ಜಿಲ್ಲೆ ಸೇರಿದಂತೆ ರಾಜ್ಯದ ಹಲವೆಡೆ ಕಳೆದ ವರ್ಷ ಚಿಕೂನ್ ಗುನ್ಯ ಹಾಗೂ ಡೆಂಗ್ಯೂ ಜ್ವರ ಜನರ ಜೀವ ಹಿಂಡಿತ್ತು. ಈ ವರ್ಷವೂ ಬೇಸಿಗೆ ಅವಧಿಯಲ್ಲೇ ಮಳೆ ಸುರಿಯುತ್ತಿರುವ ಕಾರಣ ಮಳೆಗಾಲದ ರೋಗಗಳ ಭೀತಿ ಶುರುವಾಗಿದ್ದು, ಜಿಲ್ಲೆಯಲ್ಲಿ ನಾಲ್ಕು ತಿಂಗಳಲ್ಲಿ 20 ಡೆಂಗ್ಯೂ, 1 ಚಿಕೂನ್ ಗುನ್ಯ ಹಾಗೂ 1 ಮಲೇರಿಯಾ ಕಾಣಿಸಿಕೊಂಡಿರುವುದು ಆತಂಕ ಹೆಚ್ಚಳಕ್ಕೆ ಕಾರಣವಾಗಿದೆ. ಕಳೆದ ವರ್ಷ ವಾಡಿಕೆಗಿಂತ ಹೆಚ್ಚಿನ ಮಳೆ ಸುರಿದ ಪರಿಣಾಮ ಜಿಲ್ಲೆಯಲ್ಲಿ ಮಳೆಗಾಲದ ರೋಗಗಳ ಹಾವಳಿ ಹೆಚ್ಚಾಗಿತ್ತು. 2024ರಲ್ಲಿ ಒಟ್ಟು 785 ಡೆಂಗ್ಯೂ ಹಾಗೂ 79 ಚಿಕೂನ್ ಗುನ್ಯ ಪ್ರಕರಣ ವರದಿಯಾಗಿತ್ತು. 2025ರಲ್ಲಿ ಜನವರಿಯಿಂದ ಮೇವರೆಗೆ 20 ಡೆಂಗ್ಯೂ, 1 ಚಿಕೂನ್ ಗುನ್ಯ, 1 ಮಲೇರಿಯಾ ಕೇಸ್ ಪತ್ತೆಯಾಗಿವೆ. ಜನವರಿಯಲ್ಲಿ 6, ಫೆಬ್ರವರಿಯಲ್ಲಿ 12, ಮಾರ್ಚ್ನಲ್ಲಿ 2 ಡೆಂಗ್ಯೂ ಕೇಸ್ ಕಾಣಿಸಿಕೊಂಡಿವೆ. ಮಳೆಗಾಲದಲ್ಲಿ ಮಳೆ ಸುರಿದ ನಂತರ ಪರಿಸರದಲ್ಲಿ ಗುಂಡಿ, ಚರಂಡಿ, ಮತ್ತಿತರ ಕಡೆಗಳಲ್ಲಿ ನೀರು ಸಂಗ್ರಹವಾಗಿ, ಸೊಳ್ಳೆಗಳ ಉತ್ಪತ್ತಿ ಹೆಚ್ಚಾಗಿ, ಈ ಕಾಯಿಲೆಗಳು ಹೆಚ್ಚಾಗುವ ಭೀತಿ ಕಾಡುತ್ತದೆ. ಈ ವರ್ಷವೂ ಬೇಸಿಗೆ ಅವಧಿಯಲ್ಲೇ ಹೆಚ್ಚಿನ ಪ್ರಮಾಣದ ಮಳೆ ಸುರಿಯುತ್ತಿರುವುದು ಸಾಂಕ್ರಾಮಿಕ ಕಾಯಿಲೆಗಳ ಉಲ್ಬಣ ಹೆಚ್ಚಾಗುವ ಆತಂಕ ಶುರುವಾಗಿದೆ. ಜಿಲ್ಲೆಯ ಸ್ಥಳೀಯ ಸಂಸ್ಥೆಗಳಾದ ನಗರಸಭೆ, ಪುರಸಭೆ, ಪಟ್ಟಣ ಪಂಚಾಯಿತಿ, ಗ್ರಾಮ ಪಂಚಾಯಿತಿಗಳ ವ್ಯಾಪ್ತಿಯಲ್ಲಿ ಎಲ್ಲೆಡೆ ಸೊಳ್ಳೆಗಳ ನಿಯಂತ್ರಣ ಕಾರ್ಯ ಇನ್ನೂ ಪ್ರಾರಂಭವಾಗಿಲ್ಲ. ಜಿಲ್ಲಾ ಕೇಂದ್ರ ಹಾವೇರಿ ನಗರ, ಸೇರಿದಂತೆ ಇನ್ನೂ ಹಲವಡೆ ಚರಂಡಿಗಳಲ್ಲಿ ಹೂಳು ತುಂಬಿಕೊಂಡು ಕೊಳಚೆ ನೀರು ನಿಂತುಕೊಂಡಿದೆ. ಇದು ಸೊಳ್ಳೆಗಳ ಉತ್ಪತ್ತಿಗೆ ದಾರಿ ಮಾಡಿಕೊಡುತ್ತಿದೆ. 10, 15 ದಿನಗಳಿಗೊಮ್ಮೆ ಕುಡಿಯುವ ನೀರು ಪೂರೈಸುತ್ತಿರುವ ಕಾರಣ ಜನ ವಾರ, ಎರಡು ವಾರಗಟ್ಟಲೇ ಒಂದೇ ಕಡೆ ಜನ ನೀರು ಶೇಖರಿಸಿ ಇಡುತ್ತಿದ್ದಾರೆ. ಇದು ಸೊಳ್ಳೆಗಳ ಉತ್ಪತ್ತಿಗೆ ಕಾರಣವಾಗುತ್ತಿದೆ. ಇದರಿಂದ ಲಾರ್ವಾ ಸಮೀಕ್ಷೆಗೂ ತೊಂದರೆಯಾಗುತ್ತಿದೆ ಎಂಬುದು ಆರೋಗ್ಯ ಇಲಾಖೆ ಸಿಬ್ಬಂದಿ ಆರೋಪವಾಗಿದೆ. ಹಾಗಾಗಿ, ಸ್ಥಳೀಯ ಸಂಸ್ಥೆಗಳು ಈ ಬಗ್ಗೆಯೂ ಗಮನ ಹರಿಸಬೇಕಿದೆ.
