ಮಾಧ್ಯಮಗಳಿಗೆ ಪ್ರತಿಕ್ರಿಯೆ ನೀಡಿದ ಸಿದ್ದರಾಮಯ್ಯ, ಯಾವುದೇ ಅಕ್ರಮ ಮಾಡಿಲ್ಲ ಎನ್ನುವುದಾದರೆ ವೈದ್ಯಕೀಯ ಉಪಕರಣಗಳ ಬಗ್ಗೆ ನ್ಯಾಯಾಂಗ ತನಿಖೆ ನಡೆಸಲು ಸರ್ಕಾರಕ್ಕೆ ಭಯವೇಕೆ? ಸಚಿವರುಗಳು ಸತ್ಯವಂತರು ಎನ್ನುವುದಾದರೆ ತನಿಖೆ ಬೇಡ ಎನ್ನುವುದೇಕೆ? ಇದು ಭಂಡತನದ ಪರಮಾವಧಿ ಎಂದು ಟೀಕಿಸಿದ್ದಾರೆ. ಇವರ ಟೀಕೆಗೆ ಪ್ರತಿಯಾಗಿ ಆರ್.ಅಶೋಕ್, ಕರೊನಾ ಪರಿಕರಗಳ ಖರೀದಿಗೆ ಸಂಬಂಧಿಸಿದಂತೆ ಐವರು ಸಚಿವರು ಮಾಧ್ಯಮಗೋಷ್ಠಿಯಲ್ಲಿ ದಾಖಲೆಗಳೊಂದಿಗೆ ಉತ್ತರಿಸಿಯಾಗಿದೆ. ಹೀಗಾಗಿ ತನಿಖೆಯ ಪ್ರಶ್ನೆಯೇ ಉದ್ಭವಿಸುವುದಿಲ್ಲ ಎಂದು ಪುನರುಚ್ಚರಿಸಿದರು. ಸಿದ್ದರಾಮಯ್ಯ ಈಗ ಮುಖ್ಯಮಂತ್ರಿಯಲ್ಲ, ಪ್ರತಿಪಕ್ಷ ನಾಯಕರು. ಸಲಹೆ ಕೊಡಬಹುದೇ ಹೊರತು, ಆದೇಶ ನೀಡುವಂತಿಲ್ಲ. ಹಿಂದೆ ಅಧಿಕಾರದಲ್ಲಿ ಇದ್ದಾಗ ಎಷ್ಟು ಆರೋಪಗಳಿದ್ದವು, ಅವೆಲ್ಲದಕ್ಕೂ ತನಿಖೆ ಮಾಡಿಸಿದ್ದಾರೆಯೇ ಎಂದು ಮರು ಪ್ರಶ್ನಿಸಿದರು. ಸರ್ಕಾರ ಹೀಗೆ ಎದಿರೇಟು ಕೊಡುತ್ತಾ ವಿಷಯಾಂತರ ಮಾಡಿ ಆರೋಪಗಳ ತೀವ್ರತೆ ಕಡಿಮೆ ಮಾಡಲು ಪ್ರಯತ್ನಿಸಿರುವಾಗಲೇ ಪ್ರತಿಪಕ್ಷ ವಿಷಯವನ್ನು ಜಿಲ್ಲೆಗೆ ಕೊಂಡೊಯ್ಯುವ ಇರಾದೆ ಹೊಂದಿದೆ. ಸಿದ್ದರಾಮಯ್ಯ ಮತ್ತು ಕೆಪಿಸಿಸಿ ಅಧ್ಯಕ್ಷ ಡಿ.ಕೆ.ಶಿವಕುಮಾರ್ ಚರ್ಚೆ ನಡೆಸಿದ್ದು, 30 ಜಿಲ್ಲೆಗೆ 30 ತಂಡ ಕಳಿಸಲು ನಿರ್ಧರಿಸಿದ್ದಾರೆ.
