ಮಕ್ಕಳಿಗೆ ದೊರೆಯುತ್ತಿಲ್ಲ ಸಂಸ್ಕಾರಯುತ ಶಿಕ್ಷಣ

ಪಟ್ಟಣದ ಗುರುವೇಗೌಡ ಕಲ್ಯಾಣ ಮಂಟಪದಲ್ಲಿ ವೀರಶೈವ-ಲಿಂಗಾಯತ ಯುವ ಸೇನೆ ಆಯೋಜಿಸಿದ್ದ ಶ್ರೀ ಶಿವಕುಮಾರ ಸ್ವಾಮೀಜಿ ಅವರ ಏಳನೇ ವರ್ಷದ ಪುಣ್ಯಸ್ಮರಣೆ ಕಾರ್ಯಕ್ರಮದಲ್ಲಿ ಆಶೀರ್ವಚನ ನೀಡಿ ಮಾತನಾಡಿದರು.

ಧರ್ಮವನ್ನು ನಾವು ಪಾಲಿಸದಿದ್ದರೆ ಧರ್ಮ ನಮ್ಮನ್ನು ರಕ್ಷಿಸುವುದಿಲ್ಲ, ಶ್ರೀ ಶಿವಕುಮಾರ ಸ್ವಾಮೀಜಿ ದೇಹತ್ಯಾಗಕ್ಕೂ ಕೆಲವೇ ಗಂಟೆಗಳ ಮುನ್ನ ಇಷ್ಟಲಿಂಗ ಪೂಜೆ ಮಾಡಿದ್ದರು. ಆದರೆ, ಅವರು ಹಾಕಿ ಕೊಟ್ಟ ಪಂಕ್ತಿಯಲ್ಲಿ ಇಂದು ಸಮಾಜ ನಡೆದುಕೊಳ್ಳುತ್ತಿಲ್ಲ. ಇದು ಶ್ರೀಗಳಿಗೆ ಕೊಡುವ ಗೌರವವಲ್ಲ ಎಂದು ವಿಷಾದಿಸಿದರು.

ಪೂರ್ವಿಕರು ಹಾಕಿಕೊಟ್ಟ ಪಂಕ್ತಿಯಂತೆ ಶ್ರೀ ಶಿವಕುಮಾರ ಸ್ವಾಮೀಜಿ ತಮ್ಮ 89 ವರ್ಷದ ಸುದೀರ್ಘ ಸೇವೆಯಲ್ಲಿ ನಾಡಿಗೆ ಅಪಾರ ಕೊಡುಗೆ ನೀಡಿದ್ದಾರೆ. ಮಠದಲ್ಲಿ ಯಾವುದೇ ಮತಜಾತಿ ಭೇದವಿಲ್ಲದೆ 10 ಸಾವಿರ ವಿದ್ಯಾರ್ಥಿಗಳು ಇಂದು ಜ್ಞಾನಾರ್ಜನೆ ಮಾಡುತ್ತಿದ್ದಾರೆ ಎಂದರು.

ಶ್ರೀಗಳು ಪಟ್ಟಣಕ್ಕಿಂತ ಗ್ರಾಮೀಣ ಭಾಗದಲ್ಲಿ ಹೆಚ್ಚು ಶಾಲೆಗಳನ್ನು ತೆರೆಯುವ ಮೂಲಕ ಹಳ್ಳಿಗಾಡಿನ ಜನರನ್ನು ವಿದ್ಯಾವಂತರನ್ನಾಗಿ ಮಾಡುವ ಮಹದಾಸೆ ಹೊಂದಿದ್ದರು. ಇದರಂತೆ ರಾಜ್ಯದ ಹಲವಡೆ ಗ್ರಾಮೀಣ ಭಾಗದಲ್ಲಿ ಮಠದ ಶಾಲೆಗಳು ಕಾರ್ಯನಿರ್ವಹಿಸುತ್ತಿವೆ ಎಂದರು.

ಕಾರ್ಯಕ್ರಮದ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಕಿರಿಕೊಡ್ಲಿಮಠದ ಶ್ರೀ ಸದಾಶಿವಸ್ವಾಮೀಜಿ, ನಾಡುಕಂಡ ನಡೆದಾಡುವ ದೇವರು ಶಿವಕುಮಾರ ಸ್ವಾಮೀಜಿ. ಅವರು ಹಾಕಿಕೊಟ್ಟ ದಾರಿಯಲ್ಲಿ ನಡೆದಾಗ ಮಾತ್ರ ಆಚರಣೆಗೂ ಒಂದು ಅರ್ಥ ಬರಲಿದೆ ಎಂದರು.

