ಹಾಸನ

ನಾಡಿನ ಪುಣ್ಯ ಭೂಮಿಯಾಗಲಿದೆ ಚೆನ್ನಮ್ಮ ಸಮಾಧಿ

ಚೆನ್ನಮ್ಮ ಅವರ ಸಮಾಧಿಗೆ ಕುಮಾರಸ್ವಾಮಿ ಹಾಗೂ ಕುಟುಂಬಸ್ಥರು ಮೂರನೇ ದಿನದ ಹಾಲು ತುಪ್ಪ ಕಾರ್ಯ ನೆರವೇರಿಸಿದರು.
ಚೆನ್ನಮ್ಮ ಅವರ ಸಮಾಧಿಗೆ ಕುಮಾರಸ್ವಾಮಿ ಹಾಗೂ ಕುಟುಂಬಸ್ಥರು ಮೂರನೇ ದಿನದ ಹಾಲು ತುಪ್ಪ ಕಾರ್ಯ ನೆರವೇರಿಸಿದರು.
Published on: 

ಪ್ರಮುಖ ಮುಖ್ಯಾಂಶಗಳು

  • ನಾಡಿನ ಪುಣ್ಯ ಭೂಮಿಯಾಗಲಿದೆ ಚೆನ್ನಮ್ಮ ಸಮಾಧಿ
  • ಕೇಂದ್ರ ಸಚಿವ ಎಚ್.ಡಿ.ಕುಮಾರಸ್ವಾಮಿ ಮಾಹಿತಿ
  • ಧಾರ್ಮಿಕ, ಸಾಂಸ್ಕೃತಿಕ ಕೇಂದ್ರವಾಗಿ ರೂಪಿಸಲು ನೀಲಿನಕ್ಷೆ
ಹಾಸನ: ವಿಶ್ವಕ್ಕೆ ಮಾದರಿಯಾಗುವ ರೀತಿಯಲ್ಲಿ ಚೆನ್ನಮ್ಮ ಅವರ ಸಮಾಧಿ ಸ್ಥಳವನ್ನು ಅಭಿವೃದ್ಧಿಪಡಿಸಲಾಗುವುದು ಎಂದು ಕೇಂದ್ರ ಸಚಿವ ಎಚ್.ಡಿ.ಕುಮಾರಸ್ವಾಮಿ ಹೇಳಿದರು.
ಹೊಳೆನರಸೀಪುರ ತಾಲೂಕಿನ ಮಾವಿನಕೆರೆ ಬೆಟ್ಟದ ತಪ್ಪಲಿನಲ್ಲಿ ಬುಧವಾರ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಈ ಸ್ಥಳ ಚಿರಸ್ಥಾಯಿಯಾಗಿರಬೇಕೆಂಬುದು ಕುಟುಂಬದ ಬಯಕೆ. ಈ ಕುರಿತು ಕುಟುಂಬಸ್ಥರು ಮಾತುಕತೆ ನಡೆಸಿದ್ದೇವೆ. ಈ ಭಾಗದ ವ್ಯಾಪ್ತಿಯ ಭೂ ಮಾಲೀಕರ ಜತೆಯೂ ನಾನು ಮಾತುಕತೆ ನಡೆಸಿದ್ದು, ಎಲ್ಲರ ಸಹಕಾರದಿಂದ ತಂದೆ-ತಾಯಿ ಹೆಸರಿನಲ್ಲಿ ನಾಡಿನ ಪುಣ್ಯ ಭೂಮಿಯಾಗಿ ಸಮರ್ಪಣೆ ಮಾಡಲಾಗುವುದು ಎಂದರು.
ಧಾರ್ಮಿಕ ಕ್ಷೇತ್ರದ ಜತೆಗೆ ಸಾಮಾಜಿಕವಾಗಿ ಸಂಕಷ್ಟ ಎದುರಿಸುವವರು ಈ ಸ್ಥಳದಲ್ಲಿ ನೆಮ್ಮದಿಯ ಜೀವನ ಕಟ್ಟಿಕೊಳ್ಳುವ ವಾತಾವರಣ ನಿರ್ಮಿಸಲಾಗುವುದು. ನಮ್ಮ ಹಳೆಯ ಸಂಸ್ಕೃತಿಯನ್ನು ಉಳಿಸಬೇಕು ಎಂಬ ನಿಟ್ಟಿನಲ್ಲಿ ಚಿಂತನೆ ಇದೆ ಎಂದರು.
