾದ ಜೀವನ. ಎಲ್ಲ ಸಂದರ್ಭಕ್ಕೆ ಬೇಕಾಗುವ ಮೌಲ್ಯಗಳನ್ನು ನೀಡುವ ಶಕ್ತಿ ವಚನಕ್ಕಿದೆ. ಅವುಗಳನ್ನು ಅರಿಯುವ ಪ್ರಾಮಾಣಿಕ ಪ್ರಯತ್ನ ನಡೆಯಬೇಕು. ಕತ್ತಲೆಯಿಂದ ಬೆಳಕಿನೆಡೆಗೆ ನಡೆದರೆ ಅದುವೇ ಸಾರ್ಥಕ ಜೀವನ. ಅಂತಹ ಸಂಕಲ್ಪ ನಮ್ಮದಾಗಲಿ ಎಂದರು.

ಅಧ್ಯಕ್ಷತೆ ವಹಿಸಿದ್ದ ಭಗತ್ ಸಮೂಹ ಸಂಸ್ಥೆಯ ಅಧ್ಯಕ್ಷ ಎಂ.ಬಿ.ಸತೀಶ ಮಾತನಾಡಿ, ಶರಣರ ಇತಿಹಾಸವನ್ನೂ ಎಲ್ಲರೂ ಅರಿಯೋಣ. ಅವರ ಸತ್ವಯುತ ಬೋಧನೆಗಳು ಅತ್ಯಂತ ಸರಳ ಹಾಗೂ ಸಮಾಜಮುಖಿ ಆಗಿವೆ. ಎಲ್ಲ ಮನೆ ಮನಗಳು ವಚನಗಳತ್ತ ನಡೆದರೆ ಉತ್ತಮ ಸಮಾಜ ನಿರ್ಮಾಣ ಸಾಧ್ಯ ಎಂದರು.

ಜಿಲ್ಲಾ ಶರಣ ಸಾಹಿತ್ಯ ಪರಿಷತ್ ಅಧ್ಯಕ್ಷ ಪ್ರೊ.ಮಾರುತಿ ಶಿಡ್ಲಾಪೂರ, ನಿವೃತ್ತ ಉಪನ್ಯಾಸಕ ಎಸ್.ಆರ್.ಮಠಪತಿ, ಶಸಾಪ ಉಪಾಧ್ಯಕ್ಷೆ ಅನಿತಾ ಉಪಲಿ, ಇತರರಿದ್ದರು.

ವೀಣಾ ಇಪ್ಪಿಕೊಪ್ಪ ವಚನ ಪ್ರಾರ್ಥನೆ ಮಾಡಿದರು. ಉಪನ್ಯಾಸಕಿ ದೀಪಾ ಸ್ವಾಗತಿಸಿದರು. ಉಪನ್ಯಾಸಕ ಬಸವರಾಜಪ್ಪ ಕೆ.ನಿರೂಪಿಸಿದರು. ಉಪನ್ಯಾಸಕಿ ಆಸ್ಮಾ ತಳಕಲ್ಲ ವಂದಿಸಿದರು.