ದೇವರು, ಧರ್ಮದ ಹೆಸರಿನಲ್ಲಿ ರಾಜಕೀಯ ಸಲ್ಲ

ತಾಲೂಕಿನ ಸುಕ್ಷೇತ್ರ ಅಮ್ಮನಹಟ್ಟಿ ಗಂಗಾಮಾಳಿಕ ದೇವಿಯ ಹಣ ದುರುಪಯೋಗ ಮಾಡಿಕೊಂಡಿದ್ದೇನೆ ಎಂದು ಸುಖಾ ಸುಮ್ಮನೆ ನನ್ನ ವಿರುದ್ಧ ಕೆಲವರು ಅಪಪ್ರಚಾರ ಮಾಡಲು ಮುಂದಾಗಿರುವುದು ಅಕ್ಷಮ್ಯ. ಹುಂಡಿಯ ಹಣ ಪಡೆಯುವ ಹೀನ ಮನಸ್ಥಿತಿ ನನ್ನದಲ್ಲ. ಗ್ರಾಮಸ್ಥರು ಹಾಗೂ ದೇವಾಲಯ ಟ್ರಸ್ಟ್ ಪದಾಧಿಕಾರಿಗಳ ಸಮ್ಮುಖದಲ್ಲಿ ದೇವಿಯ ಹಣ ಯಾವ ಉದ್ದೇಶಕ್ಕಾಗಿ ಬಳಸಲಾಗಿದೆ ಎಂಬುದನ್ನು ದಾಖಲೆ ಸಹಿತ ಬಹಿರಂಗ ಮಾಡಲಾಗಿದೆ. ನಮ್ಮ ಮನೆಯಲ್ಲಿ ನಡೆದ ವಿವಾಹ ಕಾರ್ಯಕ್ರಮದ ಯಶಸ್ಸು ಸಹಿಸದೆ ಹೆಸರು ಕೆಡಿಸುವ ಪ್ರಯತ್ನ ಮಾಡಿರುವುದು ಗುಟ್ಟಾಗಿ ಉಳಿದಿಲ್ಲ ಎಂದು ಮಂಗಳವಾರ ಸುದ್ದಿಗೋಷ್ಠಿಯಲ್ಲಿ ದೂರಿದರು.

ದೇವರು ಮತ್ತು ಧರ್ಮದ ಹೆಸರಿನಲ್ಲಿ ರಾಜಕೀಯ ಮಾಡಲು ಹೊರಟರೆ ಯಶಸ್ಸು ದೊರೆಯುವುದಿಲ್ಲ. ಇದೂ ಸಾಲದೆಂಬಂತೆ ಯುಗಾದಿ ದಿನ ನಡೆಯುವ ಗಂಗಮಾಳಿಕಾ ದೇವಿಯ ಜಾತ್ರೆ ನಿಲ್ಲಿಸಲು ನಡೆದ ಹುನ್ನಾರಕ್ಕೆ ಹೈಕೋರ್ಟ್ ತಕ್ಕ ಉತ್ತರ ನೀಡಿದ್ದು ಇನ್ನಾದರೂ ಕೀಳು ಮಟ್ಟದ ಪರಂಪರೆಗೆ ಶಾಸಕರು ಇತಿಶ್ರೀ ಹಾಡಬೇಕು. ಇಲ್ಲದಿದ್ದರೆ ಕ್ಷೇತ್ರದ ಜನತೆ ತಕ್ಕ ಪಾಠ ಕಲಿಸಲಿದ್ದಾರೆ ಎಂದು ಆಕ್ರೋಶ ವ್ಯಕ್ತಪಡಿಸಿದರು.

ಗಂಗಮಾಳಿಕಾ ದೇವಿಯ ಹಣದ ವಿಷಯದಲ್ಲಿ ಅಪಪ್ರಚಾರ ನಡೆಸಿದವರ ವಿರುದ್ಧ ಹೈಕೋರ್ಟ್‌ನಲ್ಲಿ ಮಾನನಷ್ಟ ಮೊಕದ್ದಮೆ ದಾಖಲಿಸಲಿದ್ದೇನೆ. ವಸ್ತು ಸ್ಥಿತಿ ತಿಳಿಯದ ಒಂದಿಬ್ಬರು ಯೂಟ್ಯೂಬ್ ವಾಹಿನಿಯ ಮೂಲಕ ಸುಳ್ಳು ಸುದ್ದಿ ಹರಡಿದ್ದು ನೋಟಿಸ್ ಕೊಡುವ ಜತೆಗೆ ಅಗತ್ಯ ಕ್ರಮಕ್ಕೆ ನ್ಯಾಯಾಲಯದ ಮೊರೆ ಹೋಗಲಿದ್ದೇನೆ ಎಂದು ಹೇಳಿದರು.

ದುಮ್ಮೇನಹಳ್ಳಿ ಗ್ರಾಮ ಪಂಚಾಯಿತಿ ಮಾಜಿ ಅಧ್ಯಕ್ಷ ಅಜಯ್ ಮಾತನಾಡಿ, ಜಾತ್ರೆ, ಉತ್ಸವಗಳನ್ನು ಸಂತೋಷದಿಂದ ಆಚರಿಸಲು ಪದೇ ಪದೆ ಅಡಚಣೆ ಮಾಡಲಾಗುತ್ತಿದೆ. ಹಿಂದುಳಿದ ವರ್ಗಗಳ ಜನರನ್ನು ಹೊಡೆದಾಡಿಸಿ ಖುಷಿ ಅನುಭವಿಸುವ ಚಾಳಿ ಒಳ್ಳೆಯದಲ್ಲ. ಪೊಲೀಸರು, ತಾಲೂಕು ಆಡಳಿತ ಜನಪರವಾದ ನಿಲುವು ತೆಗೆದುಕೊಳ್ಳಬೇಕು ಎಂದು ಮನವಿ ಮಾಡಿದರು.

ಉಮೇಶ್, ಗಂಗಣ್ಣ, ಶಿವಲಿಂಗಪ್ಪ, ಮಹಾಲಿಂಗಪ್ಪ, ನಟರಾಜ್ ಇತರರಿದ್ದರು.