ಮುಸುಕು ಜೋಳಕ್ಕೆ ಬಿಳಿಸುಳಿ ಬಾದೆ

ಮಾದೀಹಳ್ಳಿ ಹೋಬಳಿಯಾದ್ಯಂತ ವಾಣಿಜ್ಯ ಬೆಳೆಗಳಲ್ಲಿ ಒಂದಾದ ಮುಸುಕು ಜೋಳ ಯತೇಚ್ಚವಾಗಿ ಬೆಳೆಯುತ್ತಾರೆ. ಬೇರೆ ಯಾವುದೇ ಬೆಳೆ ಮೇಲೆ ಇಲ್ಲದಿರುವಷ್ಟು ನಂಬಿಕೆ ಈ ಬೆಳೆ ಮೇಲಿದೆ. ಕಡಿಮೆ ಖರ್ಚು ಹಾಗೂ ಮಿತವಾದ ಕೆಲಸ ಎಂಬ ಉದ್ದೇಶದಿಂದ ಪ್ರತಿಯೋಬ್ಬ ರೈತರೂ ಸಹ ಜೊಳ ಬೆಳೆಯುವುದರಲ್ಲಿ ಯಶಸ್ಸು ಕಂಡುಕೊಂಡಿದ್ದಾರೆ. ಈ ವರ್ಷ ಋತುಮಾನಕ್ಕೆ ತಕ್ಕಂತೆ ಮಳೆಯಾಗದಿರುವುದರಿಂದ ಜೋಳ ಮೊಳಕೆಯೊಡೆದು ಮೇಲೆ ಬರಲು ಸಹ ಸಾಧ್ಯವಾಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಕಳೆದ ಒಂದು ತಿಂಗಳ ಹಿಂದೆ ಬಿತ್ತನೆ ಮಾಡಿದ್ದ ಜೋಳ ಬಂದಿದ್ದು ಅದು ಸಹ ಒಣಗುತ್ತಿದೆ. ಜತೆಗೆ ಬಿಳಿ ಸುಳಿ ರೋಗ ಜೋಳವನ್ನೆ ಆವರಿಸುತ್ತಿದೆ.

ಮಾದೀಹಳ್ಳಿ ಹೋಬಳಿಯ ಗ್ರಾಮಗಳಾದ ಹುಲುಗುಂಡಿ, ಪೇಟೇಹಳ್ಳಿ, ಆಂದಲೆ, ಕಲ್ಯಾಣಪುರ, ಹಂದ್ರಾಳು, ಶಿವಯೋಗಿಪುರ, ಹೀರಗುಪ್ಪೆ ಸೇರಿದಂತೆ ಉಳಿದ 20ಕ್ಕು ಹೆಚ್ಚು ಗ್ರಾಮಗಳಲ್ಲಿನ ಸುಮಾರು 1200 ಕ್ಕು ಹೆಚ್ಚು ಹೆಕ್ಟೇರ್ ಪ್ರದೇಶದಲ್ಲಿ ಮುಸುಕು ಜೋಳ ಬಿತ್ತನೆ ಮಾಡಲಾಗಿದೆ. ಬಿತ್ತನೆಯ ಸಮಯದಲ್ಲಿ ಅಲ್ಪ ಸ್ವಲ್ಪ ಮಳೆಯಾಗಿದ್ದು ಹೊರೆತುಪಡಿಸಿದರೆ ನಂತರದ ದಿನಗಳಲ್ಲಿ ಮಳೆೆಯ ಪ್ರಮಾಣ ಸಂಪೂರ್ಣ ಕಡಿಮೆಯಾಗಿರುವುದರಿಂದ ರೈತರು ಕಂಗಾಲಾಗಿದ್ದಾರೆ. ಕಳೆದ ವರ್ಷ ಎರಡು ತಿಂಗಳ ಜೋಳಕ್ಕೆ ಬಿಳಿ ಸುಳಿ ರೋಗ ಕಾಣಿಸಿಕೊಂಡಿತ್ತು.ಆದರೆ ಈ ವರ್ಷ ಬಿತ್ತನೆ ಮಾಡಿ 30 ದಿನಗಳಲ್ಲೆ ಕಾಣಿಸಿಕೊಳ್ಳುತ್ತಿದೆ. ಎರಡು ಮೂರು ದಿನಗಳಲ್ಲಿ ಹೊಲವನ್ನೆಲ್ಲಾ ಆಕ್ರಮಿಸು ಹಂತಕ್ಕೆ ತಲುಪಿದೆ.

