ರಸ್ತೆ ಸಂಚಾರ ನಿಯಮಗಳ ಕಡ್ಡಾಯ ಪಾಲನೆ ಕುರಿತು ಪೊಲೀಸ್ ಇಲಾಖೆ ಎಷ್ಟೇ ಜಾಗೃತಿ ಮೂಡಿಸುತ್ತಿದ್ದರೂ ಅಪಘಾತಗಳ ಸಂಖ್ಯೆ ಮಾತ್ರ ಏರುಗತಿಯಲ್ಲೇ ಸಾಗುತ್ತಲಿದ್ದು, ಜಿಲ್ಲೆಯಲ್ಲಿ ಕಳೆದ 31 ತಿಂಗಳಲ್ಲಿ ರಸ್ತೆ ಅಪಘಾತಕ್ಕೆ ಬರೋಬ್ಬರಿ 715 ಜನರು ಬಲಿಯಾಗಿ, 3,397 ಪ್ರಯಾಣಿಕರು ಗಾಯಗೊಂಡಿದ್ದಾರೆ. ಅಪಘಾತ ಮತ್ತು ಸಾವು- ನೋವಿಗೆ ಅತಿಯಾದ ವೇಗ, ಮದ್ಯ ಸೇವಿಸಿ ವಾಹನ ಚಲಾಯಿಸುವುದು, ಹೆಲ್ಮೆಟ್ ಇಲ್ಲದೆ ದ್ವಿಚಕ್ರ ವಾಹನ ಓಡಿಸುವುದು, ಚಾಲನಾ ಪರವಾನಗಿ (ಡಿಎಲ್) ಇಲ್ಲದೇ ವಾಹನ ಓಡಿಸುವುದು, ವಾಹನ ಚಲಾಯಿಸುವಾಗ ಮೊಬೈಲ್ ಬಳಕೆ, ಹಾಳಾದ ರಸ್ತೆಗಳು, ಸೇರಿದಂತೆ ಹಲವು ಕಾರಣಗಳಿವೆ. ಇದರಲ್ಲಿ ಅತಿಯಾದ ವೇಗ ಮತ್ತು ಹೆಲ್ಮೆಟ್ ಧರಿಸದ್ದಕ್ಕೆ ಹೆಚ್ಚು ಜೀವಗಳು ಕೈಚೆಲ್ಲಿರುವುದು ಪಾಠವಾಗಬೇಕಿದೆ.
ಜಿಲ್ಲೆಯಲ್ಲಿ 2022ರಲ್ಲಿ 260 ಅಪಘಾತ ಪ್ರಕರಣಗಳಲ್ಲಿ 286 ಜನ ಮೃತಪಟ್ಟಿದ್ದು, 274 ಅಪಘಾತ ಪ್ರಕರಣಗಳಲ್ಲಿ 1,362 ಪ್ರಯಾಣಿಕರು ಗಾಯಗೊಂಡಿದ್ದಾರೆ. 2023ರಲ್ಲಿ 255 ಪ್ರಕರಣಗಳಲ್ಲಿ 270 ಜನ ಮೃತಪಟ್ಟಿದ್ದು, 523 ಕೇಸ್ಗಳಲ್ಲಿ 1,360 ಜನ ಗಾಯಗೊಂಡಿದ್ದಾರೆ. 2024ರಲ್ಲಿ (ಈವರೆಗೆ) 130 ಕೇಸ್ಗಳಲ್ಲಿ 159 ಪ್ರಯಾಣಿಕರು ಅಸುನೀಗಿದ್ದು, 301 ಅಪಘಾತ ಪ್ರಕರಣಗಳಲ್ಲಿ 675 ಜನ ಗಾಯಗೊಂಡಿದ್ದಾರೆ. ಇದರಲ್ಲಿ ಕೆಲವರು ಶಾಶ್ವತ ಅಂಗವೈಕಲ್ಯಕ್ಕೆ ಗುರಿಯಾಗಿದ್ದಾರೆ.
ಅಪಘಾತಗಳಿಗೆ ಸಂಚಾರ ನಿಯಮ ಉಲ್ಲಂಘನೆಯ ಜೆತೆಗೆ ಹದಗೆಟ್ಟ ರಸ್ತೆಗಳೂ ಪ್ರಮುಖ ಕಾರಣಗಳಲ್ಲಿ ಒಂದಾಗಿದೆ. ಬ್ಯಾಡಗಿ ತಾಲೂಕು ಮೋಟೆಬೆನ್ನೂರ ಹಾಗೂ ಛತ್ರ ಬಳಿ ರಾಷ್ಟ್ರೀಯ ಹೆದ್ದಾರಿ ಷಟ್ಪಥ ರಸ್ತೆ ಕಾಮಗಾರಿ ಕುಂಟುತ್ತ ಸಾಗಿದೆ. ಹಾವೇರಿ- ಗುತ್ತಲ ರಸ್ತೆ, ಗುತ್ತಲ- ಲಕ್ಷ್ಮೇಶ್ವರ ಹೆದ್ದಾರಿಗಳು ಸೇರಿದಂತೆ ಇತರ ಅನೇಕ ರಸ್ತೆಗಳು ಹಾಳಾಗಿವೆ. ಕೆಲವೆಡೆ ಗುಂಡಿಗಳಿಂದಲೇ ಕೂಡಿಕೊಂಡಿವೆ. ಇಂತಹ ರಸ್ತೆಗಳಲ್ಲಿ ಅಪಘಾತ ಸಾಮಾನ್ಯ ಎಂಬಂತಾಗಿದೆ.
ಈ ಎಲ್ಲ ಸಮಸ್ಯೆಗಳ ಕುರಿತು ಜಿಲ್ಲಾ ಉಸ್ತುವಾರಿ ಸಚಿವರು, ಜಿಲ್ಲಾಡಳಿತ ಗಮನಹರಿಸಬೇಕು. ಪೊಲೀಸ್ ಇಲಾಖೆ ಜತೆಗೆ ಆರ್ಟಿಒ, ಇತರ ಇಲಾಖೆಗಳಿಗೂ ಜವಾಬ್ದಾರಿ ವಹಿಸಬೇಕು. ರಸ್ತೆ ಅಪಘಾತಗಳ ತಡೆಗೆ ಮತ್ತಷ್ಟು ಅಗತ್ಯ ಮುನ್ನೆಚ್ಚರಿಕೆ ಕ್ರಮಗಳನ್ನು ಕೈಗೊಳ್ಳಬೇಕು ಎಂಬುದು ‘ವಿಜಯವಾಣಿ’ ಕಳಕಳಿ.
