ಮಿತಿ ಮೀರಿದ ಎರಡು ಕಾಡಾನೆಗಳ ಉಪಟಳ

ತಾಲೂಕು ವ್ಯಾಪ್ತಿಯಲ್ಲಿ ವಿವಿಧ ಗ್ರಾಮಗಳಲ್ಲಿ ಕಾಡಾನೆಗಳು ಬೀಡು ಬಿಟ್ಟು, ನಿತ್ಯ ಒಂದಿಲ್ಲೊಂದು ತೋಟ, ಜಮೀನಿಗೆ ನುಗ್ಗುತ್ತಲೇ ಇವೆ. ಇದರಿಂದಾಗಿ ಕೈಗೆ ಬಂದ ತುತ್ತು ಬಾಯಿಗೆ ಬರಲಿಲ್ಲ ಎಂಬಂತಾಗಿದೆ. ಆದರೆ ಕಳೆದ ನಾಲ್ಕೈದು ವರ್ಷಗಳಿಂದ ತಾಲೂಕಿನ ಹಲವಾರು ಗ್ರಾಮಗಳಲ್ಲಿ ನಿರಂತರವಾಗಿ ಕಾಣಿಸಿಕೊಳ್ಳುತ್ತಿರುವ ಕಾಡಾನೆಗಳು ಕಾಫಿ ತೋಟ, ಭತ್ತದ ಗದ್ದೆ, ಅಡಕೆ, ಬಾಳೆ ಸೇರಿದಂತೆ ಎಲ್ಲ ಬೆಳೆಗಳನ್ನು ತಿನ್ನುವುದಲ್ಲದೆ ತೋಟಗಳಲ್ಲಿ ಅಳವಡಿಸಿದ್ದ ಮೋಟಾರ್ ಪಂಪ್‌ಗಳು, ಪೈಪ್‌ಗಳನ್ನು ತುಳಿದು ಹಾಳು ಮಾಡುತ್ತಿವೆ. ಕೆಲವೊಂದು ಆನೆಗಳು ಆಹಾರ ಅರಸಿ ಮನೆಗಳ ಅಂಗಳಕ್ಕೂ ನುಗ್ಗುತ್ತಿರುವುದು ಮತ್ತಷ್ಟು ಆತಂಕಕ್ಕೆ ಕಾರಣವಾಗುತ್ತಿದೆ.

ಈ ನಡುವೆ ರಸ್ತೆಯಲ್ಲಿ ಸಂಚರಿಸುವವರ ಮೇಲೆ, ತೋಟ ಹಾಗೂ ಕಾಡಿನ ಮರೆಯಿಂದ ದಿಢೀರ್ ದಾಳಿ ಮಾಡಿ ಜನರ ಪ್ರಾಣಕ್ಕೂ ಸಂಚಕಾರ ತರುತ್ತಿರುವ ಘಟನೆಗಳು ಇತ್ತೀಚಿನ ದಿನಗಳಲ್ಲಿ ಹೆಚ್ಚಾಗಿದೆ. ಇದರಿಂದಾಗಿ ಸಾಕಷ್ಟು ಜನರು ಕಾಡಾನೆಗಳ ದಾಳಿಗೆ ಬಲಿಯಾಗಿದ್ದಲ್ಲದೆ, ಹಲವರು ಗಂಭೀರವಾಗಿ ಗಾಯಗೊಂಡು ಚಿಕಿತ್ಸೆ ಪಡೆದಿರುವ ಘಟನೆಗಳೂ ಕಣ್ಣ ಮುಂದೆಯೇ ಇವೆ. ಇನ್ನು ಕಾಫಿ ತೋಟಗಳಲ್ಲಿ ಕೂಲಿಯನ್ನೇ ನಂಬಿ ಜೀವನ ನಡೆಸುವ ಕೂಲಿ ಕಾರ್ಮಿಕರ ಸ್ಥಿತಿ ಹೇಳಲು ಸಾಧ್ಯವಿಲ್ಲ. ಕೆಲಸವಿಲ್ಲದೆ ಕಾರ್ಮಿಕರು ಜೀವನ ನಡೆಸುವುದು ಹೇಗೆ ಎಂಬ ಚಿಂತೆ ನಡುವೆಯೇ ಕಾಡಾನೆಗಳ ಉಪಟಳವಿದ್ದರೂ ಜೀವ ಭಯದಲ್ಲೆ ತೋಟಗಳಿಗೆ ಕೆಲಸಕ್ಕೆ ತೆರಳುವಂತಾಗಿದ್ದು, ಆನೆಗಳ ದಾಳಿಗೆ ತುತ್ತಾಗುತ್ತಿರುವುದಲ್ಲದೆ ಗಾಯಗೊಳ್ಳುತ್ತಿದ್ದಾರೆ.

