ಹಾವೇರಿ: ಭಾರತ ಮತ್ತು ಪಾಕಿಸ್ತಾನದ ನಡುವೆ 1999ರಲ್ಲಿ ನಡೆದ ಕಾರ್ಗಿಲ್ ಯುದ್ಧದಲ್ಲಿ ಭಾಗವಹಿಸಿದ್ದ ಹಾವೇರಿಯ ನಾಗೇಂದ್ರನಮಟ್ಟಿ ನಿವಾಸಿ, ಮಾಜಿ ಯೋಧ ಮಹಮ್ಮದ್ ಜಹಾಂಗೀರ್ ಖವಾಸ್ ಅವರು ಯುದ್ಧಭೂಮಿಯಿಂದ ಬದುಕಿ ಬಂದದ್ದೇ ದೊಡ್ಡ ಸಾಹಸಗಾಥೆಯಾಗಿದೆ. ಅವರ ಕಾರ್ಗಿಲ್ ಯುದ್ಧದ ಅನುಭವವನ್ನು ‘ವಿಜಯವಾಣಿ’ ಮುಂದೆ ಬಿಚ್ಚಿಟ್ಟಿದ್ದಾರೆ. ನಾನು 19 ವರ್ಷದವನಿದ್ದಾಗ ಭಾರತೀಯ ಸೈನ್ಯಕ್ಕೆ ಆಯ್ಕೆಯಾದೆ. ಮೊದಲು ಹೈದರಾಬಾದ್ ನಂತರ ಸಿಕ್ಕಿಂನ ಚಿಲಿಗುಡಿಯಲ್ಲಿ ಸೇವೆ ಸಲ್ಲಿಸಿದೆ. ಬಳಿಕ ಡೆಹ್ರಾಡೂನ್, ಪಂಜಾಬ್, ಅಸ್ಸಾಂನಲ್ಲಿ ಕೆಲಸ ಮಾಡಿದೆ. ಅಸ್ಸಾಂನಲ್ಲಿ ಭಜರಂಗ ಆಪರೇಷನ್ನಲ್ಲಿ ಪಾಲ್ಗೊಂಡಿದ್ದೆ. ನಂತರ ಕಾರ್ಗಿಲ್ ಯುದ್ಧದಲ್ಲಿ ಪಾಲ್ಗೊಂಡಿದ್ದು ಎಂದಿಗೂ ಮರೆಯಲಾಗದ ಸಂದರ್ಭವಾಗಿದೆ.
