ಈ ಬಾರಿ ಕಾಫಿ ಇಳುವರಿ ಕುಂಠಿತ

ಈಗಾಗಲೇ ತಾಲೂಕಿನಲ್ಲಿ ಶೇ.60 ರಷ್ಟು ಕಾಫಿ ಕೊಯ್ಲು ಮುಗಿದಿದೆ. ಕೊಯ್ಲು ನಡೆಸಿರುವ ಬೆಳೆಗಾರರು ಈ ಬಾರಿ ಇಳುವರಿ ಕುಂಠಿತವಾಗಿರುವುದರ ಜತೆಗೆ ಬೆಲೆ ಹಾಗೂ ಔಟ್ ಟನ್ ಸಹ ಇಲ್ಲ ಎಂಬ ಮಾತುಗಳನ್ನಾಡುತ್ತಿದ್ದಾರೆ.

ಕಳೆದ ಬಾರಿ ಮೇ ಮಧ್ಯಭಾಗದಿಂದ ಅಕ್ಟೋಬರ್ ಅಂತ್ಯದವರೆಗೂ ಸುರಿದ ಆರು ತಿಂಗಳ ದೀರ್ಘ ಮಳೆ ಕಾಫಿ ಬೆಳೆ ಮೇಲೆ ಬಾರಿ ಪರಿಣಾಮ ಬೀರಿತ್ತು. ಕಳೆದ ಬಾರಿಗೆ ಹೋಲಿಸಿದರೆ ಶೇ.30 ರಿಂದ 40 ಫಸಲು ಕುಸಿತ ಎಂಬ ಮಾತುಗಳು ಕೇಳಿಬರುತ್ತಿದೆ. ಮಳೆಯ ಕಾರಣಕ್ಕೆ ಔಟ್ ಟನ್ ಸಹ ಇಲ್ಲದಾಗಿದ್ದು, 27 ರಿಂದ 29 ಔಟ್ ಟನ್ ಬರುತ್ತಿದ್ದ ಕಾಫಿ ತೋಟಗಳಲ್ಲಿ ಈ ಬಾರಿ 24 ರಿಂದ 26 ಔಟ್ ಟನ್‌ಗೆ ಕುಸಿದಿದೆ ಎನ್ನಲಾಗುತ್ತಿದೆ.

ಬೆಲೆ ಕುಸಿತ: ಜಗತ್ತಿನ ಕಾಫಿ ಉತ್ಪಾದನೆಯಲ್ಲಿ ಭಾರತ ಏಳನೇ ಸ್ಥಾನದಲ್ಲಿದ್ದು ನೆರಳಿನಾಶ್ರಯದಲ್ಲಿ ಬೆಳೆಯುವ ಭಾರತದ ಕಾಫಿಗೆ ಅಂತಾರಾಷ್ಟ್ರೀಯ ಮಟ್ಟದಲ್ಲಿ ಉತ್ತಮ ಬೇಡಿಕೆ ಇದೆ. ಇದೇ ಕಾರಣಕ್ಕೆ ಕಳೆದ ಅರ್ಧ ದಶಕದಲ್ಲಿ ನಾಲ್ಕುಪಟ್ಟು ಕಾಫಿ ಧಾರಣೆ ಹೆಚ್ಚಾಗಿದೆ. ಆದರೆ ಈ ಬೆಲೆ ಹೆಚ್ಚಳ ರಪ್ತುದಾರರಿಗೆ ಶಾಪವಾಗಿ ಪರಿಣಮಿಸಿದ್ದು ನಾಲ್ಕು ವರ್ಷದ ಹಿಂದೆ ಒಂದು ಕೋಟಿ ರೂ. ಬಂಡವಾಳಕ್ಕೆ ಕನಿಷ್ಠ ಎರಡು ಸಾವಿರ ಟನ್ ಕಾಫಿ ರಪ್ತುಮಾಡುತ್ತಿದ್ದ ರಪ್ತುದಾರರಿಗೆ ಇಂದು ಇಷ್ಟೇ ಬಂಡವಾಳಕ್ಕೆ 200 ಟನ್ ಕಾಫಿ ರಪ್ತುಮಾಡಲು ಮಾತ್ರ ಸಾಧ್ಯವಾಗುತ್ತಿದೆ. ಇದು ಅಧಿಕ ಬಂಡವಾಳ ಕಡಿಮೆ ಆದಾಯ ಎಂಬಾಂತಾಗಿದೆ. ಇದರಿಂದಾಗಿ ಸಾಕಷ್ಟು ರಪ್ತುದಾರರು ಭಾರತದ ಕಾಫಿ ಮಾರುಕಟ್ಟೆಗೆ ಬೆನ್ನು ತೋರಿದ್ದಾರೆ.