ಕಲ್ಲಮಠದ ಶ್ರೀ ಮಹಾಂತ ಸ್ವಾಮೀಜಿ ಮಾತನಾಡಿ, ನಿಸ್ವಾರ್ಥ ಸೇವೆಯಿಂದ ಮನುಷ್ಯ ದೇವರಾಗ ಬಹುದು ಎಂಬುದಕ್ಕೆ ಶಿವಕುಮಾರ ಶ್ರೀಗಳೇ ಉದಾಹರಣೆ. ಸ್ವಂತಕ್ಕಿಂತ ಸಮಾಜಕ್ಕೆ ನೀಡುವ ಕೊಡುಗೆಯಿಂದ ಸಾವಿನ ನಂತರವೂ ಬದುಕಬಹುದು ಎಂದರು.

ಅವಧೂತ ಗೌರಿಗದ್ದೆ ವಿನಯ್ ಗುರೂಜಿ ಮಾತನಾಡಿ, ದಾಸೋಹಕ್ಕೆ ಹೆಸರಾದ ಧರ್ಮ ವೀರಶೈವ ಧರ್ಮ. ದಯೆ, ಸೇವೆ, ಸಮಾನತೆ ತತ್ವಗಳು ಧರ್ಮದಲ್ಲಿ ಅಡಕವಾಗಿದೆ. ನಾಡಿನಲ್ಲಿ ಮಠಗಳು ಒಂದು ಸುಂದರ ಹೂವಿನ ಹಾರದಂತೆ. ಮಠಗಳಿಂದಾಗಿ ನಾಡಿನಲ್ಲಿ ಇಂದಿಗೂ ಸಂಸ್ಕಾರ, ಸಂಸ್ಕೃತಿ ಉಳಿದುಕೊಂಡಿದೆ. ರಾಜ್ಯದಲ್ಲಿರುವ ವೀರಶೈವ ಮಠಗಳು ದಾಸೋಹಕ್ಕೆ ಹೆಸರು ಪಡೆದಿದ್ದು ಮಠಗಳಿರುವವರೆಗೂ ನಾಡಿಗೆ ಗಂಡಾಂತರ ಬರುವುದಿಲ್ಲ. ಶಿವಕುಮಾರ ಸ್ವಾಮೀಜಿ ಆಶಯದಂತೆ ಸಮಾಜದ ಪ್ರತಿಯೊಬ್ಬರೂ ಇಷ್ಟಲಿಂಗ ಪೂಜೆ, ನಿಸ್ವಾರ್ಥ ಕಾಯಕದಲ್ಲಿ ತೊಡಗಿಕೊಂಡಾಗ ಸ್ವಾಮೀಜಿಗಳ ಆತ್ಮಕ್ಕೆ ಶಾಂತಿ ದೊರೆಯಲಿದೆ ಎಂದರು.

ಕಾರ್ಯಕ್ರಮದಲ್ಲಿ ತೆಂಕಲಗೂಡು ಮಠದ ಶ್ರೀ ಚನ್ನಸಿದ್ದೇಶ್ವರ ಶಿವಾಚಾರ್ಯ ಸ್ವಾಮೀಜಿ, ತಣ್ಣೀರುಹಳ್ಳ ಮಠದ ಶ್ರೀ ವಿಜಯಕುಮಾರ ಸ್ವಾಮೀಜಿ, ಮಾಜಿ ಶಾಸಕರಾದ ಎಚ್.ಕೆ. ಕುಮಾರಸ್ವಾಮಿ, ಎಚ್.ಎಂ. ವಿಶ್ವನಾಥ್, ವೀರಶೈವ-ಲಿಂಗಾಯತ ಯುವ ವೇದಿಕೆ ಅಧ್ಯಕ್ಷ ಜಾನೇಕೆರೆ ಸಾಗರ್, ಮುಖಂಡರಾದ ಬಸವಣ್ಣ, ವಿದ್ಯಾಶಂಕರ್, ಬನ್ನಳ್ಳಿಪುನೀತ್ ಸೇರಿದಂತೆ ಹಲವರು ಉಪಸ್ಥಿತರಿದ್ದರು.

ಕಾರ್ಯಕ್ರಮದಲ್ಲಿ ಯುಪಿಎಸ್ಸಿ ಪರೀಕ್ಷೆಯಲ್ಲಿ 389 ನೇ ರ‌್ಯಾಂಕ್ ಪಡೆದ ತಾಲೂಕಿನ ಗುರ್ಜನಹಳ್ಳಿ ಗ್ರಾಮದ ಮನೋಜ್ ಅವರನ್ನು ಸನ್ಮಾನಿಸಲಾಯಿತು.