ಹಟ್ಟಿ, ಗುರುಗುಂಟಾ, ಕೋಠಾ, ಗೌಡೂರು, ಗೆಜ್ಜಲಗಟ್ಟಾ, ರೋಡಲಬಂಡಾ, ಪೈದೊಡ್ಡಿ, ಆನ್ವರಿ ಭಾಗದ ತೊಗರಿ, ಜೋಳ, ಹೆಸರು, ಕಡಲೆ, ಮೆಣಸಿನಕಾಯಿ, ಹತ್ತಿ ಹಾಗೂ ಭತ್ತ, ಗೋಧಿ ಸೇರಿ ಬೆಳೆದ ಹಲವು ಗದ್ದೆಗಳು ನೀರು ಪಾಲಾಗಿದ್ದರೆ, ನಿರಂತರ ತೇವಾಂಶದಿಂದ ಕೆಲವೆಡೆ ಬೆಳೆಗಳು ಕೊಳೆತು ಹೋಗಿವೆ. ಕಾಯಿ ಹಿಡಿದು ಒಣಗುವ ಹಂತದಲ್ಲಿದ್ದ ತೊಗರಿ ಮಳೆ-ತೇವಾಂಶಕ್ಕೆ ಎಲೆಗಳು ಉದುರಿ ಹೋಗಿದ್ದು, ಫಸಲು ಹಾಳಾಗಿದೆ. ಹಲವೆಡೆ ಬೆಳೆಗಳು ನೀರು ಪಾಲಾಗಿದ್ದು, ಹೊಲ-ಗದ್ದೆಗಳಿಗೆ ಕಾಲಿಡದ ಪರಿಸ್ಥಿತಿ ಉಂಟಾಗಿದೆ. ಗುರಗುಂಟಾ ಗ್ರಾಮ ಲೆಕ್ಕಾಧಿಕಾರಿ ಎಂ.ರಮೇಶ್, ಗ್ರಾ.ಪಂ ಸದಸ್ಯ ಚಂದ್ರಶೇಖರ್ ನಾಯಕ್ ಹಾನಿಯಾದ ಹೊಲ-ಗದ್ದೆಗಳಿಗೆ ಶನಿವಾರ ಭೇಟಿ ನೀಡಿ ಪರಿಶೀಲಿಸಿದರು.
