ಈರುಳ್ಳಿ ಬೆಲೆ ಪಾತಾಳಕ್ಕೆ ಕುಸಿಯುತ್ತಿದ್ದು, ರಾಜ್ಯದ ಈರುಳ್ಳಿ ಬೆಳೆಗಾರರ ಪಾಲಿಗೆ ‘ಈರುಳ್ಳಿ’ ಈಬಾರಿ ‘ಕಣ್ಣೀರುಳ್ಳಿ’ ಆಗಿ ಪರಿಣಮಿಸಿದೆ. ದರ ಏರಿಕೆ ಕಾಣದ ಹಿನ್ನೆಲೆಯಲ್ಲಿ ಹೊಲದಲ್ಲೇ ರಾಶಿ ರಾಶಿ ಈರುಳ್ಳಿ ಮಳೆಗೆ ಕೊಳೆತು ಹೋಗುತ್ತಿದೆ. ಇದರ ಜತೆಗೆ ರೈತರ ಕಣ್ಣೀರೂ ಸೇರಿಕೊಂಡಿದೆ. ಕಳೆದ ವರ್ಷ ಈರುಳ್ಳಿ ದರ ಉತ್ತಮವಾಗಿದ್ದರೂ ಇಳುವರಿ ಕಡಿಮೆಯಾಗಿತ್ತು. ಈ ಬಾರಿ ಮುಂಗಾರು ಮಳೆ ಉತ್ತಮವಾಗಿದ್ದರಿಂದ ಈರುಳ್ಳಿ ಬೆಳೆದ ರೈತರು ಉತ್ತಮ ಆದಾಯ ಪಡೆದು ದೀಪಾವಳಿ ಹಬ್ಬ ಆಚರಿಸಲು ಮುಂದಾಗಿದ್ದರು. ಆದರೆ, ಈರುಳ್ಳಿ ಬೆಲೆ ಕುಸಿತ ಬೆಳೆಗಾರರನ್ನು ಸಂಕಷ್ಟಕ್ಕೆ ಸಿಲುಕಿಸಿದೆ. ಕಳೆದ ಒಂದು ತಿಂಗಳಿನಿಂದ ರಾಣೆಬೆನ್ನೂರ, ಹಾವೇರಿ, ಇತರ ತಾಲೂಕುಗಳ ರೈತರು ಈರುಳ್ಳಿ ಕಟಾವು ಮಾಡಿ ಹೊಲದಲ್ಲಿ ಗುಡ್ಡೆ ಹಾಕಿದ್ದಾರೆ. ಈರುಳ್ಳಿ ದರ ಕುಸಿತದಿಂದಾಗಿ ಮಾರುಕಟ್ಟೆಗೆ ಸಾಗಿಸಲು ಹಿಂದೇಟು ಹಾಕುತ್ತಿದ್ದಾರೆ. ದರ ಹೆಚ್ಚಾದಾಗ ತೆಗೆದುಕೊಂಡು ಹೋಗಲು ಕಾಯುತ್ತಿದ್ದಾರೆ. ಈ ನಡುವೆ ಮಳೆ ಮತ್ತೆ ಶುರುವಾಗಿರುವ ಪರಿಣಾಮ ಹೊಲದಲ್ಲೇ ಈರುಳ್ಳಿ ಕೊಳೆತು ಹೋಗುತ್ತಿವೆ. ಜಿಲ್ಲೆಯಲ್ಲಿ 773 ಹೆಕ್ಟೇರ್ ಈರುಳ್ಳಿ ಬೆಳೆಯಲಾಗಿದೆ. ಮಾರುಕಟ್ಟೆಯಲ್ಲಿ ಒಂದು ಕ್ವಿಂಟಲ್ ಈರುಳ್ಳಿಗೆ 200 ರೂ.ನಿಂದ 700 ರೂ.ವರೆಗೆ ದರ ನಿಗದಿಪಡಿಸಲಾಗಿದೆ. ಕನಿಷ್ಠ 2 ಸಾವಿರ ರೂ. ದರ ಸಿಕ್ಕರೆ ರೈತರು ನಿಟ್ಟುಸಿರು ಬಿಡುತ್ತಾರೆ. ಆದರೆ, ಸಣ್ಣ ಗಡ್ಡಿಗೆ 200, 200 ರೂ. ಕೇಳುತ್ತಿದ್ದಾರೆ. ಉತ್ತಮ ಗುಣಮಟ್ಟದ ಗಡ್ಡಿಗೂ ಕೇವಲ 700 ರೂ. ಕೇಳುತ್ತಾರೆ ವ್ಯಾಪಾರಿಗಳು. ಒಂದು ಎಕರೆಗೆ ಅಂದಾಜು 3ರಿಂದ 4 ಸಾವಿರ ರೂ. ಖರ್ಚು ಮಾಡಿದ್ದು, ಗೊಬ್ಬರ, ಕೀಟನಾಶಕ, ಕೂಲಿ ಆಳುಗಳ ಖರ್ಚು, ವಾಹನದ ಖರ್ಚು ಸೇರಿದರೆ ಕನಿಷ್ಠ ಖರ್ಚೂ ಕೈಸೇರುವುದಿಲ್ಲ ಎಂದು ರಾಣೆಬೆನ್ನೂರ ರೈತ ದಾನಪ್ಪ ಅಜ್ಜಪ್ಪನವರ ನೋವು ತೋಡಿಕೊಂಡರು.
