ಕರುನಾಡಿಗೆ ಕಣ್ಣೀರು?
ನಗರದಲ್ಲಿ ಬುಧವಾರ ಟೆಂಪಲ್ ರನ್ ಮೂಲಕ ಬಿಜೆಪಿ ಅಭ್ಯರ್ಥಿ ಬಸವಾರಜ ಬೊಮ್ಮಾಯಿ ಮತಯಾಚನೆ ಆರಂಭಿಸಿದರು. ತೋಂಟದಾರ್ಯ ಮಠ, ವೀರೇಶ್ವರ ಪುಣ್ಯಾಶ್ರಮ, ವೀರನಾರಾಯಣ, ತ್ರಿಕುಟೇಶ್ವರ ದೇವಸ್ಥಾನ, ವಕೀಲರ ಸಂಘ, ನಿವೃತ್ತ ನೌಕರರ ಸಂಘ, ಎಪಿಎಂಸಿ ವ್ಯಾಪಾರಸ್ಥರಸಂ, ಅಸಂಟಿತ ಕಾಮಿರ್ಕರ ಸಂಸ್ಥೆ ಹಾಗೂ ಮಾಜಿ ಸೈನಿಕರ ಸಂಘ, ಸಂಸ್ಥೆ ಸದಸ್ಯರ ಜತೆ ಚರ್ಚೆ ನಡೆಸಿದರು. ಪ್ರಚಾರದ ವೇಳೆ ಸುದ್ದಿಗಾರರೊಂದಿಗೆ ಮಾತನಾಡಿದ ಬೊಮ್ಮಾಯಿ, ಕಾಂಗ್ರೆಸ್ ಸರ್ಕಾರದ ವಿರುದ್ಧ ಹರಿಹಾಯ್ದರು. ಕೆಆರ್ಎಸ್ ಮೂಲಕ ತಮಿಳುನಾಡಿಗೆ ನೀರು ಹರಿಸಿ, ಕರುನಾಡಿನ ಜನತೆಗೆ ಕಾಂಗ್ರೆಸ್ ಕಣ್ಣೀರು ಹಾಕಿಸುತ್ತಿದೆ ಎಂದು ಆರೋಪಿಸಿದರು. ತಮಿಳುನಾಡಿನ ಹಿತ ಕಾಪಾಡಲು ಕಾಂಗ್ರೆಸ್ ಸರ್ಕಾರ ಸರ್ವ ಪ್ರಯತ್ನ ಮಾಡುತ್ತಿದೆ. ತಮಿಳುನಾಡಿನ ರಾಜಕೀಯ ಪಾರ್ಟನರ್ ಡಿಎಂಕೆ ಪಕ್ಷವನ್ನು ಸಂತೋಷದಿಂದ ಇಡಲು ಎಲ್ಲ ಮಾರ್ಗದಲ್ಲೂ ಪ್ರಯತ್ನಿಸುತ್ತಿದೆ. ತಮಿಳುನಾಡಿಗೆ ನೀರು ಹರಿಸಿರುವುದೇ ಜ್ವಲಂತ ಉದಾಹರಣೆ ಎಂದರು.
ಹಲವಾರು ಬಾರಿ ಬಿಜೆಪಿ ಪ್ರತಿಭಟನೆ ನಡೆಸಿದೆ. ಸರ್ವಪಕ್ಷ ಸಭೆ ಸೇರಿದಂತೆ, ವಿಧಾನಸಭೆಯಲ್ಲೂ ಸರ್ಕಾರದ ನಿರ್ಣಯವನ್ನು ವಿರೋಧಿಸಿದ್ದೇವೆ. ಕರ್ನಾಟಕದ ಜನರು ಇಂದು ನೀರಿಗೆ ಪರಿತಪಿಸುತ್ತಿರುವುದಕ್ಕೆ ಕಾಂಗ್ರೆಸ್ ಪಕ್ಷವೇ ಕಾರಣ. ಬೇಸಿಗೆಯಲ್ಲಿ ಜಲಾನಯನ ಪ್ರದೇಶದ ಜನರಿಗೆ ಕುಡಿಯುವ ನೀರಿಲ್ಲ. ಇಂತಹ ಸಂದರ್ಭದಲ್ಲಿ ಕಾಂಗ್ರೆಸ್ ಪಕ್ಷಕ್ಕೆ ರಾಜಕೀಯವೇ ಮಹತ್ವದ್ದಾಗಿದ್ದು ಖಂಡನೀಯ ಎಂದು ಆರೋಪಿಸಿದರು.
