ಸಮಸ್ಯೆ ಅರ್ಜಿಗಳನ್ನು ವಾರದಲ್ಲಿ ಇತ್ಯರ್ಥಪಡಿಸಿ

ಪಟ್ಟಣದ ತಾಲೂಕು ಕಚೇರಿಯಲ್ಲಿ ಶನಿವಾರ ಆಯೋಜಿಸಿದ್ದ ಜನಸ್ಪಂದನ ಸಭೆಯಲ್ಲಿ ಸಾರ್ವಜನಿಕರ ಕುಂದು ಕೊರತೆ ಆಲಿಸಿ ಅರ್ಜಿ ಸ್ವೀಕರಿಸಿ ಮಾತನಾಡಿದರು. ತಿಂಗಳ ಮೊದಲನೇ ಶನಿವಾರ ನಡೆಯುವ ಜನಸ್ಪಂದನ ಸಭೆಯಲ್ಲಿ ಸ್ವೀಕರಿಸಿದ ಸಮಸ್ಯೆಗಳ ಅರ್ಜಿಗಳನ್ನು 7 ದಿನಗಳೊಳಗೆ ಇತ್ಯರ್ಥಪಡಿಸಿ ಎಂದು ನಿರ್ದೇಶನ ನೀಡಿದರು.

ಪಟ್ಟಣದಲ್ಲಿ ಬೆಳೆದಿರುವ ಮರಗಳನ್ನು ಸಂಪೂರ್ಣ ಕಡಿದು ಹಾಕಬೇಡಿ, ಪಾರ್ಕ್‌ನಲ್ಲಿದ್ದ ಮರವನ್ನು ಕಡಿದಿರುವ ಬಗ್ಗೆ ಸಾರ್ವಜನಿಕರಿಂದ ವ್ಯಾಪಕ ದೂರು ಕೇಳಿ ಬಂದಿದೆ. ಹಾಗಾಗಿ ಕೇವಲ ಕೊಂಬೆಗಳನ್ನು ಕಡಿದು ಹಾಕುವ ಮೂಲಕ ಮರಗಳನ್ನು ಉಳಿಸಿ ಎಂದು ಅರಣ್ಯ ಇಲಾಖೆಗೆ ಸಲಹೆ ನೀಡಿದರು.

ಕಂದಾಯ ಇಲಾಖೆಗೆ ಒಳಪಡುವ 14 ಅರ್ಜಿಗಳು, ಪುರಸಭೆಗೆ 3, ಸರ್ವೇ ಇಲಾಖೆಗೆ 8, ತಾಲೂಕು ಪಂಚಾಯಿತಿಗೆ 3, ಆಹಾರ ಇಲಾಖೆಗೆ 2, ಪಟ್ಟಣದ ಸಾರ್ವಜನಿಕ ಆಸ್ಪತ್ರೆಗೆ 1, ಸೆಸ್ಕ್‌ಗೆ 1, ಕೃಷಿ ಇಲಾಖೆಗೆ 1 ಸೇರಿದಂತೆ ನಾನಾ ಶಾಲೆಗಳ ಜಾಗ ಒತ್ತುವರಿ ತೆರವುಗೊಳಿಸುವಂತೆ ಹಾಗೂ ಶಾಲೆಗೆ ಖಾತೆ ಮಾಡಿಕೊಡುವಂತೆ ಕೋರಿ ಅರ್ಜಿ ಸಲ್ಲಿಕೆಯಾಯಿತು.

ಹಡವನಹಳ್ಳಿ ಗ್ರಾಮದ ಯುವ ರೈತ ಲಕ್ಕೇಗೌಡ ಮಾತನಾಡಿ, ನನ್ನ ಹೆಸರಿನಲ್ಲಿ 11.14 ಎಕರೆ ಜಮೀನು ಇತ್ತು. ನಾಲೆ ಮತ್ತು ರಸ್ತೆ ನಿರ್ಮಾಣಕ್ಕಾಗಿ 1974 ರಲ್ಲಿ ಸರ್ಕಾರ ಭೂಸ್ವಾಧೀನ ಪಡಿಸಿಕೊಂಡಿದೆ. ಪರಿಹಾರ ಮೊತ್ತ 500 ರೂ.ಪಡೆದಿದ್ದೇನೆ. ಪ್ರಸ್ತುತ 4 ಗುಂಟೆ ಇದೆ ಎಂದು ಪಹಣಿಯಲ್ಲಿನ ನನ್ನ ಹೆಸರು ಬರುತ್ತಿದೆ. ಆದರೆ ಉಳಿಕೆ ಭೂಮಿ ಕಳೆದು ಹೋಗಿದೆ ಗುರುತಿಸಿ ಕೊಡಿ ಎಂದು ಅರ್ಜಿ ನೀಡಿದ್ದು, ಸಭೆಯಲ್ಲಿ ಹುಬ್ಬೇರಿಸುವಂತೆ ಮಾಡಿತ್ತು. ಮುಂದಿನ 4 ದಿನಗಳ ನಂತರ ಜಾಗ ಸರ್ವೇ ಮಾಡಿಸಿ ಗುರುತು ಪಡಿಸುವಂತೆ ಭೂ ಮಾಪಕರಿಗೆ ತಹಸೀಲ್ದಾರ್ ಸೂಚನೆ ನೀಡಿದರು.