ಬಿತ್ತನೆ ಪ್ರಮಾಣವೇ ಕಮ್ಮಿ:

ಪ್ರತಿ ವರ್ಷ ಜೂನ್ ಒಳಗಾಗಿ ಹೋಬಳಿಯಾದ್ಯಂತ ಕನಿಷ್ಠ 3000 ಹೆಕ್ಟೇರ್ ಪ್ರದೇಶದಲ್ಲಿ ಜೋಳ ಬಿತ್ತನೆ ಮಾಡಲಾಗುತ್ತಿತ್ತು. ಆದರೆ ಈ ವರ್ಷ ಕೆಲವು ರೈತರು ಇನ್ನು ಮುಸುಕು ಜೋಳ ಬಿತ್ತನೆ ಮಾಡಿಯೇ ಇಲ್ಲಾ. ಅಂಗಡಿಯಿಂದ ಕೊಂಡ ಬಿತ್ತನೆ ಬೀಜ, ರಸಗೊಬ್ಬರಗಳು ಮನೆಯಲ್ಲೆ ಇವೆ. ಬಿತ್ತನೆ ಮಾಡಿರುವ ರೈತರಂತು ಒಣಗುತ್ತಿರುವ ಹಾಗೂ ರೋಗ ಪೀಡಿತ ಬೆಳೆ ಕಂಡು ಮುಂದಿನ ದಿನಗಳ ಬಗ್ಗೆ ಚಿಂತಾಕ್ರಾಂತರಾಗಿದ್ದಾರೆ.

ಬೆಳೆ ಕಾಪಾಡಿಕೋಳ್ಳುವ ಯತ್ನ

ಬಿಳಿಸುಳಿ ರೋಗ ಕಂಡಬಂದ ನಂತರ, ದಿನ ಕಳೆದಂತೆ ತಮ್ಮ ಎಲ್ಲ ಜೋಳವನ್ನು ಆಕ್ರಮಿಸಿಕೊಂಡು ಸಂಪೂರ್ಣ ನಾಶ ಮಾಡುತ್ತದೆ.ಆದ್ದರಿಂದ ಕೆಲವು ರೈತರು ರೋಗ ಬಾದೆ ಇರುವ ಕೆಲವು ಜೋಳವನ್ನು ಕಿತ್ತೆಸೆದು ಇತರೆ ಜೋಳಕ್ಕೆ ಹರಡದಂತೆ ಕಾಪಾಡಿಕೊಳ್ಳಲು ಮುಂದಾಗಿದ್ದಾರೆ.

ಕೈ ಚಲ್ಲಿದ ರೈತರು:

ರೈತರು ಬೆಳೆಗಳನ್ನು ಮಕ್ಕಳಂತೆ ಪೋಷಿಸಿ ಬೆಳೆಸುವುದು ವಾಡಿಕೆ. ಬಿತ್ತನೆ ಮಾಡಿದ ನಂತರದ ದಿನಗಳಲ್ಲಿ ಬೆಳೆದ ಬೆಳೆ ಒಣಗಲು ಪ್ರಾರಂಭಿಸಿದಾಗ ಕೆಲವು ರೈತರು ಕೊಳವೆ ಭಾವಿಯಿಂದ ದೊಡ್ಡ ಜೆಟ್ ಉಪಯೋಗಿಸಿ ಹನಿ ನೀರಾವರಿ ಹಾಗೂ ಇನ್ನು ಕೆಲವರು ಸಮೀಪದ ಕೆರೆ ಹಾಗು ನಾಲೆಗಳಿಗೆ ಮೊಟರ್ ಅಳವಡಿಸಿ ನೀರು ಹರಿಸಿದರೂ ಸಹ ಬೆಳೆ ಉಳಿಸಿಕೊಳ್ಳಲು ಪ್ರಯೋಜನವಾಗದೆ ಕೈ ಚಲ್ಲಿ ಕುಳಿತಿದ್ದಾರೆ.

