ಪುಷ್ಪಗಿರಿ ಮಠಕ್ಕೆ ವಾಪಸ್ ಮರಳುತ್ತೇನೆ

ಬೇಲೂರು : ಪುಷ್ಪಗಿರಿ ಮಠ ಹಾಗೂ ನಂದಿಗುಡಿ ವೃಷಭಪುರಿ ಮಠಕ್ಕೆ ಅಡಿಪಾಯ ಹಾಕಿ ಸಮಾಜದ ಸಂಘಟನೆಗೆ ಒತ್ತು ನೀಡಿದ್ದೆ, ಆದರೆ ಪೀಠ ತ್ಯಾಗ ಮಾಡಿದ ನಂತರ ಭಕ್ತರು ಸೀಗೆಗುಡ್ಡದಲ್ಲಿ ಅವಕಾಶ ಕಲ್ಪಿಸಿದ್ದು, ಪುಷ್ಪಗಿರಿ ಮಠಕ್ಕೆ ವಾಪಸ್ ಮರಳುತ್ತೇನೆ ಎಂಬ ಆತಂಕ ಯಾರಿಗೂ ಬೇಡ ಎಂದು ಹಾಸನ ಸೀಗೆಗುಡ್ಡದ ಶ್ರೀ ನಂದೀಶ್ವರ ಶಿವಾಚಾರ್ಯ ಸ್ವಾಮೀಜಿ ಹೇಳಿದರು.

ತಾಲೂಕಿನ ಹೆಬ್ಬಾಳು ಗ್ರಾಮದಲ್ಲಿ ಸೋಮವಾರ ಆಯೋಜಿಸಿದ್ದ ಇಷ್ಟಲಿಂಗ ಪೂಜೆ ಹಾಗೂ ಶಿವಾನುಭವ ಕಾರ್ಯಕ್ರಮದ ದಿವ್ಯ ಸಾನಿಧ್ಯ ವಹಿಸಿ ಆರ್ಶಿವಚನ ನೀಡಿದ ಅವರು, ವಿದ್ಯಾರ್ಥಿಯಾಗಿದ್ದಾಗಲೇ ಯಲಗುಂದ ಮಠಕ್ಕೆ ಸ್ವಾಮೀಜಿಗಳಾಗಿದ್ದೆ, ನಂತರ ದಾವಣಿಗೆರೆ ಜಿಲ್ಲೆ ನಂದಿಗುಡಿ ಮಠಕ್ಕೆ ಪೀಠಾಧಿಪತಿಯಾಗಿ ಹಾಗೂ ಶ್ರೀ ಬಸವರಾಜೇಂದ್ರ ಸ್ವಾಮೀಜಿಗಳು ಲಿಂಗೈಕ್ಯರಾದ ನಂತರದಲ್ಲಿ ಭಕ್ತರ ಅಭಿಲಾಷೆಯಂತೆ ಪುಷ್ಪಗಿರಿ ಮಠದ ಜವಾಬ್ದಾರಿ ಹೊತ್ತು ಭಕ್ತರ ಸಹಕಾರದಿಂದ ನಂದಿಗುಡಿ ಮತ್ತು ಪುಷ್ಪಗಿರಿ ಮಠಗಳ ಅಭಿವೃದ್ದಿಗೆ ಸಾಕಷ್ಟು ಕೆಲಸ ನಿರ್ವಹಿಸಿದ್ದೆ. ಆದರೆ ಪೀಠ ತ್ಯಾಗದ ನಂತರ ನಾವು ಭಕ್ತರಿಗೆ ಸೇರಿದ ಯಾವುದೇ ವಸ್ತುಗಳನ್ನು ನಮ್ಮೊಂದಿಗೆ ತೆಗೆದುಕೊಂಡು ಹೋಗಲಿಲ್ಲ. ಆ ಕಾರಣದಿಂದಲೇ ಭಕ್ತರು ನಮ್ಮನ್ನು ಇಲ್ಲಿತನಕ ಕೈಬಿಡದೆ ಪ್ರೀತಿ ಅಭಿಮಾನ ತೋರುತಿದ್ದಾರೆ. ಕರೆಯುವ ಭಕ್ತರ ಮನೆಗೆ ತೆರಳಿ ಅಲ್ಲಿ ಪೂಜೆ ಸೇರಿದಂತೆ ಹಿತವಚನ ಹೇಳುವುದು ಬಿಟ್ಟರೆ ಬೇರೆ ಪೀಠಗಳ ಬಗ್ಗೆ ಚರ್ಚೆ ನಡೆಸಲು ನಮಗೆ ಸಮಯವಿಲ್ಲ, ನಾವು ಈಗಲೂ ಕಾಯಕ ಮತ್ತು ದಾಸೋಹದ ಬಗ್ಗೆ ಅಪಾರ ನಂಬಿಕೆ ಇಟ್ಟುಕೊಂಡು ಕೆಲಸ ಮಾಡುತಿದ್ದೇವೆ ಎಂದರು.