ಹಡವನಹಳ್ಳಿ ಗ್ರಾಮದ ಕಿರಣ ಮಾತನಾಡಿ, ತಾಯಿಯ ಸಹಿ ನಕಲಿ ಮಾಡಿದ್ದಾರೆ. ಪ್ರಕರಣ ಕುರಿತು ಉಪವಿಭಾಗಾಧಿಕಾರಿ ಕಚೇರಿಯಲ್ಲಿ ಇತ್ಯರ್ಥ ಬಾಕಿ ಇದೆ. ಕಳೆದ ಬಾರಿ ಜಿಲ್ಲಾಧಿಕಾರಿ ಲತಾಕುಮಾರಿ ತಾಲೂಕಿಗೆ ಭೇಟಿ ನೀಡಿದ್ದ ಸಂದರ್ಭ ಅರ್ಜಿ ಸಲ್ಲಿಸಿದ್ದೆ. ತಪ್ಪಿತಸ್ಥ ಕಂದಾಯ ಇಲಾಖೆ ನೌಕರರ ವಿರುದ್ಧ ಕ್ರಮಕ್ಕೆ ಆದೇಶಿಸಿದ್ದರು. ಈ ವರೆಗೂ ಕ್ರಮ ಕೈಗೊಳ್ಳದ ಬಗ್ಗೆ ಮನವಿ ಸಲ್ಲಿಸಿದರು. ಜಿಲ್ಲಾಧಿಕಾರಿಗೆ ವರದಿ ನೀಡುವುದಾಗಿ ತಹಸೀಲ್ದಾರ್ ಹಿಂಬರಹ ನೀಡಿದರು.

ತಾಲೂಕಿನ ಕಡವಿನಹೊಸಹಳ್ಳಿ ಶಾಲೆಗೆ ಸೇರಿದ 1.5 ಗುಂಟೆ ಜಮೀನನ್ನು ಒತ್ತುವರಿ ನಡೆಸಿದ್ದಾರೆ. ತೆರವುಗೊಳಿಸಿಕೊಡಿ ಎಂದು ಗ್ರಾಮದ ಕೆಲವರು ಅರ್ಜಿ ಸಲ್ಲಿಸಿದರು. ಬಂಡಿಗನಹಳ್ಳಿ ಶಾಲೆ ಜಾಗದಲ್ಲೇ ಮನೆ ನಿರ್ಮಿಸಿರುವ ಗ್ರಾಮಸ್ಥನ ವಿರುದ್ಧ ಶಿಕ್ಷಕ ದೂರು ಸಲ್ಲಿಸಿದರು. ಜೋಡಿಗುಬ್ಬಿ ಗ್ರಾಮದ ಶಾಲೆ ಖಾತೆ ಮಾಡಿಕೊಡುವಂತೆ ಕೋರಿ ಮುಖ್ಯಶಿಕ್ಷಕ ನಾಗರಾಜ್ ಅರ್ಜಿ ನೀಡಿದರು. ಬಿಇಒ ಸೋಮಲಿಂಗೇಗೌಡರು ಸ್ಥಳ ಪರಿಶೀಲನೆ ಸಂದರ್ಭ ಹಾಜರಿರುವಂತೆ ತಹಸೀಲ್ದಾರ್ ಭೇಟಿಗೆ ದಿನ ನಿಗದಿಪಡಿಸಲು ಸೂಚಿಸಿದರು.

ಪರಿಶಿಷ್ಟ ಸಮುದಾಯದ ಸವಲತ್ತು ಕೋರಿದ್ದರೂ, ಕೃಷಿ ಸಹಾಯಕ ನಿರ್ದೇಶಕಿ ಕೆ.ಎಚ್.ಸಪ್ನ ಸ್ಪಂದಿಸುತ್ತಿಲ್ಲ ಎಂದು ಪಟ್ಟಣದ ಪಾಸ್ವಾನ್ ಮತ್ತು ರಾಜೇಶ್ ತಹಸೀಲ್ದಾರ್ ಬಳಿ ದೂರು ನೀಡಿದರು. ಸೂಕ್ತ ಮಾಹಿತಿ ಮತ್ತು ಇಲಾಖೆ ನಿಯಮ ಅನುಸರಿಸಿ ಸವಲತ್ತು ಒದಗಿಸುವಂತೆ ತಹಸೀಲ್ದಾರ್ ರೇಣುಕುಮಾರ್ ಕೃಷಿ ಅಧಿಕಾರಿಗೆ ನಿರ್ದೇಶನ ನೀಡಿದರು.

ತಾಪಂ ಇಒ ಮುನಿರಾಜ್, ಸರ್ವೇ ಅಧಿಕಾರಿ ಹಾಗೂ ಎಲ್ಲ ಇಲಾಖೆ ಅಧಿಕಾರಿಗಳು ಹಾಜರಿದ್ದರು. ರಾಜ್ಯ ಸಾರಿಗೆ ಸಂಸ್ಥೆ ಡಿಪೋ ಮ್ಯಾನೇಜರ್ ಸಭೆಗೆ ಗೈರಾಗಿದ್ದರ ಬಗ್ಗೆ ನೋಟಿಸ್ ನೀಡುವಂತೆ ತಹಸೀಲ್ದಾರ್ ಸೂಚಿಸಿದರು.