ಈ ಭಾರಿ ಶೇಖಡ 66% ಕಡಿಮೆ ಮಳೆ

ಕೃಷಿ ಇಲಾಖೆ ನೀಡಿರುವ ಅಂಕಿ ಅಂಶಗಳ ಪ್ರಕಾರ ತಾಲೂಕಿನಾದ್ಯಂತ ಈ ಭಾರಿ ಶೇ.66% ಕಡಿಮೆ ಮಳೆಯಾಗಿದೆ. ಹೆಸರಿಗಷ್ಟೆ ಮಲೆನಾಡಿನ ಭಾಗ ಎಂದನಿಸಿಕೊಂಡಿದ್ದು, ಮಳೆ ಪ್ರಮಾಣದಲ್ಲಿ ತುಂಬಾ ಇಳಿಕೆ ಕಂಡಿದೆ. ವಾಡಿಕೆಯಂತೆ ಈ ದಿನದವರೆಗೆ 252 ಮಿ.ಮೀ. ಮಳೆೆಯಾಗಬೇಕಿತ್ತು. ಆದರೆ ಕೇವಲ 101 ಮಿ.ಮೀ. ಅಷ್ಟೆ ಈ ಭಾರಿ ಮಳೆಯಾಗಿದೆ.

ಕೃಷಿ ಇಲಾಖೆಯಿಂದ ಆಂದೋಲನ

ಈಗಾಗಲೆ ಕೆಲವು ಪ್ರದೇಶಗಳಿಗೆ ಬೇಟಿ ನೀಡುತ್ತಿರುವ ಕೃಷಿ ಇಲಾಖೆ ಅಧಿಕಾರಿಗಳು, ಕೆಲವು ಮಾಯಿತಿ ನೀಡುತಿದ್ದಾರೆ. ಕಳೆದ ವರ್ಷ ಬಿಳಿಸುಳಿ ರೋಗ ಕಾಣಿಸಿಕೊಂಡ ಪ್ರದೇಶದಲ್ಲಿ ಮತ್ತೆ ಜೋಳ ಬಿತ್ತನೆ ಮಾಡುವುದನ್ನು ಕಮ್ಮಿ ಮಾಡಿ, ದ್ವಿದಳ ದಾನ್ಯ ಬೆಳೆಯಲು ಪ್ರೋತ್ಸಯಿಸುತ್ತಿದ್ದಾರೆ. ರೋಗ ಹತೋಟಿಗೆ ಬರಲು ಔಷಧಿ ಸಿಂಪಡಿಸುವಂತೆ ಸಲಯೇ ನೀಡುತ್ತಿದ್ದಾರೆ.

ಕೊಟ್ಟಿಗೆ ಗೊಬ್ಬರ ಬಳಸಿ

ರೋಗಬಾದೆ ತಡೆಯಲು ಔಷಧಿ ಸಿಂಪಡಣೆ ಮಾಡಬೇಕು. ಔಷಧಿ ರೈತ ಸಂಪರ್ಕ ಕೇಂದ್ರದಲ್ಲೇ ಲಭ್ಯವಿದೆ. ಔಷಧಿ ಸಿಂಪಡಣೆ ಮಾಡುವುದಕ್ಕು ಮೊದಲು, ಆ ಪ್ರದೇಶ ತೇವಾಂಶದಿಂದ ಕೂಡಿರಬೇಕು. ನಂತರ ಎರಡು ಮೂರು ದಿನ ನೀರು ಕೊಡಬಾರದು. ರೈತರು ತಮ್ಮ ಹೊಲಗಳಿಗೆ ಕೊಟ್ಟಿಗೆ ಗೊಬ್ಬರ ಬಳಸಬೇಕು. ರೋಗ ಕಾಣಿಸಿಕೊಂಡ ಪ್ರದೇಶದಲ್ಲಿ ಮತ್ತೆ ಜೋಳ ಬೆಳೆ ಬೆಳೆಯುವುದನ್ನು ಕಮ್ಮಿ ಮಾಡಬೇಕು. ದ್ವಿದಳ ದಾನ್ಯಗಳನ್ನು ಬೆಳೆಯಬೇಕು ಎಂದು ಸಹಾಯಕ ಕೃಷಿ ನಿರ್ದೇಶಕ ಕಾಂತರಾಜು ಹೇಳುತ್ತಾರೆ.