ಈ ನಡುವೆ ರಫ್ತುದಾರರ ಕೊರತೆ ಸಹ ಬೆಲೆ ಇಳಿಕೆಗೆ ಕಾರಣ ಎಂಬ ಮಾತಿದ್ದರೆ, ಮತ್ತೊಂದೆಡೆ ಜಾಗತಿಕವಾಗಿ ಹೆಚ್ಚು ಕಾಫಿ ಬೆಳೆಯುವ ದೇಶಗಳಾದ ಇಂಡೊನೇಷಿಯಾ, ವಿಯಟ್ನಾಂನಲ್ಲಿ ಕಳೆದ ಅರ್ಧ ದಶಕದಿಂದ ಪ್ರಾಕೃತಿಕ ವಿಕೋಪದಿಂದ ಈ ದೇಶಗಳಲ್ಲಿ ಕಾಫಿ ಗಣನೀಯವಾಗಿ ಕುಸಿತ ಕಂಡಿತ್ತು. ಇದೇ ಕಾರಣಕ್ಕೆ ಭಾರತದ ಕಾಫಿಗೆ ಚಿನ್ನದಂತಹ ಬೆಲೆ ಬಂದಿದೆ. ಆದರೆ, ಈ ಬಾರಿ ಈ ದೇಶಗಳಲ್ಲಿ ಕಾಫಿ ಉತ್ಪಾದನೆ ಹೆಚ್ಚಿದ್ದು ಭಾರತದಲ್ಲಿ ಕಾಫಿ ಕೊಯ್ಲು ನಡೆಸುವ ವೇಳೆಯೆ ಹೆಚ್ಚು ಕಾಫಿ ಬೆಳೆಯುವ ದೇಶಗಳಲ್ಲೂ ಕಾಫಿ ಕೊಯ್ಲಿಗೆ ಬಂದಿದೆ. ಇದೇ ಕಾರಣಕ್ಕೆ ಮಾರುಕಟ್ಟೆ ಕುಸಿತಗೊಂಡಿದೆ. ಅಲ್ಲದೆ ರಫ್ತುದಾರರು ಕಡಿಮೆ ದರಕ್ಕೆ ದೊರಕುವ ಇತರ ದೇಶದ ಕಾಫಿಯನ್ನು ಬಿಟ್ಟು ಭಾರತದ ಮಾರುಕಟ್ಟೆಗೆ ಆಗಮಿಸುತ್ತಿಲ್ಲ ಎಂಬ ಮಾತಿದೆ.

