ರಾಮಭಕ್ತಿಯಲ್ಲಿ ಮಿಂದೆದ್ದ ಭಕ್ತರು; ಜಿಲ್ಲೆಯ ಹಲವೆಡೆ ರಾಮ ತಾರಕ ಯಾಗ, ಹೋಮ, ಹವನ, ವಿಶೇಷ ಪೂಜೆ

ಹಾವೇರಿ: ಅಯೋಧ್ಯೆಯಲ್ಲಿ ಬಾಲರಾಮನ ಪಟ್ಟಾಭಿಷೇಕ ಆಗುತ್ತಿದ್ದ ಸಂದರ್ಭದಲ್ಲಿ ಸೋಮವಾರ ಜಿಲ್ಲೆಯಲ್ಲೂ ಶ್ರೀರಾಮನಿಗೆ ವಿಶೇಷ ಪೂಜೆ, ಯಾಗ, ಹೋಮ, ಹವನ, ಪಾನಕ ವಿತರಣೆ, ಅನ್ನಸಂತರ್ಪಣೆ ನಡೆಯಿತು. ರಾಮನ ಭಕ್ತಿಯಲ್ಲಿ ಮಿಂದೆದ್ದ ಭಕ್ತರಿಂದ ಎಲ್ಲೆಲ್ಲೂ ಜೈ ಶ್ರೀರಾಮ್ ಉದ್ಘೋಷ ಕೇಳಿಬಂತು.
ಜಿಲ್ಲೆಯ ವಿವಿಧ ಮಠ- ಮಂದಿರಗಳಲ್ಲಿ ಸಹಸ್ರಾರು ಭಕ್ತರು ಬೆಳಗ್ಗೆಯಿಂದಲೇ ಶುಭ್ರ ಉಡುಪು ಧರಿಸಿ ರಾಮ ನಾಮ ಜಪದಲ್ಲಿ ತೊಡಗಿದ್ದರು. ವಿಶೇಷ ಪೂಜೆ ನೆರವೇರಿಸಿ ರಾಮಭಜನೆ ಮಾಡಿದರು. ಹಳ್ಳಿ ಹಳ್ಳಿಗಳಲ್ಲಿ ರಸ್ತೆಯ ಇಕ್ಕೆಲಗಳಲ್ಲಿ ಶ್ರೀರಾಮನ ಭಾವಚಿತ್ರಕ್ಕೆ ಪೂಜೆ ಸಲ್ಲಿಸಿ, ಪ್ರಸಾದ, ಪಾನಕ ವಿತರಿಸಿದ್ದು ಕಂಡು ಬಂತು.