ಹಾವೇರಿ: ಪುತ್ರ ಕಾಂತೇಶಗೆ ಹಾವೇರಿ- ಗದಗ ಲೋಕಸಭಾ ಟಿಕೆಟ್ ಕೊಡಿಸಬೇಕು ಎಂದು ಓಡಾಡುತ್ತಿರುವ ಮಾಜಿ ಸಚಿವ ಕೆ.ಎಸ್. ಈಶ್ವರಪ್ಪ ಮಗನನ್ನು ಬಿಟ್ಟು ಜಿಲ್ಲೆಯ ವಾತಾವರಣ ಕೆಡಿಸುತ್ತಿದ್ದಾರೆ ಎಂದು ಮಾಜಿ ಸಚಿವ ಬಿ.ಸಿ. ಪಾಟೀಲ ವಾಗ್ದಾಳಿ ನಡೆಸಿದರು.
ನಗರದ ಬಿಜೆಪಿ ಜಿಲ್ಲಾ ಕಾರ್ಯಾಲಯದಲ್ಲಿ ಮಂಗಳವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈಶ್ವರಪ್ಪನವರು ಕಾಂಗ್ರೆಸ್ನಿಂದ ವಲಸೆ ಬಂದ ನಮ್ಮ ಬಗ್ಗೆ ಈ ಹಿಂದೆ ಮಾತನಾಡಿದ್ದಾರೆ. ಈ ಕುರಿತು ನಾನು ಕರೆ ಮಾಡಿ ಕೇಳಿದಾಗ, 'ನಾನು ಹಾಗೆ ಹೇಳಿಲ್ಲ. ಕ್ಷಮಿಸಿ' ಎಂದಿದ್ದರು. ಚುನಾವಣೆ ಸಂದರ್ಭದಲ್ಲಿ ಪಕ್ಷಕ್ಕೆ ವಿರೋಧ ಮಾಡಿದವರನ್ನು ಕರೆದುಕೊಂಡು ಕ್ಷೇತ್ರದಲ್ಲಿ ಓಡಾಡುತ್ತಿದ್ದಾರೆ ಎಂದು ನೇರವಾಗಿ ಆಕ್ರೋಶ ಹೊರಹಾಕಿದರು.
ಹಿರಿಯ ನಾಯಕರಾಗಿ ಈ ರೀತಿ ಮಕ್ಕಳಾಟದಂತೆ ಮಾಡಿದರೆ ಹೇಗೆ. ಪಕ್ಷದ ಉನ್ನತ ನಾಯಕರು ಸಮೀಕ್ಷೆ ಮಾಡುತ್ತಿದ್ದಾರೆ. ಯಾರು ಗೆಲ್ಲುವ ಅಭ್ಯರ್ಥಿ ಎಂಬುದನ್ನು ನೋಡಿ ಟಿಕೆಟ್ ಕೊಡುತ್ತಾರೆ. ಅವರಿಗೆ ಟಿಕೆಟ್ ಭರವಸೆ ಕೊಟ್ಟಿಲ್ಲ ಎಂದು ರಾಜ್ಯಾಧ್ಯಕ್ಷರೇ ಹೇಳಿದ್ದಾರೆ. ಹೀಗಿದ್ದರೂ ಮಗನಿಗಾಗಿ ಓಡಾಡೋದು ಯಾಕೆ. ಪಕ್ಷ ಹೇಳಿದಾಗ ಕ್ಷೇತ್ರಕ್ಕೆ ಹೋಗೋದರಲ್ಲಿ ಅರ್ಥವಿದೆ. ಹಾಗಾಗಿ, ಹಿರಿಯ ನಾಯಕರು ಒಡಕು ಇರುವ ಜಾಗದಲ್ಲಿ ನೀರು ಎರೆಯಬಾರದು. ಮೋದಿ ಅವರ ಹೆಸರಲ್ಲಿ ಎಂಪಿ ಚುನಾವಣೆ ನಡೆಯುತ್ತದೆ. ಯಾರ ಹೆಸರಲ್ಲೂ ನಡೆಯುವುದಿಲ್ಲ ಎಂದು ಕುಟುಕಿದರು.
