ಕೇಶವಮೂರ್ತಿ ವಿ.ಬಿ. ಹಾವೇರಿ
ಮುಂಗಾರು ವಿಳಂಬದಿಂದಾಗಿ ದಿಕ್ಕೇ ತೋಚದಂತಾಗಿದ್ದ ಅನ್ನದಾತನಿಗೆ ಜುಲೈನಲ್ಲಿ ಸುರಿದ ಆರಿದ್ರಾ ಮಳೆ ಕೊಂಚ ಮಂದಹಾಸ ಮೂಡುವಂತೆ ಮಾಡಿದೆ. ಕಳೆದ ಒಂದು ಸುರಿದ ಮಳೆಯ ಪರಿಣಾಮ ಜಿಲ್ಲೆಯಲ್ಲಿ ಬಿತ್ತನೆ ಕಾರ್ಯ ಚುರುಕುಗೊಂಡಿದ್ದು, ಈವರೆಗೆ ಶೇ.63ರಷ್ಟು ಬಿತ್ತನೆ ಮಾಡಲಾಗಿದೆ.
ಜೂನ್ನಲ್ಲೇ ಜಿಲ್ಲೆಗೆ ಆಗಮಿಸಬೇಕಿದ್ದ ಮುಂಗಾರು ವಿಳಂಬವಾದ್ದರಿಂದ ಕೊಳವೆ ಬಾವಿಗಳೂ ಬರಿದಾಗಿದ್ದವು. ಇದರಿಂದ ರೈತ ಸಮುದಾಯ ಚಿಂತೆಗೀಡಾಗಿತ್ತು. ಹೀಗೆ ಮುಂದುವರಿದರೆ ಹಿಂದಿನ ಸಾಲ ತೀರಿಸುವುದು ಹೇಗೆ, ಕುಟುಂಬ ನಿರ್ವಹಣೆ ಮಾಡುವುದು ಹೇಗೆ ಎಂಬ ಪ್ರಶ್ನೆಗಳು ಎದುರಾಗಿದ್ದವು. ಈ ನಡುವೆ ವರುಣದೇವ ಜುಲೈನಲ್ಲಿ ಕೃಪೆ ತೋರಿದ ಪರಿಣಾಮ ಮೈಕೊಡವಿ ನಿಂತ ಅನ್ನದಾತ ಬಿತ್ತನೆ ಕಾರ್ಯಕ್ಕೆ ಚಾಲನೆ ನೀಡಿದ್ದಾನೆ.
ಜಿಲ್ಲೆಯಲ್ಲಿ ಒಟ್ಟು 3,30,447 ಹೆಕ್ಟೇರ್ ಜಮೀನಿನಲ್ಲಿ ಬಿತ್ತನೆ ಗುರಿ ಹೊಂದಲಾಗಿದ್ದು, ಸದ್ಯಕ್ಕೆ ಈವರೆಗೆ 2,08,499 ಹೆಕ್ಟೇರ್ನಲ್ಲಿ ಮಾತ್ರ ಬಿತ್ತನೆ ಮಾಡಲಾಗಿದೆ. ಅಂದರೆ ಈವರೆಗೆ ಶೇ.63ರಷ್ಟು ಬಿತ್ತನೆಯಾಗಿದೆ. ಒಂದೆರೆಡು ದಿನಗಳಿಂದ ಮಳೆ ಬಿಡುವು ಕೊಟ್ಟಿದ್ದು, ಉಳಿದ ರೈತರು ಬಿತ್ತನೆಗೆ ಮುಂದಾಗಿದ್ದಾರೆ.
ಕಳೆದ ಮುಂಗಾರಿಗೆ ಹೋಲಿಸಿದರೆ ಈ ಬಾರಿ ಬಿತ್ತನೆ ಕುಂಠಿತವಾಗಿದೆಯಾದರೂ, ಆರಿದ್ರಾ ಮಳೆ ಹೊಸದೊಂದು ಭರವಸೆ ಮೂಡಿಸಿದೆ. ಭೂಮಿ ಹದವಾಗುತ್ತಿದ್ದಂತೆ ರೈತರು ತಮ್ಮ ಹೊಲಗಳಲ್ಲಿ ಮೆಕ್ಕೆಜೋಳ, ಶೇಂಗಾ, ಸೋಯಾಬಿನ್, ಹತ್ತಿ, ಜೋಳ, ಕಬ್ಬು, ಹೆಸರುಕಾಳು, ಇತರ ಬೆಳೆ ಬೆಳೆಯಲು ಮುಂದಾಗಿದ್ದಾರೆ. ಇನ್ನೂ ಕೆಲವರು ಪರ್ಯಾಯ ಬೆಳೆಗೆ ಚಿಂತನೆ ನಡೆಸಿದ್ದಾರೆ.
ಹಾವೇರಿ, ಗುತ್ತಲ ಸೇರಿದಂತೆ ಇತರ ಭಾಗದಲ್ಲಿ ಜುಲೈ ಮೊದಲ ವಾರವೇ ಉತ್ತಮ ಮಳೆಯಾದ್ದರಿಂದ ಈಗಾಗಲೇ ಬಿತ್ತಿದ ಬೀಜ ಮೊಳಕೆಯೊಡೆದು ಸಸಿ ಬೆಳವಣಿಗೆ ಹಂತಕ್ಕೆ ತಲುಪಿವೆ. ರಾಣೆಬೆನ್ನೂರ, ಹಲಗೇರಿ, ತುಮ್ಮಿನಕಟ್ಟಿ, ರಟ್ಟಿಹಳ್ಳಿ, ಹಿರೇಕೆರೂರ, ಬ್ಯಾಡಗಿ ಹಾಗೂ ಇತರೆಡೆಗಳಲ್ಲಿ ಮಳೆ ಸ್ವಲ್ಪ ತಡವಾದ್ದರಿಂದ ಬಿತ್ತನೆ ತಡವಾಗಿ ಮಾಡಲಾಗುತ್ತಿದೆ.
