ಜಿಲ್ಲೆಯಲ್ಲಿ ಅಕ್ರಮ ಮರಳು ಗಣಿಗಾರಿಕೆ ಅವ್ಯಾಹತವಾಗಿ ನಡೆಯುತ್ತಿದ್ದು, ಇದೀಗ ಈ ದಂಧೆಯ ಸಾಲಿಗೆ ಅಕ್ರಮ ಮಣ್ಣು ಗಣಿಗಾರಿಕೆಯೂ ಸೇರುತ್ತಿದೆ. ಕೃಷಿ ಭೂಮಿಯ ಮೇಲೂ ಭೂಗಳ್ಳರ ಕಣ್ಣು ಬಿದ್ದಿದ್ದು, ಹಲವೆಡೆ ಅಕ್ರಮ ದಂಧೆ ಗರಿಬಿಚ್ಚಿದೆ. ಜಿಲ್ಲಾ ಕೇಂದ್ರ ಹಾವೇರಿ ಸುತ್ತಮುತ್ತ, ರಾಣೆಬೆನ್ನೂರ, ಹಿರೇಕೆರೂರ, ರಟ್ಟಿಹಳ್ಳಿ, ಹಾನಗಲ್ಲ, ಬ್ಯಾಡಗಿ, ಶಿಗ್ಗಾಂವಿ, ಸವಣೂರ ತಾಲೂಕಿನ ಕೆಲವೆಡೆ ಮಣ್ಣು ಸಾಗಣೆ ದಂಧೆ ಜೋರಾಗಿ ನಡೆಯುತ್ತಿದೆ. ಹಾವೇರಿ ತಾಲೂಕಿನ ಕರ್ಜಗಿ, ರಾಮಾಪೂರ ಸುತ್ತಮುತ್ತ ಕೆಂಪು ಮಣ್ಣಿನ ಅಕ್ರಮ ಗಣಿಗಾರಿಕೆಗೆ ಯಾವುದೇ ಅಡೆತಡೆ ಇಲ್ಲದಂತಾಗಿದೆ. ಉಳುಮೆ ಮಾಡುವ ಕೃಷಿ ಭೂಮಿಯಿಂದಲೇ ಮಣ್ಣು ಲೂಟಿ ಮಾಡುತ್ತಿರುವ ದಂಧೆಕೋರರು, ರಾಜಾರೋಷವಾಗಿ ಹಾಡಹಗಲೇ ಲಾರಿ, ಟಿಪ್ಪರ್, ಟ್ರಾೃಕ್ಟರ್ಗಳ ಮೇಲೆ ಹೇರಿಕೊಂಡು ಮಾರಾಟ ಮಾಡುತ್ತಿದ್ದಾರೆ. ಒಂದು ಟಿಪ್ಪರ್ ಮಣ್ಣಿಗೆ 3 ಸಾವಿರ ರೂ.ನಿಂದ 5 ಸಾವಿರದವರೆಗೆ ಸುಲಿಯುತ್ತಿದ್ದಾರೆ. ಹೊಸ ಲೇಔಟ್ ನಿರ್ಮಾಣ, ರಸ್ತೆ, ಕಟ್ಟಡ, ಇತರ ಕಾಮಗಾರಿಗಳಿಗೆ ಈ ಮಣ್ಣು ಬಳಸುತ್ತಿದ್ದಾರೆ. ಕೆಂಪು ಮಣ್ಣು ಗಣಿಗಾರಿಕೆಯಿಂದ ಭೌಗೋಳಿಕ ವ್ಯವಸ್ಥೆಯ ಮೇಲೆ ಭಾರೀ ಪರಿಣಾಮ ಬೀರುತ್ತದೆ. ಸಂಪದ್ಬರಿತವಾದ ಕೃಷಿ ಭೂಮಿಯ ಡಲಿಗೆ ಜೆಸಿಬಿ ಇಳಿಸಿ ಮಣ್ಣು ಸಾಗಣೆ ಮಾಡಲಾಗುತ್ತಿದೆ. ಕೃಷಿ ಭೂಮಿಯಲ್ಲಿ ಯಾವುದೇ ಕಾರಣಕ್ಕೂ ಮಣ್ಣು ತೆಗೆಯುವಂತಿಲ್ಲ. ಕೃಷಿಗೆ ಯೋಗ್ಯವಲ್ಲದ ಪಾಳು ಜಮೀನು ಇದ್ದರೆ ಮಾತ್ರ ಅಲ್ಲಿನ ಮಣ್ಣು ಮಾರಾಟ ಮಾಡಬಹುದಾಗಿದೆ. ದಂಧೆಕೋರರ ಅಟ್ಟಹಾಸದಿಂದಾಗಿ ಜಿಲ್ಲೆಯಲ್ಲಿ ಕೃಷಿ ಭೂಮಿ ದಿನದಿಂದ ದಿನಕ್ಕೆ ಕಡಿಮೆಯಾಗುವ ಆತಂಕವಿದೆ. ಒಂದು ಬಾರಿ ಕೃಷಿ ಜಮೀನಿನ ಮಣ್ಣು ತೆಗೆದರೆ ಅಲ್ಲಿ ಮತ್ತೆ ನೈಸರ್ಗಿಕವಾಗಿ ಕೃಷಿ ಮಾಡಲು ಸಾಧ್ಯವಿಲ್ಲ. ರೈತರಿಗೆ ಹಣದ ಆಮಿಷ ಒಡ್ಡಿ, ಅನ್ನ ಕೊಡುವ ಭೂಮಿಗೆ ಕನ್ನ ಹಾಕುತ್ತಿದ್ದಾರೆ. ಮಣ್ಣು ದಂಧೆ ನಡೆಯುವ ಪ್ರದೇಶದ ಸ್ಥಳೀಯರು ಬೇಸತ್ತು ಹೋಗಿದ್ದಾರೆ. ಇನ್ನಾದರೂ ಸಂಬಂಧಪಟ್ಟ ಅಧಿಕಾರಿಗಳು ಇದಕ್ಕೆ ಕಡಿವಾಣ ಹಾಕಬೇಕಿದೆ.