ವಯೋವೃದ್ಧರಿಗೆ, ಅನಾಥ ಮಕ್ಕಳಿಗೆ, ರೈತರು ಸಂಶೋಧನೆ ಮಾಡುವ ಕೇಂದ್ರ, ಸಂಸ್ಕೃತ ಪಾಠಶಾಲೆ ನಿರ್ಮಾಣ ಸೇರಿ ಹಲವು ಯೋಜನೆಗಳನ್ನು ಕಾರ್ಯಗತ ಮಾಡಲಾಗುವುದು. ಈ ಕೆಲಸಕ್ಕಾಗಿ ಸ್ವಾರ್ಥವಿಲ್ಲದೆ ಧಾರ್ಮಿಕವಾಗಿ, ಸಾಮಾಜಿಕವಾಗಿ ಕೆಲಸ ಮಾಡುವವರನ್ನು ಆಯ್ಕೆ ಮಾಡಲಾಗವುದು. ಈ ಭೂಮಿ ಇರುವವರೆಗೂ ನಮ್ಮ ತಂದೆ-ತಾಯಿ ಹೆಸರಿನಲ್ಲಿ ಬಡವರು, ಅನಾಥರಿಗೆ ನೆರಳಾಗುವ, ಬದುಕಿಗೆ ದಾರಿ ತೋರಿಸುವ ಯೋಜನೆ ಅನುಷ್ಠಾನಕ್ಕೆ ನೀಲಿನಕ್ಷೆ ತಯಾರು ಮಾಡಿದ್ದೇವೆ. ಮುಂದಿನ 15 ರಿಂದ 20 ದಿನಗಳಲ್ಲಿ ಕಾಮಗಾರಿ ಆರಂಭಿಸಿ ಮುಂದಿನ ಮೂರು ವರ್ಷಗಳಲ್ಲಿ ಪೂರ್ಣಗೊಳಿಸುವ ಗುರಿ ಹಾಕಿಕೊಂಡಿದ್ದೇವೆ ಎಂದು ಮಾಹಿತಿ ನೀಡಿದರು.
ಪುಸ್ತಕ ರೂಪದಲ್ಲಿ ದಾಖಲು
ರಾಜಕೀಯದಲ್ಲಿ ನಮ್ಮಿಂದಲೂ ತಪ್ಪುಗಳಾಗಿವೆ. ಜತೆಗೆ ನಮ್ಮ ಕುಟುಂಬವನ್ನು ರಾಜ್ಯದ ಜನರ ಹೃದಯದಿಂದ ಅಳಿಸಿ ಹಾಕಲು ಪ್ರಯತ್ನಗಳು ನಡೆದಿವೆ. ತಾಯಿ ಮೇಲಿನ ಆ್ಯಸಿಡ್ ದಾಳಿ ಹಾಗೂ ವಯಸ್ಸಾಗಿರುವ ತಂದೆ-ತಾಯಿ ಅನುಭವಿಸಿರುವ ಮಾನಸಿಕ ಯಾತನೆಯನ್ನು ಮುಂದೆ ಯಾರಾದರೂ ಪುಸ್ತಕ ರೂಪದಲ್ಲಿ ದಾಖಲಿಸಬಹುದು ಎಂದ ಎಚ್‌ಡಿಕೆ, ಒಂದೂವರೆ ವರ್ಷದಿಂದ ತಾಯಿ ಚೆನ್ನಮ್ಮ ಅವರಿಗೆ ಆರೋಗ್ಯ ಸಮಸ್ಯೆಗಳು ಹೆಚ್ಚಿದ್ದವು. ನೆನಪಿನ ಶಕ್ತಿ ಸಂಪೂರ್ಣ ಕುಂದಿತ್ತು ಎಂದರು.
ಪ್ರಜ್ವಲ್ ಬರುವಿಕೆಗೆ ಕಾದಿದ್ದ ಚೆನ್ನಮ್ಮ
ತಾಯಿ ಚೆನ್ನಮ್ಮ ಅವರು ಮೊಮ್ಮಗ, ಮಾಜಿ ಸಂಸದ ಪ್ರಜ್ವಲ್ ರೇವಣ್ಣ ಅವರ ಬರುವಿಕೆಗಾಗಿ ಕಾಯುತ್ತಿದ್ದರೆಂದು ಎಚ್.ಡಿ.ಕುಮಾರಸ್ವಾಮಿ ಹೇಳಿದರು.
ಅನಾರೋಗ್ಯದಿಂದ ಹಾಸಿಗೆ ಹಿಡಿದಿದ್ದ ಅವರನ್ನು ನಾನು ಆಗಾಗ ಭೇಟಿಯಾಗುತ್ತಿದ್ದೆ. ಒಳ್ಳೆಯ ಕೆಲಸ ಮಾಡು, ಜನರಿಗೆ ಒಳಿತು ಮಾಡು ಎನ್ನುತ್ತಿದ್ದರು. ಮತ್ತೆ ಯಾವಾಗ ಅವನನ್ನು ಕರೆದುಕೊಂಡು ಬರುತ್ತೀಯಾ ಎಂದು ಎರಡ್ಮೂರು ಸಲ ಕೇಳಿದ್ದರು. ಆ ನೋವು ನನಗೆ ಈಗಲೂ ಕಾಡುತ್ತಿದೆ ಎಂದರು.
