ಎಚ್‌ಡಿಡಿಗೆ ಬೆನ್ನೆಲುಬಾಗಿದ್ದ ಚೆನ್ನಮ್ಮ

ಚೆನ್ನಮ್ಮ ಭಾವಚಿತ್ರಕ್ಕೆ ಪುಷ್ಪನಮನ ಸಲ್ಲಿಸಿ ಮಾತನಾಡಿದ ಶಾಸಕ ಎಚ್.ಕೆ.ಸುರೇಶ್, ಚೆನ್ನಮ್ಮ ಅವರು ಎಚ್.ಡಿ.ದೇವೇಗೌಡರ ಪತ್ನಿಯಾಗಿದ್ದರೂ ರಾಜಕೀಯವಾಗಿ ಕಾಣಿಸಿಕೊಳ್ಳದೆ, ಕುಟುಂಬದ ಜವಾಬ್ದಾರಿಗಳನ್ನು ನಿಭಾಯಿಸುತ್ತಾ ದೇವೇಗೌಡರ ದೀರ್ಘ ರಾಜಕೀಯ ಬೆನ್ನೆಲುಬಾಗಿ ನಿಂತವರು. ಅವರ ನಿಧನದ ಸಂದರ್ಭ ಸಾಗರದಂತೆ ಜನರು ಸಂತಾಪ ವ್ಯಕ್ತಪಡಿಸಿದ ಸನ್ನಿವೇಶ ಇದೇ ಮೊದಲು ಎಂದರು.

ಎಂದಿಗೂ ಮಾಜಿ ಪ್ರಧಾನಿ ಪತ್ನಿ ಎಂಬ ಅಹಂ ಇಲ್ಲದೆ ಸರ್ವರನ್ನು ಸಮನಾಗಿ ಕಾಣುತಿದ್ದರು. ಪ್ರತಿನಿತ್ಯ ದೇವರ ಪೂಜೆ, ಧಾರ್ಮಿಕ ಕಾರ್ಯದಲ್ಲಿ ತಲ್ಲಿನರಾಗುವ ಮೂಲಕ ನಾಡಿನ ಒಳಿತಿಗೆ ಕಾರಣರಾಗಿದ್ದಾರೆ. ಜು.30ರಂದು ಮಾವಿನಕೆರೆಯಲ್ಲಿ ನಡೆಯುವ ಕಾರ್ಯಕ್ರಮದಲ್ಲಿ ಎಲ್ಲರೂ ಭಾಗವಹಿಸೋಣ ಎಂದರು.

ಮಾಜಿ ಸಚಿವ ಎಚ್.ಕೆ.ಕುಮಾರಸ್ವಾಮಿ ಮಾತನಾಡಿ, ಚೆನ್ನಮ್ಮ ಅವರು ತಾವು ಯಾವುದೇ ಚುನಾವಣೆ, ಅಧಿಕಾರ ಇಲ್ಲದೆ ಜನ ಸಾಮಾನ್ಯರಲ್ಲಿ ಹೆಸರು ಪಡೆದಿದ್ದಾರೆ. ಯಾರೇ ಮನೆಗೆ ಹೊದ ಸಂದರ್ಭದಲ್ಲೂ ಅವರನ್ನು ಆತಿಥ್ಯದ ಮೂಲಕ ದೇವೇಗೌಡರ ರಾಜಕೀಯ ಬದುಕಿಗೆ ಪೂರಕವಾಗಿ ನಡೆದುಕೊಂಡವರು. ಅವರ ಜೀವನ ಇತರರಿಗೆ ಮಾದರಿ ಎಂದರು.

ಹಾಸನ ಜಿಲ್ಲಾ ಕನ್ನಡ ಸಾಹಿತ್ಯ ಪರಿಷತ್ತು ಅಧ್ಯಕ್ಷ ಡಾ.ಎಚ್.ಎಲ್.ಮಲ್ಲೇಶಗೌಡ ಮಾತನಾಡಿ, ಹೆಣ್ಣು ಕೇವಲ ಅಡುಗೆ ಮನೆಗೆ ಸೀಮಿತವೆಂದು ಹೇಳುವ ಕಾಲ ಘಟ್ಟದಲ್ಲಿ ಅಡುಗೆ ಮನೆಯಿಂದ ಮಾಜಿ ಪ್ರಧಾನಿ ಎಚ್.ಡಿ.ದೇವೇಗೌಡರು ರಾಷ್ಟ್ರದ ಉನ್ನತ ಸ್ಥಾನ ಏರಲು ಚೆನ್ನಮ್ಮ ಅವರು ಕಾರಣರಾಗಿದ್ದಾರೆ, ಮಾಜಿ ಪ್ರಧಾನಿ ದೇವೇಗೌಡರ ದಾಂಪತ್ಯ ಬದುಕು ಇಂದಿನ ಯುವ ಜನರಿಗೆ ಮಾದರಿಯಾಗಿದೆ. ಶರಣರ ಬದುಕು ಮರಣದಲ್ಲಿ ನೋಡು ಎಂಬಂತೆ ಚೆನ್ನಮ್ಮ ಅವರ ಪರಿಪೂರ್ಣ ಜೀವನ ಎಲ್ಲರಿಗೂ ದಾರಿದೀಪ ಎಂದರು.

ಹಾಸನ ಎಚ್‌ಡಿಸಿಸಿ ಬ್ಯಾಂಕ್ ನಿರ್ದೇಶಕ ಎಂ.ಎ.ನಾಗರಾಜ್, ಜಿಪಂ ಮಾಜಿ ಅಧ್ಯಕ್ಷ ಬಿ.ಡಿ.ಚಂದ್ರೇಗೌಡ, ಜಿ.ಟಿ.ಇಂದಿರಾ, ಮಾಜಿ ಸದಸ್ಯರಾದ ರಾಜಶೇಖರ್, ಸಿ.ಎಸ್.ಪ್ರಕಾಶ್, ತಾಲೂಕು ಬಿಜೆಪಿ ಅಧ್ಯಕ್ಷ ಸಂಜು ಕೌರಿ, ಸಹಕಾರಿ ಒಕ್ಕೂಟದ ಅಧ್ಯಕ್ಷ ಎಂ.ಕೆ.ಆರ್. ಸೋಮೇಶ್, ತಾಲೂಕು ಕಾಫಿ ಬೆಳೆಗಾರರ ಸಂಘದ ಮಾಜಿ ಅಧ್ಯಕ್ಷ ಅದ್ದೂರಿ ಕುಮಾರ್, ಬಿಎಸ್‌ಪಿ ರಾಜ್ಯ ಕಾರ್ಯದರ್ಶಿ ಗಂಗಾಧರ್ ಬಹುಜನ್, ಮುಖಂಡರಾದ ಅಡಗೂರು ಬಸವರಾಜು, ಡಾ.ನಾರಾಯಣಸ್ವಾಮಿ, ಗಂಗೆಶ್, ಲೋಕೇಗೌಡ ಸೇರಿದಂತೆ ವಿವಿಧ ರಾಜಕೀಯ ಪಕ್ಷ ಹಾಗೂ ಸಂಘ ಸಂಸ್ಥೆಯ ಮುಖಂಡರು ಕಾರ್ಯಕರ್ತರು, ಅಭಿಮಾನಿಗಳಿದ್ದರು.