ದೊಡ್ಡಬೇಡಗೆರೆ ದೊಡ್ಡವೀರೇಗೌಡ ಮಾತನಾಡಿ, ಶ್ರೀ ಬಸವರಾಜೇಂದ್ರ ಸ್ವಾಮೀಜಿಗಳ ಆಶೋತ್ತರದಂತೆ ಭಕ್ತರು ಪುಷ್ಪಗಿರಿಯಲ್ಲಿ ಮಠ ನಿರ್ಮಿಸಿದ ನಂತರ ಭಕ್ತರ ಬೇಡಿಕೆಯಂತೆ ಶ್ರೀ ನಂಧೀಶ್ವರ ಶಿವಾಚಾರ್ಯ ಸ್ವಾಮೀಜಿಗಳು ಅಧಿಕಾರ ವಹಿಸಿಕೊಂಡು ಪುಷ್ಪಗಿರಿ ಮಠದ ಕೀರ್ತಿ ಹೆಚ್ಚಿಸಿದ್ದಾರೆ. ಅವರು ಈಗ ಸೀಗೆಗುಡ್ಡದ ಮಠದಲ್ಲಿ ನಿತ್ಯ ದಾಸೋಹ ಆರಂಭಿಸಿದ್ದಾರೆ. ಅವರ ಮಾರ್ಗದರ್ಶನ ಸಮಾಜಕ್ಕೆ ಅಗತ್ಯವಾಗಿದೆ ಎಂದರು.

ತಾ.ಶರಣ ಸಾಹಿತ್ಯ ಪರಿಷತ್ತು ಅಧ್ಯಕ್ಷ ಹೆಬ್ಬಾಳು ಹಾಲಪ್ಪ, ಕಾರ್ಯದರ್ಶಿ ರಾಜಕುಮಾರ್, ಖಜಾಂಚಿ ಧನಂಜಯ್, ನಿವೃತ್ತ ಶಿಕ್ಷಕರಾದ ಧನಂಜಯ್, ರಮೇಶಪ್ಪ, ಭಕ್ತರಾದ ರಾಜಶೇಖರ್, ಮಲ್ಲೇಶ್, ಮೋಹನ್, ಮಲ್ಲೇಶಣ್ಣ, ಪುಟ್ಟಬಸವಯ್ಯ, ಪ್ರಕಾಶ, ಪುಷ್ಪಗಿರಿ ಗ್ರಾಮೀಣಾಭಿವೃದ್ದಿ ಸಂಸ್ಥೆ ಯೋಜನಾಧಿಕಾರಿ ವಿನುತ, ಗೆಂಡೇಹಳ್ಳಿ ಚೇತನ್, ಬಸವರಾಜ್, ಉದಯ್, ಸುಂದ್ರಣ್ಣ, ರಾಜಶೇಖರ್, ಪುನೀತ್, ವೇದಮೂರ್ತಿ ಇತರರಿದ್ದರು.