ಅಗಿಲೆ ಗ್ರಾಮಸ್ಥರ ಮೌನ ಪ್ರತಿಭಟನೆ

ಗ್ರಾಮದಲ್ಲಿ ಮುಖ್ಯ ರಸ್ತೆ ಜಾಗ, ಕುಂತಿ ಬೆಟ್ಟದ ಸರ್ಕಾರಿ ಜಮೀನು ಮತ್ತು ಪಿಂಚಿನಕಟ್ಟೆ ಕೆರೆ ಜಾಗವನ್ನು ಗ್ರಾಮದ ನಾಗರಾಜ್ ಎಂಬುವರು ಒತ್ತುವರಿ ಮಾಡಿದ್ದಾರೆ. ಗ್ರಾಮದ ಸರ್ವೇ ನಂ. 171 ರಲ್ಲಿ ದರಖಾಸ್ತು ಮೂಲಕ ಮಂಜೂರಾದ 3 ಎಕರೆ ಜಮೀನು ಈಗ ಸರ್ವೇ ನಂ. 235 ಆಗಿ ನಾಗರಾಜ್ ಎಂಬುವರ ಹೆಸರಿಗೆ ವರ್ಗಾವಣೆಯಾಗಿದೆ.

ಅದೇ ವ್ಯಕ್ತಿಗೆ ಸರ್ವೇ ನಂ. 171 ರಲ್ಲಿ 1 ಎಕರೆ 35 ಗುಂಟೆ ಜಮೀನು ಮಂಜೂರಾಗಿದೆ. ಆದರೆ ನಾಗರಾಜ್ ತಮ್ಮ ಜಮೀನಿಗೆ ತಂತಿ ಬೇಲಿ ಹಾಕಲು ಯಾವುದೇ ಸರ್ವೇ ಮಾಡದೆ, ಕುಂತಿ ಬೆಟ್ಟದ ಸರ್ಕಾರಿ ಜಮೀನಿನಲ್ಲಿರುವ ಕಲ್ಲು ಬಂಡೆಗಳನ್ನು ಹಿಟಾಚಿ ಬಳಸಿ ಒತ್ತುವರಿ ಮಾಡಿದ್ದಾರೆ ಎಂದು ದೂರಿದರು.

ಪುರಾತನ ದೇವಸ್ಥಾನ, ಜಾತ್ರೆ ನಡೆಯುವ ಸ್ಥಳ, ಒತ್ತುವರಿಯಾದ ಜಾಗದಲ್ಲಿದೆ. ವರ್ಷಕ್ಕೊಮ್ಮೆ ಏಳು ಊರಿನ ಜನ ಸೇರಿ ಕುಂತಿ ಬೆಟ್ಟ ಲಕ್ಷ್ಮೀದೇವಿ ಜಾತ್ರಾ ಮಹೋತ್ಸವವನ್ನು ಇಲ್ಲೇ ಅದ್ದೂರಿಯಾಗಿ ಆಚರಿಸಿಕೊಂಡು ಬರುತ್ತಿದ್ದಾರೆ. ಈ ಐತಿಹಾಸಿಕ-ಧಾರ್ಮಿಕ ಪ್ರಾಮುಖ್ಯ ಇರುವ ಸ್ಥಳ ಒತ್ತುವರಿಯಿಂದ ಜಾತ್ರೆಗೆ ಅಡ್ಡಿ ಮತ್ತು ಗ್ರಾಮಸ್ಥರ ನಂಬಿಕೆಗೆ ಧಕ್ಕೆ ಬರಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು.

ಅಧಿಕಾರಿಗಳು ಕೂಡಲೇ ಸ್ಥಳ ಪರಿಶೀಲನೆ ನಡೆಸಿ ಸರ್ಕಾರಿ ಜಾಗ ಮತ್ತು ದೇವಸ್ಥಾನದ ಭೂಮಿಯನ್ನು ಒತ್ತುವರಿಯಿಂದ ಮುಕ್ತಗೊಳಿಸಬೇಕು ಎಂದು ಮನವಿ ಮಾಡಿದರು.

ಅಗಿಲೆ-ದೊಡ್ಡಬಾಗನಹಳ್ಳಿಯ 60 ಅಡಿ ಮುಖ್ಯ ರಸ್ತೆ, ಕೆರೆ ಜಾಗವನ್ನೂ ಒತ್ತುವರಿ ಮಾಡಿದ್ದು, ಜಿಪಂ ಅನುದಾನ ಹಾಗೂ ಗ್ರಾಪಂ ಉದ್ಯೋಗ ಖಾತ್ರಿ ಯೋಜನೆಯಡಿ ಹಲವು ಬಾರಿ ಜಲ್ಲಿ ರಸ್ತೆ ನಿರ್ಮಿಸಲಾಗಿದೆ. ಆದರೀಗ ಜೆಸಿಬಿ ಮೂಲಕ ರಸ್ತೆ ಮುಚ್ಚಿಸಿ ಒತ್ತುವರಿ ಮಾಡಿದ್ದಾರೆ. ಕೆರೆಯನ್ನೂ ಕಬಳಿಸಿದ್ದು, ರೈತರು ಮತ್ತು ಸಾರ್ವಜನಿಕರ ಓಡಾಟಕ್ಕೆ ಇದ್ದ ಏಕೈಕ ಮುಖ್ಯ ರಸ್ತೆಗೆ ಅಡ್ಡಿಯಾಗಿದೆ. ಈ ಜಾಗವನ್ನು ಬಿಡಿಸಿ, ತಪ್ಪಿತಸ್ಥರ ವಿರುದ್ಧ ಕ್ರಮ ಜರುಗಿಸಬೇಕು ಎಂದು ಆಗ್ರಹಿಸಿದರು.

ಈ ವೇಳೆ ಗ್ರಾಪಂ ಮಾಜಿ ಅಧ್ಯಕ್ಷ ಅಗಿಲೆ ನವೀನ್ ಕುಮಾರ್, ಗ್ರಾಮಸ್ಥರಾದ ಚನ್ನೇಗೌಡ, ರಾಮೇಗೌಡ, ಶಾಂತಮ್ಮ, ಲಕ್ಷ್ಮೇಗೌಡ ಇತರರಿದ್ದರು.