ನಮ್ಮ ತಂದೆಯವರು ಇನ್ನೂ ಏಳೆಂಟು ವರ್ಷ ಇರುತ್ತಾರೆಂದು ಅಂದುಕೊಂಡಿದ್ದೆವು. ನಮ್ಮ ತಾಯಿಯ ಜತೆ ಅವರು ಆತ್ಮೀಯ ಭಾವನೆ ಇಟ್ಟುಕೊಂಡಿದ್ದರು. ಆ ಕೊರಗಿನಲ್ಲಿ ಏನಾದರೂ ಸಣ್ಣಪುಟ್ಟ ಸಮಸ್ಯೆಗಳು ಆಗಬಹುದು ಎನ್ನುವ ಭಯ ಈಗ ಕಾಡುತ್ತಿದೆ. ಆದ್ದರಿಂದ ಮಾನಸಿಕವಾಗಿ ಧೈರ್ಯ ತುಂಬಲು ಕುಟುಂಬದವರು ಜತೆಗೆ ಇರಬೇಕೆಂದು ತೀರ್ಮಾನಿಸಲಾಗಿದೆ ಎಂದರು.
ಹಾಲು-ತುಪ್ಪ ಸಮರ್ಪಣೆ:
ಸಮಾಧಿಗೆ ಬುಧವಾರ ದೇವೇಗೌಡರು ಹಾಗೂ ಕುಟುಂಬಸ್ಥರು ಮೂರನೇ ದಿನದ ಹಾಲು ತುಪ್ಪ ಕಾರ್ಯ ನೆರವೇರಿಸಿದರು. ಬೆಳಗ್ಗೆ 9 ಗಂಟೆಗೆ ಸಮಾಧಿ ಸ್ಥಳಕ್ಕೆ ಆಗಮಿಸಿದ ಅರ್ಚಕರು ಹಾಗೂ ಗೌಡರ ಕುಟುಂಬಸ್ಥರು ಆರಂಭದ ಪೂಜೆಯಲ್ಲಿ ಭಾಗಿಯಾದರು. ನಂತರ ದೇವೇಗೌಡರು ಸಮಾಧಿಗೆ ಅರಿಶಿಣ, ಕುಂಕುಮ ಅರ್ಪಿಸಿ ಹಾಲು ತುಪ್ಪ ಬಿಟ್ಟರು. ಈ ಕಾರ್ಯದಲ್ಲಿ ಕುಟುಂಬದ ಎಲ್ಲ ಸದಸ್ಯರು ಭಾಗಿಯಾದರು. ದಕ್ಷಿಣ ಆಫ್ರಿಕಾದಿಂದ ಆಗಮಿಸಿದ್ದ ದೇವೇಗೌಡರ ಅಭಿಮಾನಿಗಳು ಪಾಲ್ಗೊಂಡಿದ್ದು ಗಮನ ಸೆಳೆಯಿತು.
ಗಳಗಳನೆ ಅತ್ತ ರೇವಣ್ಣ
ಮಾಜಿ ಪ್ರಧಾನಿ ಪತ್ನಿಯ ಸಮಾಧಿ ಬಳಿ ವೀಲ್‌ಚೇರ್‌ನಲ್ಲಿ ಕುಳಿತಿದ್ದ ಎಚ್.ಡಿ.ದೇವೇಗೌಡ ಯಾರೊಂದಿಗೂ ಮಾತನಾಡದೆ ಸಮಾಧಿಯತ್ತ ದೃಷ್ಟಿ ಹರಿಸಿ ಕುಳಿತಿದ್ದರು. ಪುತ್ರಿ ಅನುಸೂಯಾ, ಮೊಮ್ಮಗಳಿಂದ ಹಾಲು ತುಪ್ಪ ಬಿಟ್ಟ ಬಳಿಕ, ಇವಳೇ ಅಮ್ಮನಿಗೆ ಊಟ ಕೊಟ್ಟು ನೋಡಿಕೊಳ್ಳುತ್ತಿದ್ದಳು ಎಂದಾಗ ಮಾಜಿ ಸಚಿವ ಎಚ್.ಡಿ.ರೇವಣ್ಣ ಗಳಗಳನೆ ಅತ್ತರು.
ವಿಜಯವಾಣಿ ನಂ.1 ದಿನ ಪತ್ರಿಕೆ | Vijayavani | Kannada News
www.vijayavani.net