ಇತ್ತೀಚೆಗೆ ಗುಂಪಿನಿಂದ ಬೇರಾಗಿರುವ ಎರಡು ಕಾಡಾನೆಗಳು ಸಾಕಷ್ಟು ದಿನಗಳಿಂದ ಜತೆಯಾಗಿ ಮಲೆನಾಡಿನ ವಿವಿಧ ಗ್ರಾಮಗಳಿಗೆ ಲಗ್ಗೆ ಇಡುತ್ತಿವೆ. ಈ ಎರಡು ಆನೆಗಳ ಪೈಕಿ ಒಂದು ಆನೆ ಮಾತ್ರ ಆಟೋ, ಬೈಕ್ ಸೇರಿದಂತೆ ಇತರ ವಾಹನಗಳ ಮೇಲೆ ದಾಳಿಗೆ ಮುಂದಾಗುತ್ತಿದೆ. ಕೆಲ ದಿನಗಳ ಹಿಂದಷ್ಟೆ ರಾತ್ರಿ ಸಮಯದಲ್ಲಿ ಬೈಕ್ ಸವಾರರಿಬ್ಬರು ಎರಡು ಕಾಡಾನೆಗಳಿಂದ ಕೂದಲೆಳೆ ಅಂತರದಲ್ಲಿ ಪಾರಾದ ಘಟನೆ ನಡೆದಿದೆ.

ಇದೇ ಎರಡು ಆನೆಗಳು ಇತ್ತೀಚೆಗೆ ತಾಲೂಕಿನ ಮಲೆನಾಡು ಬಾಗದ ಬಹುತೇಕ ಗ್ರಾಮಗಳಲ್ಲಿ ಕಾಣಿಸಿಕೊಂಡು ಆತಂಕ ಸೃಷ್ಟಿಸಿವೆ. ಜತೆಗೆ ಮೂಡಿಗೆರೆ ಕಡೆಯಿಂದ ಬಂದ ಮತ್ತೆರಡು ಕಾಡಾನೆಗಳು ಎರಡು ದಿನದ ಹಿಂದೆ ಬೆಳ್ಳಂಬೆಳಗ್ಗೆ 7 ಗಂಟೆ ಸಮಯದಲ್ಲಿ ಚೀಕನಹಳ್ಳಿ-ಬಂಡೆ ಸಮೀಪದ ತೋಟದ ಪಕ್ಕದ ರಸ್ತೆಯಲ್ಲಿ ಕಾಣಿಸಿ ಕೊಂಡು ಪೂರ್ಣೇಶ್‌ಗೌಡ ಅವರ ತೋಟಕ್ಕೆ ಅಳವಡಿಸಿದ್ದ ಸೋಲಾರ್ ವಿದ್ಯುತ್ ತಂತಿ ಬೇಲಿ ತುಂಡರಿಸಿ, ತೋಟದೊಳಕ್ಕೆ ನುಗ್ಗಿ ತೋಟದೊಳಗಿನ ಕಾಫಿ, ಅಡಕೆ ಗಿಡಗಳನ್ನು ತುಳಿದು, ಸೊಂಡಿಲಿನಿಂದ ತಳ್ಳಿ ರಸ್ತೆಗೆ ಬೀಳಿಸಿ ಮುಂದೆ ಸಾಗಿದ್ದರಿಂದ ಸಾಕಷ್ಟು ಕಾಫಿ ಹಾಗೂ ಅಡಕೆ ಗಿಡಗಳು ನೆಲಕ್ಕುರುಳಿವೆ.

ಎರಡು ಕಾಡಾನೆಗಳು ಬೆಳೆ ನಾಶಪಡಿಸುತ್ತಿವೆ ಇಲ್ಲಿಂದ ಅವುಗಳನ್ನು ಓಡಿಸಿ ಎಂದು ಅರಣ್ಯ ಇಲಾಖೆಗೆ ಮಾಹಿತಿ ನೀಡಿದರೆ ಅವರು ಯಾವಾಗಲೋ ಬರುತ್ತಾರೆ ಎಂದು ಆರೋಪಿಸುತ್ತಾರೆ ಕಾಫಿ ಬೆಳೆಗಾರರು. ಯಾರೂ ಈ ಆನೆಗಳ ತಂಟೆಗೆ ಹೋಗದೆ ಅವುಗಳ ಪಾಡಿಗೆ ಅವು ಹೋಗಲು ಬಿಟ್ಟು ಏನೂ ಮಾಡಲಾಗದೆ ದೂರದಲ್ಲೇ ನಿಂತು ಓಡಿಸುವಂತಾಗಿದೆ. ಅವಘಡ ಸಂಭವಿಸುವ ಮುನ್ನ ಇನ್ನಾದರೂ ತಾಲೂಕಿನಲ್ಲಿ ಬೀಡು ಬಿಟ್ಟಿರುವ ಕಾಡಾನೆಗಳೊಂದಿಗೆ ಆಕ್ರಮಣಕಾರಿಯಾಗಿರುವ ಗುಂಪಿನಿಂದ ಬೇರಾಗಿರುವ ಒಂಟಿ ಹಾಗೂ ಜೋಡಿ ಕಾಡಾನೆಗಳನ್ನು ಸಹ ಶಾಶ್ವತವಾಗಿ ಕಾಡಿಗಟ್ಟಲು ಸರ್ಕಾರ, ಅರಣ್ಯ ಇಲಾಖೆ ಹಿರಿಯ ಅಧಿಕಾರಿಗಳು ಮುಂದಾಗಬೇಕಿದೆ ಎಂಬುದು ಸಾರ್ವಜನಿಕರು ಆಗ್ರಹ.