ಕೋಟ್

ಸಸರಿಯಾದ ಪ್ರಮಾಣದಲ್ಲಿ ಮಳೆ ಬಾರದೆ ಜೋಳ ಸಂಪೂರ್ಣ ಒಗುತ್ತಿರುವುದು ಒಂದೆಡೆಯಾದರೆ, ಬಿಳಿಸುಳಿ ರೋಗ ಜೋಳ ಬಿತ್ತನೆಯ 30 ದಿನಗಳಲ್ಲೆ ಕಾಣಿಸಿಕೊಳ್ಳುತ್ತಿದೆ. ಎರಡು ಮೂರು ದಿನ ನೋಡು ನೋಡುತ್ತಿರುವಂತೆ ಸಂಪೂರ್ಣ ಜೋಳವನ್ನೆ ಆಕ್ರಮಿಸಿಕೊಳ್ಳುತ್ತಿದೆ. ಕೃಷಿ ಇಲಾಖಾ ಅಧಿಕಾರಿಗಳು ಬೀಜೋಪಚಾರ ಮಾಡಿದ್ದ ಮೇಲೆ ಬೀಜಗಳನ್ನು ವಿತರಿಸುತ್ತಿದ್ದೇವೆ ಎನ್ನುತ್ತಾರೆ. ಆದರೆ ರೋಗ ಕಾಣಿಸಿಕೊಳ್ಳುತ್ತಿರುವುದನ್ನು ನೋಡಿದರೆ ಅಧಿಕಾರಿಗಳ ಮಾತು ಸುಳ್ಳು ಎನಿಸುತ್ತಿದೆ.

ಸುಮಂತ್, ಪೇಟೇಹಳ್ಳಿ ಯುವ ರೈತ

ಈಗಾಗಲೆ ಬಿಳಿ ಸುಳಿ ರೋಗ ತಡೆಯಲು ಕೃಷಿ ವಿಜ್ಞಾನ ಕೇಂದ್ರದಲ್ಲೆ ಪರೀಕ್ಷೆ ನಡೆಸಿ ಜಿಲ್ಲೆಯಾದ್ಯಂತ ಬಿತ್ತನೆ ಬೀಜ ವಿತರಿಸಿರುವುದರಿಂದ ಕಳೆದ ವರ್ಷಕ್ಕಿಂತ ಈ ವರ್ಷ ಸಂಪೂರ್ಣ ರೋಗ ಹತೋಟಿಗೆ ಬಂದಿದೆ. ಉಳಿದಂತೆ ಈಗಾಗಲೆ ಕಂಡುಬರುತ್ತಿರುವ ರೋಗವನ್ನು ಮನಗಂಡು ನಮ್ಮ ಅಧಿಕಾರಿ ವರ್ಗದವರು ರೈತರ ಜಮೀನಿಗೆ ತೆರೆಳಿ ಮುಂಜಾಗೃತ ಕ್ರಮಗಳ ಬಗ್ಗೆ ಮಾಯಿತಿ ನೀಡುತ್ತಿದ್ದಾರೆ.

ಕಾಂತರಾಜು ಸಹಾಯಕ ಕೃಷಿ ನಿರ್ದೇಶಕರು ಬೇಲೂರು.