ಬೆಳೆ ಹಾನಿ: ಸದ್ಯ ವರ್ಷದ ಮೊದಲ ಮಳೆ ಜನವರಿ ಮಧ್ಯ ಭಾಗದಲ್ಲಿ ಕಾಫಿ ಬೆಳೆಯುವ ಕೊಡಗು, ಚಿಕ್ಕಮಗಳೂರು ಹಾಗೂ ಹಾಸನ ಜಿಲ್ಲೆಯ ಹಲವೆಡೆ 25ಮೀ. ಮೀಟರ್‌ನಿಂದ 75 ಮೀ.ಮೀಟರ್‌ವರೆಗೆ ಸುರಿದಿದ್ದು, ಕಾಫಿ ಬೆಳೆಯುವ ಪ್ರದೇಶಕ್ಕೆ ಇದು ಅಕಾಲಿಕ ಮಳೆ ಎಂಬ ಹೆಸರು ಪಡೆದಿದೆ. ಜನವರಿ ಮಧ್ಯಭಾಗದಲ್ಲಿ ಆಗ ತಾನೇ ರೋಬಾಸ್ಟ ಕಾಫಿ ಕೊಯ್ಲು ಆರಂಭವಾಗಿದ್ದು ಅಧಿಕ ಮಳೆ ಸುರಿದ ಪರಿಣಾಮ ಕಾಫಿ ಗಿಡಗಳಲ್ಲಿ ಹೂವು ಆರಳಿತ್ತು. ಕಾಫಿ ಹೂವು ಮೂಡಿದ ವೇಳೆ ಫಸಲು ಕೀಳುವುದರಿಂದ ಹಾನಿ ಹೆಚ್ಚು ಎಂಬ ಕಾರಣಕ್ಕೆ ಹೂವು ಕಮರುವವರೆಗೆ ಸಾಕಷ್ಟು ಕಾಫಿ ತೋಟಗಳಲ್ಲಿ ಕೊಯ್ಲು ನಡೆಸುವುದನ್ನು ಸ್ಥಗಿತಗೊಳಿಸಲಾಗಿತ್ತು. ಆದರೆ, ಹೂವು ಕಮರಿದ ನಂತರ ಕೊಯ್ಲು ಆರಂಭವಾಗಿದೆ.

ಹೂವು ಹಾಳಾಗದಂತೆ ಕೊಯ್ಲು ನಡೆಸುವುದು ಅಸಾಧ್ಯ. ಇದು ಮುಂದಿನ ವರ್ಷದ ಕಾಫಿ ಫಸಲಿನ ಮೇಲೂ ದುಷ್ಪರಿಣಾಮ ಬೀರಲಿದೆ. ಅಲ್ಲದೆ ಹಣ್ಣು ಕೊಯ್ಲಿಗೂ ಮುನ್ನ ಮಳೆಯಾಗಿದ್ದು ಗಿಡದಲ್ಲಿ ಸಂಪೂರ್ಣ ಮೂಡಲು ಸಾಧ್ಯವಾಗಿಲ್ಲ. ಸದ್ಯ ಹೂವಾಗಿರುವುದನ್ನು ಉಳಿಸಿಕೊಳ್ಳಬೇಕಾದರೆ ಕನಿಷ್ಠ 20 ದಿನಕ್ಕೂಮ್ಮೆ ಹನಿ ನೀರಾವರಿ ವ್ಯವಸ್ಥೆ ಮಾಡಲೇಬೇಕಿದೆ. ಇದರಿಂದ ಖರ್ಚು ಹೆಚ್ಚು. ಅಲ್ಲದೆ ಇಷ್ಟು ಪ್ರಮಾಣದ ನೀರಾವರಿ ವ್ಯವಸ್ಥೆ ಸಾಕಷ್ಟು ಬೆಳೆಗಾರರ ಬಳಿ ಇಲ್ಲ.

ಹೊಸಗಿಡಗಳಿಗೆ ಸಹಕಾರಿ: ಮೆಣಸು, ಅಡಕೆಗಲ್ಲದೆ ಕಳೆದ ವರ್ಷ ನಾಟಿ ಮಾಡಿರುವ ಎಲ್ಲ ವಾಣಿಜ್ಯ ಬೆಳೆಗಳಿಗೂ ಅಕಾಲಿಕ ಮಳೆ ಔಷಧದಂತೆ ಕೆಲಸ ಮಾಡಿದ್ದು ಸಣ್ಣ ಗಿಡಗಳನ್ನು ಉಳಿಸಿಕೊಳ್ಳಲು ಹನಿ ನೀರಾವರಿ ಮಾಡಬೇಕಿದ್ದ ಬೆಳೆಗಾರರಿಗೆ ಅಕಾಲಿಕ ಮಳೆಯಿಂದ ತಪ್ಪಿದಂತಾಗಿದೆ.